ភ្នំពេញ៖ អ្នកតំណាងរាស្ត្រគណបក្សសង្គ្រោះជាតិ បានសុំឲ្យរដ្ឋមន្ត្រីក្រសួងមហាផ្ទៃសម្តេច ស ខេង ស៊ើបអង្កេតករណីមន្ត្រីប៉ូលីសស័ក្ក៤ ម្នាក់នៅប៉ោយប៉ែត ដែលមានការសង្ស័យថា ធ្វើជាដួលសន្លប់នៅមុខឡាន ហើយគ្រេច ក បាននាំឲ្យមន្ត្រីគណបក្សសង្គ្រោះជាតិម្នាក់ត្រូវបានជាប់ឃុំនិងចោទប្រកានពីបទប៉ុនប៉ងមនុស្សឃាតដោយចេតនា។ ករណីនេះ សម្តេច ស ខេង ថាសមត្ថកិច្ចកំពុងស៊ើបអង្កេត។ លោក ធូ វិរៈ រាយការណ៍៖
លោក អេង ឆៃអ៊ាង៖«ខ្ញុំសូមឲ្យសម្តេច ក្រឡា ហោម មេតា្តចាត់វិធានការ ដើម្បីធ្វើការស៊ើបអង្កេត រឿងនិង ដើម្បីផ្តល់យុត្តិធម៌ជូនភាគីទាំងសង់ខាង ទាំងម្ចាស់ឡាន និង ហើយទាំងនគរបាលច្រកទ្វាប៉ោយប៉ែត»។
សម្តេច ស ខេង៖«ខ្ញុំបានបញ្ជាតាំងពីព្រឹកមិញនោះ ទៅឲ្យអគ្គនាយកដ្ឋានអន្តោប្រវេសន៍ ដើម្បីឲ្យពិនិត្យករណីនេះ ហើយក៏ដូចជាអាជ្ញាធរខេត្តបន្ទាយមានជ័យឲ្យពិនិត្យបញ្ហានេះ»។
លោក ម៉ង់ ពុទ្ធី ហៅ ឌិន ពុទ្ធី ត្រូវសមត្ថកិច្ចឃាត់ខ្លួនកាលពីថ្ងៃទី ២២ ធ្នូ បន្ទាប់សមត្ថកិច្ចចោទថា លោកបានបើកឡានបុកនាយរងប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិប៉ោយប៉ែត ឈ្មោះ ឈាន ពិសិដ្ឋ បណ្ដាលឱ្យដួលបោកក្បាលសន្លប់ទៅនឹងខឿនថ្មកាលពីព្រឹកថ្ងៃទី២២ ខែធ្នូ នៅក្បែរស្ពានមិត្តភាពកម្ពុជា ថៃ នៅក្រុងប៉ោយប៉ែត ខេត្តបន្ទាយមានជ័យ។
ករណីនេះ បណ្ដាញសង្គម បានបង្ហោះរូបលោកស័ក្ដ៤នេះ យ៉ាងច្រើន ផុសផល់ ហើយនាំឱ្យមានការចោទសួរពីល្បិចធ្វើដួលសន្លប់ ដើម្បីចាប់ខ្លួនបុគ្គលដែលមានការគុំគួនគ្នា៕
