ភ្នំពេញ៖ សាសនិកជនឥស្លាមជាច្រើនរយនាក់ នៅរសៀលថ្ងៃទី ២៣ ខែ ធ្នូនេះ បាននាំគ្នាវាយកំទេចរបងរបស់សាលាក្រុងភ្នំពេញ ដែលសង់សម្រាប់សង់ផ្លូវកាត់ខ្លោងទ្វាវិហារឥស្លាម។ មន្ត្រីសាលាក្រុងភ្នំពេញសម្តែងការ ខកចិត្តចំពោះសកម្មភាពនេះ ដោយអះអាងថា សាលាក្រុងនឹងហៅអ្នកពាក់ព័ន្ធមកធ្វើកិច្ចសន្យាករណីនេះ។
នេះគឺជាសកម្មភាពរបស់សាសនិកជនឥស្លាមជាច្រើនរយនាក់ បានវាយកំទេចរបងធ្វើអំពីស័ង្កសីរបស់សាលាក្រុងសម្រាប់គម្រោងសាងសង់ផ្លូវ ដែលសាសនិកឥស្លាមភាគច្រើនជំនាស់ទៅនិងគម្រោងសង់ផ្លូវនេះ។
សាសនិកជនវាយកំទេចរបងដូចនេះ បន្ទាប់ពីសាលាក្រុងដឹកនាំកម្លាំងចម្រុះចុះទៅវាស់វែងដីនៅក្នុងវិហារឥស្លាម និងសង់របងសម្រាប់ធ្វើផ្លូវដែលមានទំហំទទឹងប្រមាណ ៥០ ម៉ែត្រ បណ្តោយប្រវែងប្រមាណ ២០០ ម៉ែត្រ កាលពីថ្ងៃទី ១៩ ធ្នូ។
ជុំវិញការវាយកំទេចរបងសាលារាជធានីភ្នំពេញនេះ លោក មាន ចាន់យ៉ាដា អភិបាលរងសាលាក្រុងដែលទើបនិងឡើងដំណែងបានប្រសាសន៍ថា សាលាក្រុងសម្តែងការខកចិត្តចំពោះសកម្មភាពវាយកំទេចទ្រព្យសម្បត្តិរបស់រដ្ឋនេះ។ លោកបន្តថា លោកនឹងកោះហៅអ្នកវាយកំទេចទ្រព្យសម្បត្តិរបស់សាលារាជធានីភ្នំពេញ មកធ្វើកិច្ចសន្យាអំពីករណីនេះ។
លោក សារិន សុវណ្ណា ប្រធានមន្ទីសូរិយោដីរាជធានីភ្នំពេញនៅពេលចុះវាស់វែងកាលពីថ្ងៃទី ១៩ ធ្នូ កន្លងមកថា ទំហំផ្លូវដែលវាស់វែងសម្រាប់គម្រោងសង់ផ្លូវគឺ មានទំហំទទឹង ២០ ម៉ែត្រ ទ្រូងផ្លូវ ១៦ម៉ែត្រ ប្រវែងបណ្តោយប្រមាណ ២០០ ម៉ែត្រ ចាប់ពីចំនុចខ្លោងចូលទ្វារហូតដល់របងវិហារ និងទុកចំណីផ្លូវសងខាងចំនួន ២ម៉ែត្រ។ លោកបន្ថែមថា ការសាងសងផ្លូវនេះគឺ ដើម្បីរំដោះចរាចរណ៍កក់ស្ទះ និងសង់ប្រព័ន្ធលូ ដើម្បីរំដោះទឹកផងដែរ។
ករណីគម្រោងសាងសង់ផ្លូវនេះសាសនិកជនឥស្លាម មានការព្រួយបារម្ភថាអាចនឹងប៉ះពាល់ដល់ការថ្វាយ បង្គំរបស់ពួកគាត់ ដោយស្នើឲ្យសាលាក្រុងធ្វើវាងអែបរបងវិហារឥស្លាមវិញ៕
ប្រភពវីដេអូពី Facebook លោក សម រង្ស៊ី។
