ភ្នំពេញ៖ នៅព្រឹកថ្ងៃទី ២៣ ធ្នូ នេះ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានត្រួតពិនិត្យផ្ទៀងផ្ទាត់ទិន្នន័យអ្នកចុះឈ្មោះបោះឆ្នោត ដែលទើបបញ្ជូនពីតាមបណ្តាខេត្តមួយចំនួន មកនាយកដ្ឋានគ្រប់គ្រងទិន្នន័យ និងបញ្ជីបោះឆ្នោតក្រោយថ្ងៃទី ០១ ខែធ្នូ ឆ្នាំ ២០១៦ ដើម្បីសម្រេចបញ្ចូលឈ្មោះទៅក្នុងបញ្ជី ឈ្មោះបោះឆ្នោត។ លោក ម៉ៅ សុភារិទ្ធ អគ្គលេខាធិការរង គ.ជ.ប ថ្លែងថា ការពិនិត្យផ្ទៀងផ្ទាត់នេះ ដើម្បីធានាសិទ្ធិរបស់អ្នកដែលបានចុះឈ្មោះហើយ ឱ្យមានឈ្មោះក្នុងបញ្ជីឈ្មោះបោះឆ្នោត។ កញ្ញា ឆេង ណាតា រាយការណ៍៖
លោក ម៉ៅ សុភារិទ្ធ អគ្គលេខាធិការរង គ.ជ.ប បានថ្លែងថា ការសម្រេចបញ្ចូលឈ្មោះទាំងជាង ២ ពាន់នាក់នោះ នឹងធ្វើឡើងបន្ទាប់ពី គ.ជ.ប ផ្ទៀងផ្ទាត់ឈ្មោះទិន្នន័យអ្នកចុះឈ្មោះបោះឆ្នោតរួច។
លោកបានឱ្យដឹងថា ចំនួនឈ្មោះប្រជាពលរដ្ឋ ២,៣១៨នាក់ ដែលនឹងត្រៀមបញ្ចូលនេះ គឺបានចុះឈ្មោះពិតប្រាកដហើយ តាមកាលបរិច្ឆេទដែល គ.ជ.ប បានកំណត់ពីថ្ងៃទី០១ កញ្ញា ដល់ថ្ងៃទី៣០ វិច្ឆិកា ប៉ុន្តែគ្រាន់តែឈ្មោះជាង ២ ពាន់នេះ ក.ជ.ប ទើបតែបញ្ជូនមកក្រោយថ្ងៃដែល គ.ជ.ប ប្រកាសលទ្ធផលបណ្តោះអាសន្ននៅថ្ងៃទី ០១ ខែធ្នូ ឆ្នាំ ២០១៦ ប៉ុណ្ណោះ។
លោកបន្តថា មូលហេតុដែលបញ្ជូនមកយឺតនេះ ដោយសារប្រព័ន្ធសេវាអ៊ិនធើណេតខ្សោយ តំបន់ខ្លះទៀតនៅដាច់ស្រយាលផ្លូវលំបាក ទើបធ្វើឱ្យការបញ្ជូនទិន្នន័យមកមានភាពរអាក់រអួល និងយឺតពេល។
ការត្រួតពិនិត្យផ្ទៀតផ្ទាត់ទិន្នន័យ អ្នកចុះឈ្មោះបោះឆ្នោតជាង ២ ពាន់នាក់នេះ មានការចូលរួមឃ្លាំមើលពីតំណាងគណបក្សនយោបាយ ម្ចាស់ជំនួយ និងអង្គការសង្គមស៊ីវិល។ ប៉ុន្តែយ៉ាងណាមិញ ការផ្ទៀងផ្ទាត់មិនបានធ្វើទាំងអស់នោះទេ ជ្រើសរើសតែ ១៨ ឈ្មោះមកពិនិត្យផ្ទៀងផ្ទាត់ប៉ុណ្ណោះការិយាល័យដែល បញ្ជូនឈ្មោះមកក្រោយថ្ងៃទី ០១ ធ្នូ មានចំនួន ៥១៧ ការិយាល័យ នៅក្នុងខេត្តចំនួន ១២ គឺបន្ទាយមានជ័យចំនួន ១០,៤០ នាក់ កំពង់ចាម ២៨០នាក់ កំពង់ឆ្នាំង ២១២ នាក់ កំពង់ធំ ៣៩ នាក់ កំពត ៤ នាក់ កោះកុង ១៨នាក់ ក្រចេះ ២ នាក់ ព្រះវិហារ ៦៣ នាក់ ព្រៃវែង ៣ នាក់ រតនគិរី ៧១ នាក់ សៀមរាប ២៤នាក់ តាកែវ ៥៦១ នាក់ និងត្បូងឃ្មុំ ចំនួន ១ នាក់។
អ្នកស្រីចង់ឱ្យមានការផ្ទៀងផ្ទាត់ឈ្មោះទាំងអស់ ដើម្បីធានានូវតម្លាភាព នឹងភាពត្រឹមត្រូវនៃបញ្ជីឈ្មោះបោះឆ្នោតដែលនឹងបិទផ្សាយនៅពេលខាងមុខ។
តែយ៉ាងណាមិញ អ្នកស្រីមិនទាន់បង្ហាញជំហរមិនគាំទ្រ ឬ គាំទ្រ ចំពោះការដាក់បញ្ចូលឈ្មោះទាំងជាង ២ ពាន់នាក់នោះ ទៅក្នុងបញ្ជីឈ្មោះបោះឆ្នោត ឬយ៉ាងណានោះទេ។ អ្នកស្រីថា បើពួកគាត់ពិតជាបានចុះឈ្មោះពិតប្រាកដមែន ពួកគាត់ត្រូវតែទទួលបានសិទ្ធិក្នុងបញ្ជីឈ្មោះ និងមានសិទ្ធិបោះឆ្នោត។
អ្នកស្រីស្នើឱ្យ គ.ជ.ប ផ្តល់បញ្ជីឈ្មោះទាំងជាង ២ ពាន់នាក់នោះ ដើម្បីគណបក្សសង្គ្រោះជាតិយកទៅផ្ទៀងផ្ទាត់ជាមួយភ្នាក់ងារគណបក្សនៅតាមការិយាល័យនីមួយៗ។
វិទ្យុស្រី្តមិនអាចសុំការយល់ឃើញ ពីតំណាងគណបក្សប្រជាជនកម្ពុជាដែលចូលរួមឃ្លាំមើលការផ្ទៀងផ្ទាត់នៅថ្ងៃនេះបានទេ។
សូមជម្រាបថា លទ្ធផលបណ្តោះអាសន្ននៃការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មី ឆ្នាំ២០១៦ ដែល គ.ជ.ប បានប្រកាសកាលពីថ្ងៃទី ០១ ធ្នូ ឆ្នាំ ២០១៦ ចំនួនអ្នកដែលបានមកចុះឈ្មោះបោះឆ្នោត ៧,៨៧៣,១៩៤នាក់ ស្មើនឹង ៨១.៤៧ ភាគរយ៕
