ភ្នំពេញ៖ តាមការចុះផ្សាយ ជាសាធារណៈ របស់ក្រសួងវប្បធម៌និងវិចិត្រសិល្បៈកម្មវិធីសម្តែងរបាំបុរាណ និង ល្ខោនខោលធ្វើឡើងរយៈពេល២ថ្ងៃ ហើយប្រព្រឹត្តទៅនៅសាលមហោស្រពចតុមុខ។ តាមការផ្សព្វផ្សាយដំណឹងនេះ គឺកម្មវិធីដឹកនាំដោយសម្ដេចព្រះរាជបុត្រីព្រះនាម នរោតម្តបុប្ផាទេវី ដែលសព្វព្រះទ័យ បំពេញព្រះរាជកិច្ចដឹកនាំព្រឹត្តិការណ៍នេះ។
តាមសេចក្ដីជូនដំណឹងដដែល ព្រឹត្តិការណ៍នេះក្រោមប្រធានបទ៖«ប្រវត្តិមួយសតវត្សរ៍នៃរបាំព្រះរាជទ្រព្យខ្មែរ-១៩០៦ ២០១៦»។កម្មវិធីនឹងចាប់ផ្តើមពីម៉ោង ៦និង ៣០នាទីគឺទាំង២រាត្រី ពីរវាងថ្ងៃទី១៦ និងថ្ងៃទី១៧ធ្នូ។
បើតាមអ្នកលក់សំបុត្រ នៅពេលនេះសំបុត្របានលក់ដាច់អស់ហើយគឺទាំង២រាត្រី។ សំបុត្រ លក់ក្នុងតម្លៃ ១០០០០រៀល សម្រាប់សិស្ស និស្សិត និង ២០០០០រៀលដល់ ១០០០០០ រៀលសម្រាប់សារធារណៈជន។
របាំព្រះរាជទ្រព្យខ្មែរបាន ចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី ០៧ ខែ វិច្ឆិកា ឆ្នាំ ២០០៣៕
