ភ្នំពេញ៖ ម្ដាយអ្នកស្រី ទេព វន្នី គឺអ្នកស្រី ស៊ី ហៀប បានប្រាប់អ្នកសារព័ត៌មាននៅមុខតុលាការក្រុងភ្នំពេញនៅថ្ងៃ សុក្រ ទី ១៦ ធ្នូ នេះថា កូនស្រីរបស់អ្នកស្រីគឺជាស្ដ្រីទន់ខ្សោយមួយរូបដែលមិនបានប្រព្រឹត្ដហិង្សាទៅលើអ្នកណាម្នាក់ ដូចការចោទប្រកាន់របស់តុលាការនោះទេ។
អ្នកស្រី ស៊ី ហៀប បានសុំឲ្យអាជ្ញាធរឈរលើគោលការណ៍អព្យាក្រឹត្យរកយុត្ដិធម៌ជូនកូនអ្នកស្រីផង។ ករណីនេះសង្គមស៊ីវិលលើកឡើងថា រាជរដ្ឋាភិបាលត្រូវតែដោះលែងអ្នកស្រី ទេព វន្នី ឲ្យមានសេរីភាពឡើងវិញ ឲ្យស្របតាមការអះអាងរបស់ខ្លួនដែលតែងតែនិយាយថា លើកកម្ពស់សិទ្ធិស្ដ្រីក្នុងសង្គមកម្ពុជា។ លោក លៀ ស៊ីណា រាយការណ៍៖
បន្ទាប់ពីតុលាការក្រុងភ្នំពេញ សម្រេចផ្ដន្ទាទោសដាក់ពន្ធនាគារអ្នកស្រី ទេព វន្នី ដែលជាស្ដ្រីឆ្នើមក្នុងការចេញតវ៉ាទាមទារយុត្ដិធម៌សង្គម រយៈពេល ៦ខែ និង ៦ថ្ងៃ ក្នុងរឿងក្ដីពីរដាច់ដោយឡែកពីគ្នារួចមក នៅថ្ងៃ សុក្រ ទី ១៦ ធ្នូ នេះ ខណៈតុលាការកំពុងសាកសួរបន្ថែមលើសំណុំរឿងរបស់អ្នកស្រី ក្រុមស្ដ្រីបឹងកក់ដែលមានគ្នាប្រមាណ ៥០នាក់ បាននាំគ្នាទៅស្រែកតវ៉ា ទាមទារឲ្យតុលាការក្រុងភ្នំពេញដោះលែងអ្នកស្រី ទេព វន្នី ឲ្យមានសេរីភាពឡើងវិញ។
នេះជាសំឡេងនៃការស្រែកទាមទាររបស់ក្រុមស្ដ្រីបឹងកក់ ដែលក្នុងចំណោមអ្នកទាំងអស់នោះគេសង្កេតឃើញមានស្ដ្រីវ័យចំណាស់ពីររូប មួយរូបគឺលោកយាយ ង៉ែត ឃុន ហៅ យាយ ម៉ាមី និងម្នាក់ទៀតគឺម្ដាយបង្កើតរបស់អ្នកស្រី ទេព វន្នី គឺអ្នកស្រី ស៊ី ហៀប។ ស្ត្រីទាំង២រូបនេះ មួយរូបមានវ័យប្រមាណជិត ៧០ឆ្នាំ និងមួយរូបទៀតមានវ័យជាង ៧០ឆ្នាំ។ពួកគាត់រូបរាងស្គមស្គាំង ដោយបានបញ្ចេញសំឡេងខ្សាវៗនៅខាងមុខតុលាការ ដោយសុំឲ្យដោះលែងកូនរបស់អ្នកស្រីត្រឡប់មកវិញ។
អ្នកស្រី ស៊ី ហៀប បានថ្លែងប្រាប់អ្នកសារព័ត៌មាននៅខាងមុខតុលាការក្រុងភ្នំពេញថា ការចោទប្រកាន់របស់តុលាការលើកូនអ្នកស្រីគឺមិនមែនជាការពិត ព្រោះកូនអ្នកស្រីជាស្ដ្រីទន់ខ្សោយមិនអាច ប្រើហិង្សាទៅលើសមត្ថកិច្ចឡើយ។
អ្នកស្រី ស៊ី ហៀប៖«កូនខ្ញុំអត់មានខុសអីសោះ នេះគឺជាការគេចោទប្រកាន់កូនខ្ញុំទាំងស្រុងហ្មង កូនខ្ញុំមិនដែលប្រព្រឹត្ដវ៉ៃអ្នកណា ទៅប្រើអំពើហិង្សាលើអ្នកណាក៏គ្មានដែរ តុលាការគេចោទប្រកាន់កូនខ្ញុំទាំងគ្មានភស្ដុតាង សុំឲ្យតុលាការរកយុត្ដិធម៌ឲ្យកូនខ្ញុំផង»។
ករណីចាប់ខ្លួនអ្នកស្រី ទេព វន្នី ដាក់ពន្ធនាគារនេះដែរ គេសង្កេតឃើញអ្នកលេងបណ្ដាញសង្គមជាច្រើនបញ្ចេញមតិយោបល់ដោយបង្ហាញការមិនពេញចិត្ដ ចំពោះការចាប់ខ្លួនស្ដ្រីអ្នកតវ៉ារឿងដីធ្លីដាក់គុកដូចនេះ។ ពួកគេបានរៀបរាប់ថា ការចាប់ខ្លួនអ្នកស្រី ទេព វន្នី ដាក់គុកម្នាក់ គឺប្រៀបដូចជាដាក់គុកមនុស្សបីនាក់ទៀតដែលជាគ្រួសាររបស់អ្នកស្រី មានដូចជាម្ដាយរបស់អ្នកស្រី ទេព វន្នី និងកូនប្រុសស្រីទាំងពីរដែលប្រឈមនឹងការបោះបង់ការសិក្សា ខណៈម្ដាយកំពុងត្រូវឃុំខ្លួន។
ក្នុងព្រឹត្ដការណ៍តវ៉ារបស់ក្រុមស្ដ្រីបឹងកក់ដែលទាមទារឲ្យមានការដោះលែងអ្នកស្រី ទេព វន្នី លោកយាយ ង៉ែត ឃុន និយាយថា ការចាប់ខ្លួនអ្នកស្រី ទេព វន្នី ដាក់ពន្ធនាគារ គឺជារឿងអយុត្ដិធម៌បំផុតដែលធ្វើចំពោះពលរដ្ឋក្រីក្រ។បន្ថែមពីនេះលោកយាយបន្ថែមថា ព្រោះតែអ្នកស្រី ទេព វន្នី ហ៊ានចេញមុខតស៊ូជាមួយពួកអ្នក ដែលរំលោភយកដីប្រជាពលរដ្ឋទើបបានជាគេចាប់អ្នកស្រីដាក់គុក ដូចនេះគឺដើម្បីកុំឲ្យមានអ្នកប្រឆាំងការរំលោភយកដីរបស់ពួកគេទៀត។
លោកយាយ ង៉ែត ឃុន៖«ដោយសារអ្នកស្រី ទេព វន្នី ការពារប្រជាពលរដ្ឋមិនឲ្យពួកចោរប្លន់ដី (រំលោភយកដីបាន) បានជាចាប់អ្នកស្រី ទេព វន្នី យកមកដាក់ពន្ធនាគារ»។
ជាមួយគ្នានេះអ្នកស្រី បូវ សោភា ដែលជាសកម្មជនស្ដ្រីបឹងកក់ដែរនោះយល់ថា ព្រោះតែតុលាការស្ថិតក្រោមឥទ្ធិពលអ្នកមានអំណាច និងគំនាបនយោបាយ ទើបរហូតមកដល់ពេលនេះអ្នកស្រី ទេព វន្នី នៅតែគ្មានពន្លឺនៃសេរីភាពហើយក៏ត្រូវយកមកកាត់ទោសតាមបណ្ដឹងអ្នកមានលុយមានអំណាចជាបន្ដបន្ទាប់។អ្នកស្រី បូវ សោភា បន្តថា ថ្វីបើជម្លោះដីធ្លីនៅតំបន់បឹងកក់ត្រូវបានដោះស្រាយមែន ក៏ប៉ុន្ដែក្រុមស្ដ្រីបឹងកក់គឺនៅតែប្រឈមនឹងប្រព័ន្ធតុលាការមួយដែលគ្មានឯករាជ្យ នៅចាំបំភ័យពលរដ្ឋមិនឲ្យហ៊ានចូលរួមតវ៉ារឿងអយុត្ដិធម៌សង្គមបន្ដទៀត។
អ្នកស្រី បូវ សោភា៖«បើទោះបីមានការដោះស្រាយដីធ្លីមែន ប៉ុន្ដែពួកយើងមិនអាចរត់គេចប្រព័ន្ធតុលាការមួយដែលស្ថិតនៅក្រោមអ្នកមានអំណាចមានលុយ (ឡៅ ប៊ុនធីន នោះទេ) គឺជារូបភាពមួយចង់បំភ័យចង់បន្លាចពលរដ្ឋមិនឲ្យហ៊ានតវ៉ាហ៊ានស៊ូនិងរឿងអយុត្ដិធម៌សង្គម»។
យ៉ាងណាក៏ដោយជុំវិញករណីអ្នកស្រី ទេព វន្នី ដែលជាស្ដ្រីមួយរូបបានចូលរួមសកម្មភាពសង្គម យ៉ាងសកម្មកំពុងជាប់ពន្ធនាគារ ដែលរហូតមកដល់ពេលនេះគ្មានសញ្ញាពីនៃអនាគតនៃសេរីភាព តែបែរជាមានបណ្ដឹងច្រើនឡើងជុំជិតខ្លួនបន្ថែមដូចនេះ ត្រូវបានអង្គការសង្គមស៊ីវិល សម្ដែងក្ដីសោកស្ដាយជាពន់ពេកចំពោះរាជរដ្ឋាភិបាលដែលហាក់មិនបានអើពើចំពោះស្ដ្រីដែលចូលរួមក្នុងសង្គម។
លោក ស្រី ធីតាឃឹះ នាយិកាអង្គការសីលការ ដែលធ្វើការងារលើការលើកកម្ពុស់សិទ្ធិស្ដ្រីក្នុងវិស័យនយោបាយ បានមានប្រសាសន៍តាមរយៈបទសម្ភាសន៍ជាមួយវិទ្យុស្ដ្រីអេហ្វអឹម ១០២ កាលពីថ្មីៗនេះថា លោកស្រីសោកស្ដាយជាខ្លាំងដែលអ្នកនយោបាយ មិនបានពិចារណាពីការដោះលែងអ្នកស្រី ទេព វន្នី ឲ្យមានសេរីភាពឡើងវិញ។ លោកស្រីបន្ដថា ការចាប់សកម្មជនដីធ្លីដែលជាស្ដ្រីដាក់គុក ដូចនេះគឺនឹងធ្វើឲ្យស្ដ្រីដទៃទៀតកាន់តែមានភាពភ័យខ្លាច ហើយមិនហ៊ានចូលរួមកិច្ចការសង្គម ដែលលោកស្រីថា រដ្ឋាភិបាលគួរតែធ្វើការងារឲ្យស្របតាមយន្ដការរបស់ខ្លួន ដែលមានបំណងចង់លើកម្ពស់សិទ្ធិស្ដ្រីក្នុងសង្គមខ្មែរ។
ដូចគ្នាដែរលោក មឿន តុលា នាយកប្រតិបត្ដិនៃមជ្ឈមណ្ឌលសម្ព័ន្ធភាពការងារ និង សិទ្ធមនុស្ស ហៅកាត់ថា សង់ត្រាល មានប្រសាសន៍ដោយក្ដីសោកស្ដាយថា កន្លងមករដ្ឋាភិបាលបានអះអាងពីគោលនយោបាយ របស់ខ្លួនដែលនឹងលើកម្ពស់សិទ្ធិស្ដ្រីក្នុងសង្គមកម្ពុជា ឲ្យកាន់តែខ្លាំងក៏ប៉ុន្ដែបែរជាបណ្ដោយឲ្យស្ដ្រីមួយរូបដែលហ៊ានលះបង់គ្រប់យ៉ាងដើម្បីចូលរួមក្នុងសង្គមជាប់ពន្ធនាគារ ដោយមិនបានបង្ហាញពីអនាគតនៃសេរីភាពរបស់គាត់ទៅវិញ។
អ្នកស្រី ទេព វន្នី កាលពីពេលកន្លងទៅនេះត្រូវបានតុលាការក្រុងភ្នំពេញ សម្រេចផ្ដន្ទាទោសដាក់ពន្ធនាគាររយៈពេល ៦ខែ និង ៦ថ្ងៃក្នុងរឿងក្ដីពីរដាច់ដោយឡែកពីគ្នា រួមមាន បទជេរប្រមាថ និងប្រឆាំងអ្នករាជការសាធារណៈ និងរឿងក្ដីមួយទៀត គឺការធ្វើយុទ្ធនាការថ្ងៃច័ន្ទពណ៌ខ្មៅ។ អ្នកស្រី ទេព វន្នី កន្លងមកត្រូវបានអាជ្ញាធរ ចាប់ដាក់ពន្ធនាគារចំនួន៣ លើកមកហើយ ដែលការចាប់ខ្លួនអ្នកស្រី គឺធ្វើឡើងលើកទីមួយនៅក្នុងឆ្នាំ២០១២ ដែលត្រូវឃុំខ្លួនអស់រយៈពេល ១ខែ ៣ថ្ងៃ។ លើកទី២ គឺនៅឆ្នាំ២០១៤ ដែលកាលនោះត្រូវបានឃុំខ្លួនអស់រយៈពេល ៥ខែ ១ថ្ងៃ និងការឃុំខ្លួនលើកនេះគឺជាលើកទី៣ ដែលរហូតមកដល់ពេលនេះគឺមានរយៈពេលជាង ៣ខែហើយគិតដល់ថ្ងៃទី 16 ខែធ្នូ នេះ។
អ្នកស្រី ទេព វន្នី ធ្លាប់បានទទួលពានរង្វាន់ជាច្រើន ក្នុងនោះមាន ពានរង្វាន់ដ៏ធំមួយ ពីសហរដ្ឋអាមេរិក ជាពានរង្វាន់ស្ត្រីជាមេដឹកនាំ៕
