សហរដ្ឋអាមេរិកសម្រេចព្យួរជំនួយជាកញ្ចប់ សម្រាប់ប្រទេសហ្វីលីពីនដោយសារតែ ទីក្រុងវ៉ាស៊ីនតោន ព្រួយបារម្ភអំពីការរំលោភសិទ្ធិមនុស្ស និងការអនុវត្តច្បាប់ ប៉ះពាល់ដល់សិទ្ធិមនុស្សធ្ងន់ធ្ងរក្រោមការដឹកនាំរបស់ ប្រធានាធិបតី រ៉ូឌ្រីហ្គូ ឌូទើតេ។
លោកស្រី ម៉ូលី ហ្គោស៊ីណា បាននិយាយថា ប្រទេសហ្វីលីពីន បានបាត់បង់គុណភាពនិងតម្លៃរបស់ខ្លួន ដើម្បីទទួលជំនួយសហរដ្ឋអាមេរិក ដោយសារតែប្រទេសនេះដែលមានមេដឹកនាំថ្មី ឌូទើតេ បានរំលោភសិទ្ធិមនុស្ស។
ជំនួយសហរដ្ឋអាមេរិករយៈពេល ៥ឆ្នាំ ដែលគេហៅថា ជាជំនួយកញ្ចប់សម្រាប់ប្រទេសហ្វីលីពីន មានតម្លៃជាទឹកប្រាក់ ៤៣៣លាន៩សែនដុល្លារ បានត្រូវព្យួរទាំងស្រុង។ អ្វីដែលនាំអោយមានការព្យួរជំនួយសម្រាប់ប្រទេសហ្វីលីពីន ដោយសារតែប្រទេសនេះ ត្រូវបានអាមេរិកមើលឃើញថា មិនអាចអនុវត្តបានអភិបាលកិច្ចប្រជាធិបតេយ្យ និងសេរីភាពសេដ្ឋកិច្ចឡើយ។
អាមេរិកបានថ្កោលទោសយ៉ាងខ្លាំងចំពោះប្រធានាធិបតី ឌូទើតេ ដែលបានសម្លាប់មនុស្សក្រៅប្រព័ន្ធតុលាការ ជាង៥ពាន់នាក់ ករណីបោសសំអាតគ្រឿងញៀនដែលអាមេរិកចាត់ទុកថា បានរំលោភបំពានសិទ្ធិមនុស្សយ៉ាងធ្ងន់ធ្ងរ។
ប្រទេសនៅអាស៊ីដែលទទួលជំនួយរបស់អាមេរិកសម្រាប់ឆ្នាំ ២០១៧ គឺ ប្រទេសសីរីលង្កា តែមួយគត់ ហើយក្រៅពីនោះ ស្ថិតនៅក្នុងការពិចារណានៅឡើយ៕ប្រភព:AFP
