ភ្នំពេញ ៖ លោក Manny Pacquiao ស្តេចប្រដាល់កីឡាពិភពលោកនៃប្រទេសហ្វីលីពីន ដែលមកទស្សនកិច្ចនៅកម្ពុជា ជាមួយប្រធានាធិបតីលោក រ៉ូឌ្រីហ្គោ ឌូតឺតេ បានប្រកាសថា លោកនឹងជួយពង្រឹងដល់វិស័យប្រដាល់កម្ពុជាឱ្យកាន់តែប្រសើរឡើងជាងមុន។
នេះបើតាមការលើកឡើងរបស់លោក ថោង ខុន បានបញ្ជាក់ដល់ក្រុមសារព័ត៌មាន។
លោក Manny Pacquiao ដែលជាអ្នកប្រដាល់ល្បីឈ្មោះក្នុងពិភពលោក និងជាសមាជិកព្រឹទ្ធសភានៃប្រទេសហ្វីលីពិន បានឱ្យដឹងថា លោកនឹងផ្តល់ការបង្ហាត់បង្រៀន និង បច្ចេកទេសជួយដល់សហព័ន្ធប្រដាល់កម្ពុជា។
បើតាមលោក ថោង ខុន លោក Manny Pacquiao នឹងមកកាន់កម្ពុជាម្តងទៀត ដែលអាចនៅឆ្នាំក្រោយ នូវពេលវេលាសមគួរណាមួយរបស់លោកតាមការសន្យា។
ចំណែកប្រធានគណៈកម្មការជាតិអូឡាំពិកកម្ពុជា ក៏បានបង្ហើបផងដែរថា Manny Pacquiao ក៏នឹងមកកម្ពុជាទៀត ក្នុងការជួយផ្តល់នូវចំណេះដឹងនិងបច្ចេកទេសសម្រាប់កម្ពុជាដែលនឹងជាម្ចាស់ផ្ទះ Sea Game ២០២៣៕
