ស្ថានទូតសហរដ្ឋអាមេរិកប្រចាំនៅទីក្រុង Yangon បានសម្ដែងការសោកស្ដាយចំពោះអំពើហិង្សាកាន់តែធ្ងន់ធ្ងរទៅលើជនជាតិដើមភាគតិចភូមា នៅរដ្ឋ Kachin និងរដ្ឋ Shanដែលបង្ខំឱ្យពលរដ្ឋភៀសខ្លួនជាច្រើនពាន់នាក់។
សេចក្ដីថ្លែងការណ៍របស់ស្ថានទូតអាមេរិកបានធ្វើឡើងកាលពីថ្ងៃអង្គារ៍ ដោយបានលើកឡើងថា ជម្លោះនៅតែបន្ដ គឺជា ការបំផ្លាញនូវសេចក្ដីសុខ សន្ដិភាព និងអាយុជីវិតរបស់ប្រជាជន ហើយបន្ថែមលើនេះទៀត ប៉ះពាល់ដល់ជនស៊ីវិលរាប់ពាន់ម៉ឺននាក់។ សេចក្ដីថ្លែងការណ៍របស់ស្ថានទូតអាមេរិកបន្ដថា ៖ « យើងសូមបន្ដអំពាវនាវ ឱ្យបញ្ឈប់ការវាយប្រយុទ្ធគ្នា ដោយភាគីពាក់ព័ន្ធទាំងអស់ ត្រូវគិតដល់សិទ្ធិសេរីភាពមនុស្សជាតិ ដែលកំពុងរងគ្រោះដោយសារតែជម្លោះប្រដាប់អាវុធនេះ»។
ស្ថានទូតអាមេរិក សូមទទូចឱ្យបញ្ឈប់ការប្រយុទ្ធគ្នាក្រោមកិច្ចព្រមព្រៀងឈប់បាញ់មួយហើយឆ្ពោះទៅរកការចរចា ដើម្បីសន្ដិភាពយូរអង្វែង។ ការវាយប្រយុទ្ធគ្នារវាងកងទ័ពរដ្ឋាភិបាលភូមា និងពួកឧទ្ទាម នៅរដ្ឋ Shan និងរដ្ឋ Kachin កើតមានជាច្រើនទស្សវត្សរ៍ ទៅហើយដែលបណ្ដាលឱ្យមានជនភៀសខ្លួនរាប់ម៉ឺននាក់។ គោលបំណងនៃជម្លោះនេះ ដោយសារតែជនជាតិដើមភាគតិច ទាមទារបំបែករដ្ឋ៕ ប្រភព: The Nation
