ភ្នំពេញ៖ប្រធានាធិបតីហ្វីលីពីន Rodrigo Duterte និងកីឡាប្រដាល់ល្បីឈ្មោះពេញពិភពលោក លោកម៉ែននី ប៉ា គី អៅ បានមកដល់ប្រទេសកម្ពុជានៅថ្ងៃទី ១៣ ធ្នូ នេះ នៅវេលាម៉ោងជាង៦ល្ងាចនេះ។
សេចក្ដីជូនដំណឹងរបស់ក្រសួងការបរទេសហ្វីលីពីន បញ្ជាក់ថា ទស្សនកិច្ចរបស់លោកRodrigo Duterte គឺតបតាមការអញ្ជើញរបស់ព្រះមហាក្សត្រខ្មែរ។ តាមរូបដែលបានផ្សាយបន្តផ្ទាល់ពីអាកាសយន្តដ្ឋានអន្តរជាតិភ្នំពេញ ដោយគេហទំព័រមួយ ស្និទ្ធនឹងរដ្ឋាភិបាលកម្ពុជា ឲ្យដឹងថាលោកប្រធានាធិបតីហ្វីលិពីន Rodrigo Duterte និងកីឡាប្រដាល់ល្បីឈ្មោះពេញពិភព លោក ម៉ែននី ប៉ា គី អៅ បានមកដល់កម្ពុជាតាមរយៈជើងយន្តហោះរបស់ហ្វីលីពីនផ្ទាល់ ហើយមានសម្ដេច គង់ សំអុល រដ្ឋមន្ត្រីព្រះបរមរាជវាំងទៅទទួល លោក Duterte។
នៅថ្ងៃបន្ទាប់គឺថ្ងៃទី១៤ ខែធ្នូ ពេលព្រឹកលោក រ៉ូឌ្រីហ្គោ ឌូតឺតេ នឹងចូលជួបបង្គំគាល់ ព្រះមហាក្សត្រខ្មែរ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ហើយនៅថ្ងៃដដែលវេលារសៀលលោក ឌូតឺតេ នឹងចូលជួបសំណេះសំណាលការងារជាមួយសម្តេច ហ៊ុន សែន នៅវិមានសន្តិភាពផងដែរ។
នៅពេលស្នាក់នៅបានមួយយប់ នៅប្រទេសកម្ពុជា លោក Duterte នឹងជួបសំណេះសំណាល់ជាមួយពលរដ្ឋរបស់លោកដែលមានការងារធ្វើផ្សេងៗក្នុងរាជធានីភ្នំពេញ។
បន្ថែមពីនេះបើតាមការឲ្យដឹង ប្រធានាធិបតីហ្វីលីពិន នឹងចាកចេញពីប្រទេសកម្ពុជា នៅវេលាម៉ោង ៩ នឹង ៣០នាទីយប់ នៅ ថ្ងៃទី១៤ ខែធ្នូ ឆ្នាំ២០១៦ ដើម្បីបន្ដដំណើឆ្ពោះទៅប្រទេសសិង្ហបុរីជាបន្ដទៀត។
សូមជម្រាបថា លោក Rodrigo Duterte បានឡើងកាន់អំណាចជាប្រធានាធិបតីហ្វីលីពីនមិនទាន់បានមួយឆ្នាំនោះទេ តែលោកហាក់ទទួលបានការចាប់អារម្មណ៍ពីអន្តរជាតិជាច្រើន ពិសេសលើទំព័រសារ ព័ត៌មានអន្តរជាតិធំៗមួយចំនួន។ អ្វីដែលធ្វើឲ្យលោក Duterte ត្រូវគេកត់សម្គាល់នោះ គឺនយោបា យបោសសំអាតគ្រឿងញៀនរបស់លោក ដែលបានសម្លាប់អ្នកពាក់ព័ន្ធក្នុងការប្រើប្រាស់ និងជួញដូរគ្រឿងញៀនរហូតមកទល់ពេលមានមនុស្សដែលត្រូវបានសម្លាប់គឺមានជា ៤ ពាន់នាក់។
យុទ្ធនាការបោសសំអាតគ្រឿងញៀនរបស់លោក Duterte ទទួលបានទាំងការរិះគន់ និងការកោតសរ សើរផងដែរ។ អង្គការសហប្រជាជាតិផ្នែកសិទ្ធិមនុស្ស និងសហរដ្ឋអាមេរិក បានថ្កោលទោសយ៉ាងខ្លាំងទៅលើយុទ្ធនាការនេះ ដោយចោទថា សកម្មភាពសម្លាប់ រង្គាលលើអ្នកពាក់ព័ន្ធគ្រឿងញៀននៅហ្វីលីពីន គឺបានរំលោភបំពានយ៉ាងធ្ងន់ធ្ងរលើសិទ្ធិមនុស្ស៕
