ភ្នំពេញ ៖ មន្ដ្រីការពារសិទ្ធិមនុស្សសមាគមអាដហុកនិយាយថាពួកគាត់កំពុងរង់ចាំការផ្ដល់ឱ្យមានសេរីភាពឡើងវិញដែល ថា សេរីភាពរបស់ពួកគាត់នឹងកើតមានតាម រយៈដំណោះស្រាយនយោបាយ រវាង លោក កឹម សុខា និងលោកនាយករដ្ឋមន្ដ្រី ហ៊ុន សែន។
លោក ឡុង រី តំណាងរាស្ដ្រគណបក្សសង្គ្រោះជាតិ បានថ្លែងដូចនេះ បន្ទាប់ពី ប្រតិភូគណបក្សសង្គ្រោះជាតិ បានចុះទៅសួរសុខទុក្ខ មន្ដ្រីការពារសិទ្ធិមនុស្សសមាគមអាដហុក ដែលរួមមានលោកស្រី លឹម មុនី លោក នី សុខា លោក យី សុខ សាន្ដ លោក ណៃ វង់ដា និងសកម្មដីធ្លី អ្នកស្រី ទេព វន្នី។
ការសួរសុខទុក្ខរបស់ប្រតិភូគណបក្សសង្គ្រោះជាតិដែលដឹកនាំដោយ លោក កឹម សុខា នៅរសៀល ថ្ងៃទី១២ធ្នូ ឆ្នាំ២០១៦ ក្នុងនោះមាន លោក ឡុង រី ម្នាកផងដែរ។
លោក ឡុង រី បានបញ្ជាក់ប្រាប់អ្នកសារព័ត៌មានបន្ថែមដូចនេះ ៖ «ទាំងអស់គ្នាគាត់ស្វាគមន៍ក្នុងការជជែកគ្នាជាមួយប្រមុខរដ្ឋាភិបាល ហើយក៏រង់ចាំ រង់ចាំដំណោះស្រាយនឹងយ៉ាងអន្ទះសារ ។ ចឹងខ្ញុំសង្ឃឹមយ៉ាងមុតមាំ សំនូមពររបស់គាត់ ក៏ដូចជាសំនូមពរបងប្អូនខ្មែរទូទាំងប្រទេសដែរ ព្រោះចង់ឃើញអោយមានការដោះស្រាយបញ្ហាជាតិធំៗ ជាពិសេសទាក់ទងនិងបញ្ហាអ្នកទោសទាំងអស់នេះ បា៎ទ»។
ជាការឆ្លើយតបចំពោះការទន្ទឹងរង់ចាំរបស់មន្ដ្រីសមាគមអាដហុកនេះដែរ លោក សុខ ឥសាន្ដ អ្នកនាំពាក្យគណបក្សប្រជាជនកម្ពុជាបានផ្ដល់បទសម្ភាសន៍ខ្លីឱ្យវិទ្យុស្ដ្រីដឹងថា លោកក៏មិនទាន់ដឹងខ្លឹមសារច្បាស់អំពីរឿងនេះដែរ ។ប៉ុន្ដែលោកគ្រាន់តែដឹងថា ការជួបគ្នារវាងលោក កឹម សុខា និងសម្ដេច ស ខេង កន្លងមកអាចនឹងមានការដោះលែង មន្ដ្រីការពារសិទ្ធិមនុស្សអាដហុក នៅចុងខែធ្នូនេះ។
លោក សុខ ឥសាន្ដ៖ «ឥលូវយើងចាំមើលទាំងអស់គ្នាថាតើវាមានព្រឹត្តិការណ៍នឹងកើតឡើងដូចដែរប្រមុខដឹកនាំគណបក្សទាំងពីរបានជួបគ្នាពីថ្ងៃ០៧ ប្រជុំសភានឹងគឺបានពិភាក្សាគ្នា ខ្ញុំក៏អត់បានដឹងខ្លឹមសារនឹងដែរ គ្រាន់តែលឺថា សម្ដេចក្រឡោហោម ស ខេង លើកឡើងថា អាចនឹងមានចុងខែនេះ»។
ជុំវិញរឿងនេះដែរ លោក ផៃ ស៊ីផានអ្នកនាំពាក្យទីស្ដីការគគណៈរដ្ឋមន្ដ្រីលើកឡើងថា រឿងនេះស្ថិតនៅលើបុព្វសិទ្ធិរបស់លោកនាយករដ្ឋមន្ដ្រី ហើយការស្នើសុំទៅបានទាល់តែនីតិវិធីតុលាការត្រូវបានបញ្ចប់។
លោក ផៃ ស៊ីផាន ៖ «អ្វីៗជាបុព្វសិទ្ធិរបស់សម្ដេចអគ្គសេនាបនាតីជោហ៊ុន សែន ហើយលោកទទួលបានគោរម្យងារជានាយករដ្ឋមន្ដ្រី ក្នុងការសើសុំព្រះរាជទោសពីព្រះមហាក្សត្រ នឹងជាលក្ខ័ខណ្ឌធំ ហើយលក្ខ័ខណ្ឌនឹងគឺអាចធ្វើទៅបាន ទាល់តែនីតិវិធីតុលាការត្រូវបានបញ្ចប់»។
សូមជម្រាបថា កាលពីថ្ងៃទី០៧ ធ្នូ ឆ្នាំ២០១៦ នៅមន្ទីររដ្ឋសភាសម្ដេច ស ខេង បានថ្លែងប្រាប់អ្នកសារព័ត៌មានថា ជំនួបរបស់លោកជាមួយលោក កឹម សុខា នឹងសម្ដេច ហ៊ុន សែន គឺ ផ្ដោតសំខាន់ទៅលើការដោះលែងមន្ដ្រីការពារសិទ្ធិមនុស្សអាដហុក និងលោក នី ចរិយា អគ្គលេខាធិការរង គ.ជ.ប។ បើតាមប្រសាសន៍របស់សម្ដេច ស ខេង នាពេលនោះ គឺជួបសន្ទនាគ្នារវាងសម្ដេចនាយករដ្ឋមន្ដ្រីហ៊ុន សែន នឹងលោក កឹម សុខា គឺ មន្ដ្រីការពារសិទ្ធិមនុស្សសមាគមអាដហុកបួនរូប រួមនឹងអគ្គលេខាធិការងគជបមួយរូប អាចនឹងត្រូវដោះលែង នៅក្នុងកំឡុងខែធ្នូ ឆ្នាំ២០១៦នេះ ។
មន្ត្រីសិទ្ធិមនុស្ស និងមន្ត្រីគជប ត្រូវបានចាប់ឃុំខ្លួន តាំងពីចុងខែឧសភាឆ្នាំ ២០១៦ ដោយពួកគាត់ត្រូវបានអង្គភាពអំពើពុករលួយ ចោទពីបទសូកប៉ាន់ នាងខុមចាន់តារាទីហៅស្រីមុំ ក្នុងសំណុំរឿង លោក កឹមសុខា ។
អ្នកសង្កេតការណ៍បានចាត់ទុកស្ថានការណ៍នយោបាយ ដែលធូរស្រាលនៅដំណាក់កាលចុងក្រោយនេះ គឺជាសញ្ញាល្អនៃការផ្សះផ្សាជាតិនៃគូបក្សដិបក្ស រវាងអ្នកនយោបាយខ្មែរឡើងវិញ បន្ទាប់ពីលោក កឹម សុខា ត្រូវបានលោកនាយករដ្ឋមន្ដ្រី ហ៊ុន សែន យល់ព្រមថ្វាយលិខិតទៅព្រះមហាក្សត្រលើកលែងទោស៕
