ភ្នំពេញ៖គណបក្សប្រជាជនកម្ពុជាដែលឈ្នះក្នុងការបោះឆ្នោតជាច្រើនអាណត្ដិកន្លងមក នៅថ្ងៃទី ១៧ ១៨ ខែ ធ្នូ ២០១៦ នេះ នឹងបើកសន្និបាតគណៈកម្មាធិការកណ្ដាលរបស់ខ្លួន ក្នុងបំណងដើម្បីរៀបចំផែនការ និងសកម្មភាពសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់នាឆ្នាំ ២០១៧។
លោក សុខ ឥសាន្ដ អ្នកនាំពាក្យគណបក្សប្រជាជនកម្ពុជាមានប្រសាសន៍ឲ្យដឹងតាមរយៈបទសម្ភាសន៍ខ្លីជាមួយវិទ្យុស្ដ្រីអេហ្វអឹម ១០២ នៅថ្ងៃ ចន្ទ ទី ១២ ធ្នូ នេះថា ការបើកសន្និបាតលើកទី ៤០ នៅថ្ងៃទី ១៧ ១៨ ខែ ធ្នូ ចុងសប្ដាហ៍នេះគឺធ្វើយ៉ាងណាសិក្សាលម្អិតពីផែនការយុទ្ធសាស្ដ្រដើម្បីជាគន្លឹះក្នុងការឈ្នះឆ្នោតក្រុមប្រឹក្សាឃុំសង្កាត់ខាងមុខនេះ។ លោក សុខ ឥសាន្ដ៖«ជាទិសដៅរបស់គណៈកម្មាធិការកណ្ដាលលើកទី ៤០ នេះគឺប្រាកដជានឹងមានការដាក់ផែនការនិងពិភាក្សាដើម្បីជម្រុញឆ្ពោះទៅរក ដណ្ដើមជ័យជំនះក្នុងការបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ខាងមុខនេះ»។
បន្ថែមពីនេះអ្នកនាំពាក្យបក្សកាន់អំណាចក៏បញ្ជាក់ផងដែរថា ការបើកសន្និបាតនាពេលខាងមុខនេះក៏ ពិភាក្សានិងវាយតម្លៃលទ្ធផលការងារដែលសម្រេចបានមកហើយនឹងធ្វើយ៉ាងណាកែលម្អចំណុចខ្វះខាតបន្ថែមទៀត។
យ៉ាងណាក៏ដោយមិនថា គណបក្សណាទេឲ្យតែកៀកនឹងការបោះឆ្នោតឈានចូលមកដល់តែងតែរៀបចំសន្និបាតរបស់ខ្លួនដើម្បីដាក់ចេញនូវផែនការយុទ្ធសាស្ដ្រធ្វើយ៉ាងណាដណ្ដើមឲ្យបានការគាំទ្រពីពលរដ្ឋដែលជាម្ចាស់សន្លឹកឆ្នោត។ ក៏ប៉ុន្ដែសម្រាប់គណបក្សកាន់អំណាចសព្វថ្ងៃ គឺត្រូវបានអ្នកវិភាគមើលឃើញថា អាណត្ដិនេះអាចនឹងមិនដូចអាណត្ដិមុនៗទៀតឡើយ ពីព្រោះតែពលរដ្ឋបានមើលឃើញពីការដឹកនាំកន្លងមកគឺមានភាពឆកល្វែងច្រើនជ្រុងណាស់ ដែលជាហេតុអាចនឹងនាំឲ្យបក្សដែលជាម្ចាស់ជ័យជំនះច្រើនអាណត្ដិនេះប្រឈមនឹងការបាត់សម្លេងគាំទ្រ។
យ៉ាងណាសាស្ដ្រាចារ្យវិទ្យាសាស្ដ្រនយោបាយរូបនេះសង្កត់ធ្ងន់ថា បើសិនគណបក្សប្រជាជនកម្ពុជាចង់ស្ដារឡើងវិញនូវទំនុកចិត្ដពីពលរដ្ឋលុះត្រាតែគណបក្សនេះធ្វើយ៉ាងណាពង្រឹងការអនុវត្ដរបស់ខ្លួនឲ្យបានតាមការសន្យាកន្លងមក ដែលមានដូចជាបញ្ហាអយុត្ដិធម៌សង្គម បញ្ហាសិទ្ធិមនុស្ស បញ្ហាសន្ដិសុខសង្គម ហើយជាពិសេសគឺបញ្ហារបស់កសិករដែលកំពុងជួបប្រទះសព្វថ្ងៃ។
សូមជម្រាបថា បើតាមសេចក្ដីជូនដំណឹងរបស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ចាប់ពីថ្ងៃទី០៣ ដល់ថ្ងៃទី ០៥ ខែមីនា ឆ្នាំ២០១៧ គ.ជ.ប នឹងចាប់ទទួលចុះបញ្ជីឈ្មោះបេក្ខជននៃគណបក្សនយោបាយដែលឈរឈ្មោះបោះឆ្នោតក្រុមប្រឹក្សាឃុំសង្កាត់។ ហើយសម្រាប់រយៈពេលនៃការឃោសនាបោះឆ្នោតក្រុមប្រឹក្សាឃុំសង្កាត់ គណៈកម្មាធិការជាតិរៀបចំការបោះឆ្នោតផ្ដល់ពេលវេលាឲ្យគ្រប់គណបក្សនយោបាយរយៈពេល ១៤ ថ្ងៃ គឺចាប់ពីថ្ងៃទី២០ ខែឧសភា ដល់ថ្ងៃទី០២ ខែមិថុនា ឆ្នាំ២០១៧៕
