ភ្នំពេញ៖ ចាប់ពីថ្ងៃទី០៩ ធ្នូ ឆ្នាំ២០១៦នេះ តទៅ ចំពោះអ្នកលក់ដូរ តាមកញ្ច្រែង កញ្ជើ ល្អីតូចតាច នៅទីកន្លែងលក់ដូរ និងទីផ្សារទូទៅ រួមទាំងការលក់ផលិតផលពីដំណាំដាំដុះ ផលពីដំណាំធម្មជាតិ និងការលក់ដូរមានលក្ខណៈបណ្តោះអាសន្ន មិនត្រូវបង់ថ្លៃភាស៊ីទៀតនោះទេ។
នេះបើយោងតាមសារាចរណ៍របស់រដ្ឋាភិបាល ដែលចុះហត្ថលេខា ដោយសម្តេចនាយករដ្ឋមន្ត្រី ហ៊ុន សែន នៅថ្ងៃទី៩ ធ្នូ ឆ្នាំ២០១៦នេះ ដែលបានសម្រេច លុបចោលការបង់ថ្លៃ ចំពោះប្រជាពលរដ្ឋលក់ដូរតាមកញ្ច្រែង កញ្ជើ ល្អី និងអ្នកក្រីក្រ។
សារាចរណ៍ណែនាំនេះ បានឱ្យដឹងបន្តថា ចំពោះប្រជាពលរដ្ឋដែលលក់ដូរក្នុងលក្ខណៈតូចតាចដូចនេះ ត្រូវទទួលបានការអនុគ្រោះ និងការគាំពារ ដូចជាបញ្ឈប់ការបង់ភាស៊ី រាល់ការបង់ថ្លៃទាំងឡាយណាពីកន្លែងលក់ដូរ និងនៅតាមទីផ្សារទាំងអស់ ព្រមទាំងទទួលបានការធានា សន្តិសុខ សុវត្តិភាព អនាម័យ និងបរិស្ថានប្រកបដោយការយកចិត្តទុកដាក់ខ្ពស់របស់អាជ្ញាធរមូលដ្ឋាន។
សារាចរណ៍របស់សម្តេចនាយករដ្ឋមន្ត្រីដដែល បានបញ្ជាក់ថា សាលារាជធានី ខេត្តត្រូវរៀបចំគម្រោង កន្លែងលក់ដូរ ឬផ្សារសម្រាប់អ្នកលក់តាមកញ្ច្រែង កញ្ជើ ល្អី និងអ្នកលក់ដូរក្រីក្រតូចតាច ដូចជា កំណត់គោលការណ៍លើការគ្រប់គ្រងលម្អិត ដើម្បីដាក់ឱ្យអនុវត្តជាបន្ទាន់ និងប្រកបដោយប្រសិទ្ធភាព។ សាលារាជធានី ខេត្តត្រូវរៀបចំឱ្យមានកន្លែងលក់ដូរឱ្យបានច្បាស់លាស់ នៅតាមរាជធានីខេត្ត ក្រុង ស្រុក ខណ្ឌ និងរហូតដល់ឃុំសង្កាត់ ក្នុងករណីមានតម្រូវការចាំបាច់ សម្រាប់ជូនប្រជាពលរដ្ឋដែលលក់ដូរតាមកញ្ច្រែង កញ្ជើ ល្អី និងអ្នកលក់ដូរក្រីក្រតូចតាច ដោយមិនមានការបង់ថ្លៃអ្វីទាំងអស់ចំពោះកន្លែងលក់ដូរនេះ។
ជាមួយគ្នានេះដែរ សាលារាជធានី ខេត្ត អាចផ្សាភ្ជាប់គម្រោងកន្លែងលក់ដូរតូចតាច ជាមួយគ្រោងការវិនិយោគសាធារណៈរបស់ថ្នាក់ក្រោមជាតិ ដោយមិនតម្រូវឱ្យបង់ថ្លៃចំពោះកន្លែងលក់ដូ និងត្រូវធានាផ្នែកសន្តិសុខ សុវត្តិភាព សណ្តាប់ធ្នាប់ អានាម័យ និងបរិស្ថាន៕
