លោក រ៉ឌ្រីហ្គោ ឌូតឺតេ ប្រធានាធិបតីនៃសាធារណៈរដ្ឋហ្វីលីពិន នឹងមកបំពេញទស្សនៈកិច្ចជាផ្លូវរដ្ឋនៅព្រះរាជាណាចក្រកម្ពុជា ពីថ្ងៃទី១៣ ដល់ថ្ងៃទី១៤ ខែធ្នូ ឆ្នាំ២០១៦ខាងមុខ។ នេះបើយោងតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិនៅថ្ងៃទី០៨ ធ្នូនេះ។
សេចក្តីប្រកាសព័ត៌មាននេះ បានឱ្យដឹងថា ការអញ្ជើញមកទស្សនៈកិច្ចជាផ្លូវរដ្ឋរបស់ប្រធាធិបតីហ្វីលីពិនរូបនេះ ធ្វើឡើងតាមការអញ្ជើរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនីព្រះមហាក្សត្រនៃព្រះរាជាណាចក្រកម្ពុជា។
សេចក្តីប្រកាសព័ត៌មានរបស់ក្រសួងការបរទេសបន្តថា ក្នុងអំឡុងពេលទស្សនៈកិច្ច លោកឌូតឺតេ នឹងចូលក្រាបបង្គំគាល់ព្រះមហាក្សត្រសម្តេចព្រះបរមនាថ នរោត្តម សីហមុនី។
ជាមួយគ្នា លោកនឹងជួបពិភាក្សាទ្វេភាគីជាមួយសម្តេចនាយករដ្ឋមន្ត្រី ហ៊ុន សែន ផងដែរ។
ក្នុងកិច្ចពិភាក្សាទ្វេភាគី មេដឹកនាំនៃប្រទេសទាំងពីរ នឹងធ្វើជាសាក្សីក្នុងពិធីចុះហត្ថលេខាលើឯកសារ ចំនួនពីរ គឺ អនុស្សារណៈស្តីពីកិច្ចសហប្រតិបត្តិការក្នុងការប្រយុទ្ធប្រឆាំងឧក្រិដ្ឋកម្មឆ្លងដែន និងអនុស្សារណៈនៃកិច្ចព្រមព្រៀងស្តីពីកិច្ចសហប្រតិបត្តិការលើវិស័យកីឡា៕
លោក រ៉ឌ្រីហ្គោ ឌូតឺតេ បានឡើងកាន់អំណាចជាប្រធានាធិបតីហ្វីលីពីនទី១៦ កាលពីខែឧសភាឆ្នាំ២០១៦។ លោកត្រូវបានមេដឹកនាំ អន្តរជាតិមួយចំនួន ហៅរូបលោកថាជាមេដឹកនាំជ្រុលនិយម បន្ទាប់ពីលោកបានអនុវត្តផែនការបោសសំអាតអ្នកពាក់ព័ន្ធនឹងការជួញដូរគ្រឿងញឿន តាមរយៈការធ្វើឃាត និងឃុំខ្លួនមនុស្សច្រើនពាន់នាក់ ។សហរដ្ឋអាមេរិក អង្គការសហប្រជាជាតិ និង ប្រទេសលោកខាងលិចខ្លះទៀត ចាត់ទុកថាជាការរំលោភសិទ្ធិមនុស្សយ៉ាងធ្ងន់ធ្ងរ។ ដោយសាររឿង លោក រ៉ឌ្រីហ្គោ ឌូតឺតេ រងការគំរាមធ្វើរដ្ឋប្រហារទម្លាក់ ជាច្រើនដងមកហើយ៕