រដ្ឋាភិបាលភូមាកោះហៅឯកអគ្គរដ្ឋទូតម៉ាឡេស៊ី មកស្ដាប់ការច្រានចោលរបស់ខ្លួនដែលចោទពួកកងទ័ពយោធារើសអើងជាតិសាសន៍ទៅលើសហគមន៍មូស្លីមរ៉ូហ៊ីងយ៉ា។ សេចក្ដីរាយការណ៍របស់កាសែតថៃ The nation អនុរដ្ឋមន្ដ្រីការបរទេស លោក ទេស ខ្យាវ ទីន បានកោះហៅឯកអគ្គរដ្ឋទូតម៉ាឡេស៊ី លោក ម៉ានីដប៊ី អាហ្រាម៉ាន់ មកទទួលយកការមិនសប្បាយចិត្ដរបស់ភូមាចំពោះការចោទប្រកាន់របស់នាយករដ្ឋមន្ដ្រី ណាជីព រ៉ាហ្សាក់ ដែលចោទថា ភូមាកំពុងតែបង្កឲ្យមានអំពើប្រល័យពូជសាសន៍ ទាក់ទិនទៅនឹងការវាយប្រហារទៅលើសហគមន៍មូស្លីម រ៉ូហ៊ីងយ៉ា។
លោកអនុរដ្ឋមន្ដ្រីការបរទេសភូមា បានអះអាងថា សហភាពមីយ៉ាន់ម៉ា មិនបានបោសសំអាតជនជាតិភាគតិចរ៉ូហ៊ីងយ៉ានោះទេ។ ប៉ុន្ដែលោកថា វាជាការត្រួតពិនិត្យមើលលើជនចំណាកស្រុកដែលខុសច្បាប់ប៉ុណ្ណោះ។ លោកអនុរដ្ឋមន្ដ្រីបញ្ជាក់ទៀតថា ស្មារតីនៃសមាជិកប្រទេសអាស៊ាននីមួយៗ គឺត្រូវពង្រឹងសហប្រតិបត្ដិការជាមួយគ្នាដោយឈរលើគោលការណ៍ដោះស្រាយរួមគ្នាក្នុងជម្លោះអ្វីមួយ។
សូមជម្រាបថា ប្រជាជនសហគមន៍មូស្លីម រ៉ូហ៊ីងយ៉ា បច្ចុប្បន្នរស់នៅក្នុងរដ្ឋរ៉ាក់ឃីន ភាគខាងជើងនៃប្រទេសភូមា។ ជនជាតិភាគតិចបង់ក្លាដេសមួយនេះបានចាកចេញពីរដ្ឋរ៉ាក់ឃីនរយៈពេលមួយខែចុងក្រោយនេះ គឺមានចំនួនរហូតដល់ទៅជាង ១ម៉ឺននាក់ ប៉ុន្ដែក្នុងចំនួននេះអ្នកខ្លះរត់ទៅរស់នៅប្រទេសម៉ាឡេស៊ី។ សហគមន៍មូស្លីមរ៉ូហ៊ីងយ៉ាត្រូវបានរដ្ឋធម្មនុញ្ញប្រទេសភូមាចាត់ទុកជាជនចំណាកស្រុកខុសច្បាប់ ដោយឃាឃាំងមិនឲ្យសហគមន៍នេះចូលសញ្ជាតិភូមាបានឡើយ។ កាលពីឆ្នាំ ២០១២ ក៏មានផ្ទុះហិង្សាជាតិសាសន៍ផងដែរដោយបណ្ដាលឲ្យជនជាតិបង់ក្លាដេសរ៉ូហ៊ីងយ៉ាស្លាប់យ៉ាងតិច ២០០នាក់ និងជាច្រើនរយនាក់ទៀតរត់ចោលលំនៅឋាន៕
