en     km
en     km

ពលរដ្ឋ​រាប់​ពាន់​នាក់​ប្រារព្ធ​ទិវា​សិទ្ធិ​មនុស្ស​អន្តរជាតិ​ទូ​ទាំង​ប្រទេស​កម្ពុជា​

Share

​ភ្នំពេញ​ ៖​ ចាប់ពី​ថ្ងៃ​ទី​០២​ ខែធ្នូ​ រហូត​ដល់​ថ្ងៃ​ទី​១០​ ខែធ្នូ​ ប្រជាពលរដ្ឋ​រាប់​ពាន់​នាក់​នៅ​ទូ​ទាំង​ប្រទេស​កម្ពុជា​នឹង​រៀបចំ​ព្រឹត្តិការណ៍​ ជា​បន្តបន្ទាប់​នៅ​ ៣៥​ ទីតាំង​ផ្សេង​គ្នា​ ក្នុង​ ១៨​ ខេត្ត​-​រាជធានី​ ដើម្បី​ប្រារព្ធ​ទិវា​សិទ្ធិ​មនុស្ស​អន្តរជាតិ​ឆ្នាំ​ ២០១៦​។​

រូបភាពអ្នកចូលរួមប្រារព្ធទិវាសិទ្ធិមនុស្សអន្តរជាតិឆ្នាំ ២០១៦។រូបភាពពី លីកាដូ
រូបភាពអ្នកចូលរួមប្រារព្ធទិវាសិទ្ធិមនុស្សអន្តរជាតិឆ្នាំ ២០១៦។រូបភាពពី លីកាដូ

​ព្រឹត្តិការណ៍​នេះ​ភាគច្រើន​នឹង​ត្រូវ​រៀបចំ​ឡើង​នៅ​តំបន់​ជនបទ​ ក្នុង​មូលដ្ឋាន​ជា​ច្រើន​រួម​មាន​ សហគមន៍​រង​ផល​ប៉ះពាល់​ដោយ​ជម្លោះដីធ្លី​។​  បណ្ដាញ​យុវជន​ សមាគម​ និង​ព្រះសង្ឃ​ ក៏​ដូច​ជា​សហជីព​ និង​អង្គការ​មិនមែន​រដ្ឋាភិបាល​នៅ​ទូ​ទាំង​ប្រទេស​ នឹង​រៀបចំ​ប្រារព្ធ​ទិវា​សិទ្ធិ​មនុស្ស​អន្តរជាតិ​នេះ​ជា​បន្តបន្ទាប់​ ក្រោម​ប្រធានបទ​ “​យុត្តិធម៌​ ២០១៦”​។​

​នៅ​រាជធានី​ភ្នំពេញ​ និង​ក្រុង​ចំនួន​ ៤​ មាន​ក្រុង​សៀមរាប​ បាត់ដំបង​ សិរី​សោភ័ណ​ និង​ក្រុងព្រះសីហនុ​ ព្រឹត្តិការណ៍​ធំ​នេះ​នឹង​ត្រូវ​បាន​រៀបចំ​ឡើង​ដោយ​សហគមន៍​នៅ​ជុំវិញ​តំបន់​នីមួយៗ​ ដើម្បី​រួម​គ្នា​ប្រារព្ធ​ទិវា​សិទ្ធិ​មនុស្ស​។​

​ការ​ប្រារព្ធ​ទិវា​នេះ​នឹង​មាន​រួម​បញ្ចូល​នូវ​សកម្មភាព​មួយ​ចំនួន​ដូច​ជា​ វេទិកាសាធារណៈ​ដើម្បី​ជជែក​ពិភាក្សា​អំពី​បញ្ហា​សិទ្ធិ​មនុស្ស​ក្នុង​ពេល​បច្ចុប្បន្ន​ ការ​សម្ដែង​រឿង​ ការ​ដាក់​ញត្តិ​ជូន​ទៅ​អាជ្ញាធរ​មូលដ្ឋាន​ ស្ដី​ពី​ កង្វល់​នៃ​បញ្ហា​សិទ្ធិ​មនុស្ស​នៅ​ក្នុង​មូលដ្ឋាន​ និង​ នៅ​ថ្នាក់​ជាតិ​។​ ការ​រៀបចំ​ពិធីបុណ្យ​បែប​ព្រះពុទ្ធ​សាសនា​ ដែល​ភ្ជាប់​ទៅ​នឹង​បញ្ហា​សិទ្ធិ​មនុស្ស​ ព្រមទាំង​ការ​ដង្ហែ​ក្បួន​ឆ្លងកាត់​តាម​ស្រុក​ ខណ្ឌ​ និង​ក្រុង​ នៅ​តាម​ខេត្ត​មួយ​ចំនួន​។​

​ការ​ប្រារព្ធ​ទិវា​សិទ្ធិ​មនុស្ស​អន្តរជាតិ​ នឹង​ផ្ដល់​ឱកាស​ឲ្យ​ប្រជាពលរដ្ឋ​បង្ហាញ​ពី​ការ​សាមគ្គីភាព​ ការ​ប្ដេជ្ញា​ចិត្ត​ និង​ការ​ខិតខំ​ប្រឹងប្រែង​ដើម្បី​ទទួល​បាន ការ​គោរព​សិទ្ធិ​មនុស្ស​។​ នៅ​សល់​ពេល​ប្រមាណ​ ១​ ឆ្នាំ​ទៀត​ប៉ុណ្ណោះ​ការ​បោះ​ឆ្នោត​ឃុំ​ /​ សង្កាត់​ នឹង​មក​ដល់​ ដូច្នេះ​ ការ​ប្រារព្ធ​ទិវា​សិទ្ធិ​មនុស្ស​នៅ​ឆ្នាំ​នេះ​ ប្រជាពលរដ្ឋ​រាប់​ពាន់​នាក់​នឹង​អាច​លើក​ឡើង​ពី​បញ្ហា​ជា​ច្រើន​ដូច​ជា​ ការ​បោះ​ឆ្នោត​ដោយ​សេរី​ និង​ យុត្តិធម៌​ បញ្ហា​សិទ្ធិ​ដីធ្លី​ ប្រាក់​ឈ្នួល​សម រម្យ​សម្រាប់​កម្មករ​ ប្រព័ន្ធ​តុលាការ​ឯករាជ្យ​ និង​ការ​បញ្ចប់​ការ​ធ្វើទុក្ខបុកម្នេញ​លើ​សេរីភាព​ជា​មូលដ្ឋាន​។​

​លោក​ ទឹម​ ម៉ា​ឡៃ​ ប្រធាន​បណ្ដាញ​យុវជន​កម្ពុជា​ (CYN)​ បាន​មាន​ប្រសាសន៍​ថា​៖​ «​ច្បាប់​មួយ​ចំនួន​ត្រូវ​បាន​ប្រើប្រាស់​សម្រាប់​រឹតត្បិត​យើង​ ចាប់​យើង​ដាក់​ពន្ធនាគារ​ និង​បំបិទ​សំឡេង​យើង​”​។​ លោក​បន្ត​ថា​៖​ “​យុវជន​គឺជា​អនាគត​នៃ​ប្រទេស​កម្ពុជា​ ហើយ​យើង​ក៏​ដូច​ជា​ជន​ក្រីក្រ​ត្រូវការ​អនាគត​មួយ​ដែល​មានការ​គោរព​សិទ្ធិ​មនុស្ស​ និង​ជួយ​គាំទ្រ​ដោយ​អ្នកមាន​អំណាច​»​។​

កញ្ញា​ សុង​ ស្រី​លាភ​ តំណាង​សហគមន៍​បឹង​កក់​ បាន​មាន​ប្រសាសន៍​ថា​៖​ «​ពួក​យើង​នៅ​តែ​បាត់បង់​ដីធ្លី​ កម្មករ​នៅ​តែ​ទាមទារ​ឲ្យ​មាន​ប្រាក់​ឈ្នួល​សមរម្យ​សម្រាប់​ការ​រស់នៅ​ ប៉ុន្តែ​នៅ​ពេល​យើង​ធ្វើការ​តវ៉ា​ យើង​ត្រូវ​បាន​គេ​ចាប់​ដាក់​ពន្ធនាគារ​”​។​ កញ្ញា​បន្ត​ថា​៖​ “​យើង​ប្រារព្ធ​ទិវា​សិទ្ធិ​មនុស្ស​ ប៉ុន្តែ​យើង​ក៏​ទាមទារ​ឲ្យ​មានការ​ផ្លាស់​ប្ដូរ​ដោយសារ​យើង​ត្រូវការ​យុត្តិធម៌​»​។​

​លោក​ ស​ ម៉ូ​រ៉ា​ ប្រធាន​សហព័ន្ធ​សហជីព​កម្មករ​ចំណីអាហារ​និង​សេវាកម្ម​កម្ពុជា​ (CFSWF)​ បាន​មាន​ប្រសាសន៍​ថា​៖​ «​កម្មករ​តស៊ូ​ដើម្បីរ​ស់ត្រូវ​បាន​រឹតត្បិត​ដោយ​ច្បាប់​សហជីព​ថ្មី​ និង​ច្បាប់​ដែល​មាន​លក្ខណៈ​រឹតត្បិត​ដទៃ​ទៀត​។​ ថ្ងៃ​ទិវា​សិទ្ធិ​មនុស្ស​អន្តរជាតិ​គឺជា​ពេលវេលា​មួយ​សម្រាប់​យើង​ចូលរួម​ទាំងអស់​គ្នា​ ដើម្បី​តវ៉ា​ទៅ​នឹង​ច្បាប់​ដែល​ប៉ះពាល់​ដល់​ជីវិត​រស់នៅ​របស់​យើង​»​។​

​លោក​ អំ​ សំអាត​ ប្រធាន​គ្រប់គ្រង​ផ្នែក​ស៊ើបអង្កេត​នៃ​អង្គការ​សម្ព័ន្ធ​ខ្មែរ​ជំរឿន​និង​ការពារ​សិទ្ធិ​មនុស្ស​ លី​កាដូ​ (LICADHO)​ បាន​មាន​ប្រសាសន៍​ថា​៖​ «​ប្រធានបទ​សម្រាប់​ថ្ងៃ​ទិវា​សិទ្ធិ​មនុស្ស​អន្តរជាតិ​ឆ្នាំ​នេះ​គឺ​ ”​យុត្តិធម៌​ ២០១៦”​ ដោយសារ​យុត្តិធម៌​មាន​សារៈសំខាន់​ណាស់​សម្រាប់​សន្ដិភាព​និង​ការ​រីក​ចម្រើន​នៅ​ក្នុង​ប្រទេស​កម្ពុជា​។​ ប្រសិនបើ​គ្មាន​តុលាការ​ឯករាជ្យ​ទេ​ នោះ​នឹង​មិន​មាន​យុត្តិធម៌​និង​សន្ដិភាព​ឡើយ​»​។​

​សង្គម​ស៊ី​វិល​សង្កេត​ឃើញ​ថា​ រយៈពេល​ ១​ ឆ្នាំ​មកនេះ​ មានការ​ធ្វើទុក្ខបុកម្នេញ​លើ​លទ្ធិប្រជាធិបតេយ្យ​ និង​ សង្គម​ស៊ី​វិល​ ការ​បន្ត​ប្រើប្រាស់​ប្រព័ន្ធ​តុលាការ​ដើម្បី​បំបិទ​សំឡេង​ និង​ គំរាមកំហែង​សកម្មជន​ជាដើម​នៅ​កម្ពុជា​នៅ​តែ​បន្ត​មាន​។​ ជាង​នេះ​ទៀត​ បញ្ហា​កង្វះខាត​ការ​ប្ដេជ្ញា​ចិត្ត​របស់​រាជរដ្ឋាភិបាល​ក្នុង​ការ​លើកកម្ពស់​សិទ្ធិ​ដីធ្លី​និង​សិទ្ធិ​ការងារ​នៅ​តែ​ជា​កត្តា​ប្រឈម​។​ សកម្មភាព​របស់​សកម្មជន​នៅ​ទូ​ទាំង​ប្រទេស​នៅ​តែ​បន្ត​ការ​តវ៉ា​ប្រឆាំង​ទៅ​នឹង​ភាព​អយុត្តិធម៌​ ដើម្បី​ទាមទារ​សិទ្ធិ​របស់​អ្នក​ទាំងនោះ​និង​ទាមទារ​ឲ្យ​មានការ​ផ្លាស់​ប្ដូរ​៕​ប្រភព​ ៖​ លី​កាដូ​

Share

Image
Image
Image