ភ្នំពេញ៖ សម្ដេច ហ៊ុន សែន ប្រមុខរាជរដ្ឋាភិបាលកម្ពុជាបានថ្លែងថាការបង្ក្រាបបាតុកម្ម នៅសហរដ្ឋអាមេរិកមិនត្រូវបាន គេរិះគន់ថារំលោភសិទ្ធិមនុស្សនោះទេ។ ចុះចំណែកកម្ពុជា បង្ក្រាបបាតុកម្មរឿងខុស រឿងអីរំលោភសិទ្ធិមនុស្ស គឺកម្ពុជាគ្មានខុសឡើយ។ តែសម្រាប់អ្នកវិភាគ និងមន្ត្រីសិទ្ធិមនុស្សនៅកម្ពុជាយល់ថា មតិនេះគ្រាន់តែជាលេសដើម្បីបន្ដការបង្ក្រាបបាតុកម្មបន្ដទៀតប៉ុណ្ណោះ។ ពួកគាត់ថា នៅអាមេរិកគេបង្ក្រាបបាតុកម្មតែគេមិនប្រើគ្រាប់កាំភ្លើង ពិតៗដូចកម្ពុជាដែលនាំឱ្យមានការ បាត់បង់ជីវិតមនុស្ស។ លោក លៀ ស៊ីណា រាយការណ៍៖
ប្រមុខរាជរដ្ឋាភិបាលកម្ពុជាសម្ដេច ហ៊ុន សែន នៅព្រឹក ថ្ងៃចន្ទ ទី០៥ ខែធ្នូ ឆ្នាំ២០១៦នេះ មានប្រសាសន៍ក្នុងពិធីសម្ពោធ រោងចក្រក្រុមហ៊ុន កូកាកូឡាថ្មី ដែលស្ថិតនៅក្នុងតំបន់សេដ្ឋកិច្ចពិសេសក្រុងភ្នំពេញ ដោយស្នើឲ្យឯកអគ្គរាជរដ្ឋទូតសហរដ្ឋអាមេរិក កត់ចំណាំនូវចំណុចមួយចំនួនដែលសម្ដេចអះអាងថា មានអ្នកវិភាគ និងតំណាងអង្គការសិទ្ធិមនុស្សបានប្រាប់អ្នកសារព័ត៌មានថា ការបង្ក្រាបបាតុកម្មនៅអាមេរិកគឺមិនខុស។ បន្ថែមពីនេះសម្ដេចថា បើការបង្ក្រាបបាតុកម្មនៅអាមេរិកកាលពីប៉ុន្មានសប្ដាហ៍មុនប្រឆាំងលទ្ធផលបោះឆ្នោតមិនខុស គឺការបង្ក្រាបបាតុកម្មនៅកម្ពុជាកន្លងមកក៏មិនខុសដែរ ដោយសម្ដេចថា ក្នុងលក្ខខណ្ឌរក្សាសណ្ដាប់ធ្នាប់នៃប្រទេសមួយរាជរដ្ឋាភិបាលត្រូវតែធ្វើដូចនេះ។
សម្ដេច ហ៊ុន សែន៖«ខ្ញុំសូមស្នើសុំឲ្យឯកអគ្គរដ្ឋទូតអាមេរិកកត់ត្រាឲ្យច្បាស់ នូវសម្ដីអ្នកវិភាគនិងតំណាងសិទ្ធិមនុស្សមួយចំនួនដែលបាននិយាយជាមួយសារព័ត៌មានឲ្យច្បាស់ថា ការបង្ក្រាបនៅអាមេរិកគឺត្រឹមត្រូវនឹងមិនរំលោភសិទ្ធិមនុស្សបាន កុំមានស្ដង់ដាពីរឯកឧត្ដម ហើយខ្ញុំសង្ឃឹមថា ការដែលរាជរដ្ឋាភិបាលកម្ពុជាធ្វើកន្លងទៅគឺអត់ខុសទេ ដើម្បីរក្សាសណ្ដាប់ធ្នាប់ប្រទេសមួយគឺរដ្ឋាភិបាលត្រូវតែធ្វើដូចគ្នា អញ្ចឹងបើអ្វីដែលបានកើតនៅអាមេរិកកាលពីប៉ុន្មានអាទិត្យមុនវាអត់ខុសនៅកម្ពុជាក៏អត់ខុសដែរ»។
ជាងនេះទៀតសម្ដេចក៏បានរិះគន់ សារព័ត៌មានមួយចំនួនដែលប្រៀបធៀបបាតុកម្ម នៅកម្ពុជានិងបាតុកម្មនៅអាមេរិកដោយ មិនបានយកទិដ្ឋភាពពិតមកបង្ហាញដែល សម្ដេចថា ប៉ូលីសអាមេរិកបានបង្ក្រាបបាតុករយ៉ាងឃោឃៅហើយចាប់ខ្លួនរាប់ពាន់នាក់ប៉ុន្ដែបែរជាបង្ហាញរូបភាពដែលមិនបញ្ជាក់ទិដ្ឋភាពនោះទៅវិញ។
ត្រង់ចំណុចនេះមន្ដ្រីការពារសិទ្ធិមនុស្សមានប្រសាសន៍ថា មិនអាចយកការបង្ក្រាបបាតុកម្មនៅកម្ពុជាទៅប្រៀបធៀបនឹងការបង្ក្រាបបាតុកម្មនៅអាមេរិកបានទេ ព្រោះស្ថិតក្នុងលក្ខខណ្ឌពីរដាច់ដោយឡែកពីគ្នា។ ប៉ុន្តែដូចនេះក្ដី សម្ដេចមិនបាននិយាយថាតើអាមេរិកបង្ក្រាបបាតុកម្មបានបាញ់ សម្លាប់បាតុករដែរឬទេ។
ទាក់ទិនរឿងនេះ លោក អំ សំអាត មន្ត្រីស៊ើបអង្កេតជាន់ខ្ពស់អង្គការ Licahdo មានប្រសាសន៍តាមរយៈបទសម្ភាសន៍ខ្លីជាមួយវិទ្យុស្ដ្រីអេហ្វអឹម១០២ ថា ជាគោលការណ៍ប្រទេសនីមួយៗតែងតែមានច្បាប់ ជាពិសេសសហរដ្ឋអាមេរិកដែលជាប្រទេសកាន់លទ្ធិប្រជាធិបតេយ្យ គឺមិនមែនចេះតែបង្ក្រាបតាមការនឹកឃើញនោះទេ។ ជាងនេះលោកសង្កត់ធ្ងន់ថា អាមេរិកមុនគេបង្ក្រាបគឺគេចរចាសិន ហើយជាងនេះរាល់ការបង្ក្រាបបាតុកម្មគេប្រើក្រុមជំនាញ ហើយមិនបង្កគ្រោះថ្នាក់ដល់ពលរដ្ឋរបស់គេទេ ដែលចំណុចនេះលោកថា ខុសឆ្ងាយពីកម្ពុជាដែលកន្លងមកការបង្ក្រាបគឺបានធ្វើឡើងដោយក្រុមដែលគ្មានជំនាញ ហើយបង្កជាគ្រោះថ្នាក់ជិវិតមនុស្ស និងបង្កការរងរបួសធ្ងន់ធ្ងរទៀតផង។
លោក អំ សំអាត៖«នៅកម្ពុជាយើងការបង្ក្រាបបាតុកម្មកន្លងមកក៏មានការបាត់បង់ជីវិតអ្វីជាដើម ហើយការប្រើកម្លាំងក៏ខុសគ្នាដែរនៅអាមេរិកគេប្រើកម្លាំងប៉ូលីសដែលមានជំនាញដែលបានហ្វឹកហ្វឺនត្រឹមត្រូវតែនៅកម្ពុជាការបង្ក្រាការតវ៉ា និងបាតុកម្មខ្លះគឺប្រើកងសន្ដិសុខដែលគ្នាជំនាញ »។
ដូចគ្នានេះដែរលោក ឡុង គឹមឃន អ្នកស្រាវជ្រាវនយោបាយការបរទេស និងច្បាប់អន្ដរជាតិមានប្រសាសន៍ថា មិនអាចយកករណីបង្ក្រាបបាតុកម្មនៅអាមេរិក មកប្រដូចការបង្ក្រាបបាតុកម្មនៅកម្ពុជាបាននោះទេ។
លោកថា ការបង្ក្រាបបាតុកម្មនៅអាមេរិកគឺគេប្រើកម្លាំងសមសម្រប មិនប្រើគ្រាប់កាំភ្លើងពិត មិនប្រើដំបងដែក ដើម្បីវាយទៅលើកម្មកររបស់គេបង្កជាការរងរបួសឡើយ។ លោក ឡុង គឹមឃន យល់ថា ខុសគ្នាឆ្ងាយពីការបង្ក្រាបបាតុកម្មនៅកម្ពុជាកន្លងមក។ លោកគិតថា បើដូចនេះមែនអាជ្ញាធរកម្ពុជានឹងមិនបន្ថយដៃឡើយ ទៅលើបាតុករ។
លោក ឡុង គឹមឃន៖«ការប្រៀបធៀបគ្នារវាងបាតុកម្មទាំងពីរនេះ គ្រាន់តែជាការដោះសារយកលេសយករួចខ្លួន ដើម្បីបន្ដការប្រើកម្លាំងលើសលប់ និងឧបករណ៍ដែលបណ្ដាលឲ្យបាត់បង់ជីវិតបាតុករ រួមទាំងគ្រាប់កាំភ្លើងពិតនៅក្នុងការបង្ក្រាបដោយហិង្សាទៅលើបាតុករអហិង្សា និងសន្ដិវិធី ដូច្នេះមិនអាចប្រៀបធៀបគ្នាបានទេ»។
ករណីការបង្ក្រាបបាតុកម្មរបស់កម្មករនៅផ្លូវ វេងស្រេង កាលពីខែមករា ឆ្នាំ២០១៤ បានបណ្ដាលឱ្យមនុស្សស្លាប់ យ៉ាងតិច ៥នាក់ និងរបួសជាច្រើនសិបនាក់ ខណៈកម្មករ ជាង២០នាក់ ត្រូវបានចាប់ខ្លួន។ ការបង្ក្រាបនៅពេលនោះ កងកម្លាំង ប៉ូលិស និងកងរាជអាវុធហត្ថបានប្រើគ្រាប់បែកផ្សែង និងគ្រាប់កាំភ្លើងពិត។ ក្រោយពីបង្ក្រាបភ្លាម សហគមន៍អន្តរជាតិ បានថ្កោលទោស កម្ពុជា យ៉ាងខ្លាំង៕