ភ្នំពេញ៖ ក្រុមស្ត្រីមកពីវិស័យការងារផ្សេងៗគ្នា បានមកជួបជុំគ្នាក្នុងវេទិកាយុទ្ធនាការ ១៦ថ្ងៃបំពាក់បូរពណ៌ស លុបបំបាត់អំពើហិង្សាលើស្ត្រី ក្រោមប្រធានបទ«ការក្រោកឈររបស់ស្ត្រីប្រឆាំងអំពើហិង្សា»។ ក្នុងវេទិការនេះក្រុមស្ត្រីៗបានលើកឡើង ដោយប្តេជ្ញាចិត្តដើរទៅមុខប្រឆាំងរាល់រូបភាពក្នុងការប្រើប្រាស់អំពើហិង្សាលើស្ត្រី។ ការលើកឡើងបែបនេះ ធ្វើទ្បើងព្រឹកថ្ងៃទី ០៤ ខែធ្នូ ឆ្នាំ២០១៦ នៅភោជនីយដ្ឋានអ័រគីដេ រាជធានីភ្នំពេញ។ លោក ជួន សារ៉េត រាយការណ៍៖
ខណៈការប្រើប្រាស់អំពើហិង្សាទៅលើស្ត្រីនៅតែបន្តកើនទ្បើងច្រើននៅទ្បើយ ក្រុមបណ្តាញស្ត្រីបានស្នើឱ្យរាជរដ្ឋាភិបាលត្រូវបន្តពង្រឹងការយកចិត្តទុកដាក់បន្ថែមទៀតចំពោះបញ្ហានេះ។ តែយ៉ាងណា មន្ត្រីរដ្ឋាភិបាលរកឃើញថា អំពើហិង្សាលើស្ត្រីមានការថយចុះបើធៀបនឹងឆ្នាំមុនៗ។
អ្នកស្រី ស្រ៊ី ចំរ៉ុង អ្នកបំរើការផ្សព្វផ្សាយស្រាបៀមួយរូប បានលើកទ្បើងថា អំពើហិង្សាលើស្ត្រីគឺជារឿងសំខាន់ដែលរាជរដ្ឋាភិបាល និងក្រសួងពាក់ព័ន្ធផ្សេងៗទៀតត្រូវតែយកចិត្តទុកដាក់។ អ្នកស្រី ចំរ៉ុង បន្តថាកន្លងមកអ្នកស្រីធ្លាប់ទទួលរងនូវអំពើហិង្សាដោយពាក្យសម្តីពីភ្ញៀវផងដែរ ប៉ុន្តែអ្នកស្រីបានដោះស្រាយបញ្ហានោះដោយសន្តិវិធី។ ទោះបីជាដូចនេះក្តី អ្នកស្រីនៅតែមានការភ័យខ្លាចពីការទទួលរងអំពើហិង្សាពីភ្ញៀវផងដែរ។ បញ្ហានេះអ្នកស្រីសូមស្នើឱ្យគ្រប់ស្ថាប័នពាក់ព័ន្ធត្រូវពង្រឹងការយកចិត្តទុកដាក់ដោះស្រាយពីករណីនេះ។
អ្នកស្រី ស្រ៊ី ចំរ៉ុង៖ «ភ្ញៀវសម្តីគាត់លេបខាយជាមួយយើងពាក្យសម្តីជួនណាបបួលយើងទៅដេកជាមួយយើងអញ្ចឹងប៉ុន្តែខ្ញុំថាអត់អញ្ចឹងទេខ្ញុំលក់តែស្រាបៀទេខ្ញុំអត់មានទៅលក់ខ្លួនអីនោះទេខ្ញុំអត់អញ្ចឹងទេកុំនិយាយជាមួយខ្ញុំអញ្ចឹង ខ្ញុំចង់ឱ្យក្រសួងគាត់មើលពីបញ្ហាខាងស្ត្រីផ្សព្វផ្សាយពេលយប់ផងដោយសារធ្វើការពេលយប់ហើយអត់សុវត្ថភាពទៀតហើយប្រាក់ខែបានទាបទៀត គ្រាន់តែផ្ទះគេ ហើយថ្លៃហូបចុកមិនចង់គ្រប់ផង» ។
ចំណែកអនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា (CFSWF) អ្នកស្រី អ៊ូ ទេពផល្លីន មានប្រសាសន៍ថា អំពើហិង្សាលើស្ត្រីនៅតែមានការកើនទ្បើងគួរឱ្យព្រួយបារម្ភនៅឡើយ។ តែអ្នកស្រី ផល្លីន ថាស្ត្រីមានឆន្ទៈខ្លាំងជាងមុនគួរឱ្យសរសើរក្នុងការរើបម្រាសប្រឆាំងការប្រើប្រាស់អំពើហិង្សាលើពួកគេ តាមរយៈការស្វែងយល់ដឹងពីសិទ្ធិសេរីភាព និងផ្លូវច្បាប់។ អ្នកស្រី ផល្លីន បន្តថា ភាពឈឺចាប់របស់ស្ត្រីដែលរងនូវអំពើហិង្សានេះ អាចបណ្តាលឱ្យពួកគេហ៊ានបញ្ចេញមតិរិះគន់ផ្សេងៗទៅដល់បុគ្គលទាំងទ្បាយដែលគាបសង្កត់ទៅលើពួកគាត់។
អ្នកស្រី ផល្លីន គូសបញ្ជាក់ដែរថា ទោះបីជារាជរដ្ឋាភិបាលនាពេលកន្លងមក ចេញផែនការយុទ្ធសាស្ត្ររបស់ខ្លួនក្នុងការកាត់បន្ថយការប្រើប្រាស់អំពើហិង្សាលើស្រី្តយ៉ាងណាក៏ដោយ តែការអនុវត្តការងារនៅមានកម្រិតនៅទ្បើយ។ «ខ្ញុំមើលឃើញថានៅមានចន្លោះប្រហោងច្រើន ហើយការយកចិត្តទុកដាក់ភាគច្រើនដែលរដ្ឋាភិបាលកំពុងតែធ្វើយើងមើលឃើញតាមរយៈគាត់ផ្តោតទៅលើអំពើហិង្សានៅក្នុងគ្រួសារច្រើនជាង អំពើហិង្សានៅកន្លែងធ្វើការងារនឹងនៅតាមទីសាធារណៈហើយយើងមើលឃើញថាអំពើហិង្សានៅកន្លែងការងារបច្ចុប្បន្នគឺច្រើនណាស់ដូចយើងមើលឃើញតាមវិស័យការងារមួយៗគឺច្រើនមែនទែន»។
រីឯប្រធានកម្មវិធីស្តីទីអង្គការ អាក់សិនអេតកម្ពុជា អ្នកស្រី អ៊ូ សុភារី បានផ្តល់បទសម្ភាសន៍ឱ្យវិទ្យុស្ត្រីថា វេទិកានេះនឹងធ្វើឱ្យស្ត្រីកាន់តែពង្រឹងការក្រោកឈរទ្បើងបន្ថែមទៀត ដើម្បីចូលរួមលុបបំបាត់អំពើហិង្សាលើស្ត្រី។ អ្នកស្រី សុភារី សង្កេតឃើញថា អំពើហិង្សាទៅលើស្ត្រីនៅមិនទាន់មានការថយចុះនៅទ្បើយនោះទេ ដោយអ្នកស្រីថា ស្ត្រីខ្លួនឯងត្រូវក្រោកឈរដើម្បីទប់ស្កាត់ការប្រើប្រាស់អំពើហិង្សា ហើយស្ថាប័នអ្នកអនុវត្តច្បាប់ត្រូវចូលរួមពង្រឹងច្បាប់របស់ខ្លួនឱ្យបានល្អប្រសើរ ឈានទៅរួមចំណែកកាត់បន្ថយអំពើហិង្សាលើស្ត្រី។
អ្នកស្រី អ៊ូ សុភារី ៖«ដល់ពេលវេលាមួយដែលស្ត្រីត្រូវចាប់ផ្តើមនិយាយថាទេចំពោះអំពើហិង្សាយើងអត់អាចនៅបន្តអញ្ចឹងទៀតទេ បើសិនជាយើងអត់ធ្វើអ្វីម្យ៉ាងវានឹងបន្តអញ្ចឹងរហូតតទៅ នៅពេលមានអំពើហិង្សាកើតទ្បើងចំពោះស្ត្រីជាខ្លួនយើងក្តី មិត្តភក្ត្រយើងក្តី ស្ត្រីណាម្នាក់ក្តីគឺយើងត្រូវតែចោទសួរថាហេតុអីបានជាមានអំពើហិង្សាហ្នឹងហើយទាមទារឱយអ្នកប្រព្រឹត្តអំពើហិង្សាហ្នឹងទទួលខុសត្រូវចំពោះមុខច្បាប់ព្រោះច្បាប់យើងមានត្រឹមត្រូវហើយសិទ្ធិស្ត្រីមានត្រឹមត្រូវអស់ហើយ គ្រាន់តែទាមទារឱ្យអ្នកអនុវត្តច្បាប់ត្រូវអនុវត្តច្បាប់នោះឱ្យមានពិតប្រាកដ»។
ជុំវិញនឹងការលើកទ្បើងនេះដែរ កាលពីពេលថ្មីៗនេះ អនុប្រធាននាយកដ្ឋានប្រឆាំងការជួញដូរផ្លូវភេទ និងការពារអនីតិជននៃក្រសួងមហាផ្ទៃ លោក ភួង សុភី មានប្រសាសន៍ថា រឿងនេះក្រសួងមហាផ្ទៃតែងតែយកចិត្តទុកដាក់ និងបង្កើតវេទិកាសាធារណៈជារៀងរាល់ខែ ដើម្បីផ្សព្វផ្សាយពីការទប់ស្កាត់ការប្រើប្រាស់អំពើហិង្សាលើស្ត្រី ជាពិសេសផ្សព្វផ្សាយពីការលើកកម្ពស់ស្ត្រីជាដើម។
តាមរបាយការណ៍របស់ក្រសួងមហាផ្ទៃ ពាក់ព័ន្ធនឹងការប្រើប្រាស់អំពើហិង្សាលើស្ត្រីរកឃើញថា ការប្រើប្រាស់អំពើហិង្សាលើស្ត្រីមានការថយចុះគួរឱ្យកត់សម្គាល់ នៅរយៈពេលប៉ុន្មានឆ្នាំចុងក្រោយនេះ។ លោក ភួង សុភី បន្តថា អត្រាថយចុះនេះដោយសារស្ថាប័នពាក់ព័ន្ធ ដូចជាក្រសួងកិច្ចការនារី ក្រសួងមហាផ្ទៃ អង្គសង្គមស៊ីវិលពាក់ព័ន្ធ បានជួយផ្សព្វផ្សាយ ក៏ដូចជាចុះអនុវត្តការងារដោយផ្ទាល់ ទៅដល់ទីកន្លែងពលរដ្ឋ ដើម្បីពន្យល់ពួកគេបានយល់ដឹងពីការទប់ស្កាត់នៃការប្រើប្រាស់អំពើហិង្សាលើស្ត្រី។
លោក មានប្រសាសន៍យ៉ាងដូច្នេះថា៖«នៅក្នុងឆ្នាំនេះអគ្គនគរបាលជាតិគាត់បានដាក់ផែនការថ្មីគឺដាច់ឆ្នាំត្រូវធ្វើសន្និបាទតាមនាយកដ្ឋានរៀងៗខ្លួន ធ្វើសន្និបាទបូកសរុបរៀងៗខ្លួនហើយស្នងការរងទូទាំងប្រទេសត្រូវទ្បើងមកទទួលកិច្ចការងារហ្នឹង មកចូលរួមការងារហ្នឹងអញ្ចឹងតាមនាយកដ្ឋានមួយៗគេត្រូវធ្វើផែនការបូកសរុបអំពីសកម្មភាពការងារហ្នឹងអញ្ចឹងរបាយការណ៍ បានបង្ហាញថាអំពើហិង្សាលើស្ត្រី អំពើហិង្សាទាក់ទងនឹងផ្លូវភេទត្រូវបានធ្លាក់ចុះគួរឱ្យកត់សម្គាល់»។
យោងតាមគោលដៅអភិវឌ្ឍន៍ប្រកបដោយចីរភាពក្នុងការកាត់បន្ថយ និងទប់ស្កាត់អំពើហិង្សាលើស្ត្រីរបស់រាជរដ្ឋាភិបាល ២០១៥-២០៣០ មានវិធានការដូចជា ៖ លុបបំបាត់រាល់ទម្រង់នៃការរើសអើងលើស្ត្រី និងកុមារគ្រប់ទីកន្លែង ការលុបបំបាត់រាល់ទម្រង់នៃអំពើហិង្សាលើស្ត្រី និង ក្មេងស្រីទាំងអស់នៅក្នុងវិស័យសាធារណៈ។ វិស័យឯកជនត្រូវជួយធានាឱ្យមានការចូលរួមពេញលេញ និងមានប្រសិទ្ធិភាពពីសំណាក់ស្ត្រី និងទទួលបានឱកាសស្មើគ្នាក្នុងជីវភាពជាអ្នកដឹកនាំ នៅគ្រប់កម្រិតក្នុងការធ្វើសេចក្តីសម្រេចចិត្តទាក់ទងនឹងនយោបាយ សេដ្ឋកិច្ច និងជីវិតសាធារណៈជាដើម៕
