ព្រះសពព្រះធម្មវិបស្សនា សំ ប៊ុនធឿន កេតុធម្មោ បានបូជាហើយកាលពីរាត្រីថ្ងៃទី០៣ ខែធ្នូ ឆ្នាំ ២០១៦ ម្សិលមិញ។ នេះបើយោងតាមគេហ ទំព័រ ពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ដែលបានចេញផ្សាយកាលពីថ្ងៃទី០៣ ខែវិច្ឆិកា ម្សិលមិញ។
ព្រះសពព្រះតេជគុណ សំ ប៊ុនធឿន ដែលត្រូវបានតម្កល់អស់រយៈពេលជាង ១៣ ឆ្នាំ នៅពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ស្ថិតនៅក្នុងស្រុកពញ្ញាឮ ខេត្តកណ្តាល ត្រូវបានបូជានៅបរិវេននាពុទ្ធមណ្ឌលវិបស្សនាធុរៈរួចរាល់ហើយកាលពីថ្ងៃម្សិលមិញ។
ពិធីបូជាព្រះសពព្រះតេជគុណ សំ ប៊ុនធឿន នេះមានការចូលរួមពីសំណាក់ពុទ្ធបរិស័ទជិតឆ្ងាយយ៉ាងច្រើនកុះករ ហើយពិធីនេះត្រូវបានរៀបចំឡើងយ៉ាងអធិកអធម្មផងដែរ ដោយមានការរៀបចំឡើងពីថ្ងៃទី ១ ដល់ថ្ងៃទី ៤ ខែធ្នូ ដោយមានការនិមន្តចូលរួមពីសម្តេចសង្ឃ, ព្រះសង្ឃស្ទើរគ្រប់ខេត្ត និងពុទ្ធបរិស័ទរាប់ពាន់នាក់ផងដែរ។
ព្រះធម្មវិបស្សនា សំ ប៊ុនធឿន កេតុធម្មោ ត្រូវបានឃាតករលួចបាញ់សម្លាប់កាលពីថ្ងៃទី ៨ ខែកុម្ភៈ ឆ្នាំ ២០០៣ នៅក្នុងបរិវេណវត្តលង្ការ រាជធានីភ្នំពេញ ក្នុងព្រះជន្ម ៤៧ ព្រះវស្សា។ អស់រយៈពេលជាង ១៣ ឆ្នាំ មកហើយ រដ្ឋាភិបាលនៅតែមិនទាន់អាចវែកមុខឃាតករ ដែលបាញ់ប្រហារព្រះអង្គបាននៅឡើយនោះទេ។
ជីវប្រវត្តសង្ខេប
ជីវប្រវត្តិព្រះធម្មវិបស្សនា សំ ប៊ុនធឿន
ព្រះធម្មវិបស្សនា សំ ប៊ុនធឿន ប្រសូត្រនៅថ្ងៃចន្ទ័ ៣រោច ខែផល្គុណ ឆ្នាំវក អដ្ឋស័ក ព.ស ២៤៩៩ ត្រូវនិងថ្ងៃ ១៨ ខែមិនា ឆ្នាំ១៩៥ វេលាម៉ោង ១២ យប់ ស្ថិតនៅភូមិរកាកោង ឃុំរកាកោង ស្រុក មុខកំពូល ខេត្ត កណ្តាល ក្នុងគ្រួសារកសិករ។ ឪពុកនាម ពុយ សំ និង ម្តាយឈ្មោះ កែវ ស៊ិម ។
ព្រះអង្គមានបងប្អូនចំនួន ៤ នាក់ ទី ១ គឺអ្នកស្រី សំ គង់ ទី ២ លោក សំឈឿន ទី៣ ព្រះតេជគុណ សំ ប៊ុនធឿន និង ទី៤ អ្នកស្រី សំ ចេក។
កាលពីកុមារភាពព្រះអង្គ សំ ប៊ុនធឿន ជាកុមារមួយរូប ជាដែលមានចរិតស្លូតបូត ចេះគោរពចាស់ទុំ។
ព្រះអង្គបានចូលសិក្សានៅបឋមសិក្សាវត្តតាំងគោក ស្រុកជើងព្រៃ ខេត្តកំពង់ចាម ដែលជាទឹកដីកំណើតលោកឪពុកព្រះអង្គ។ បន្ទាប់មកព្រះអង្គក៏បានផ្លាស់មកសិក្សានៅបឋមសិក្សា រកាកោង ស្រុកមុខកំពូល ខេត្តកណ្តាលទឹកដីកំណើតម្តាយវិញ។
ក្រោយពីបែកសម័យខ្មែរក្រហម ព្រះអង្គក៏បានសាងព្រះផ្នួស។ នៅឆ្នាំ ១៩៨០ ព្រះអង្គបានបំពេញឧបសម្បទាន ជាភិក្ខុភាវៈ នៅវត្ត ឃោសិតាម ក្នុងឃុំស្ដៅ ស្រុកកងមាស ខេត្តកំពងចាម ដែលមានឧប្បជ្ឈាយ៍ព្រះនាម គង់ ណែម។ ព្រះអង្គបានព្យាយាម សិក្សាកាន់តែខ្លាំង។ បន្ទាប់បមកព្រះអង្គបានទៅគង់ នៅវត្តក្តីចាស់ (សុរិយាពោធិមាស)ស្រុក មុខកំពូល ខេត្តកណ្តាល ដើម្បីសិក្សាធម្មវិន័យ ក្នុងសំណាក់លោកអាចារ្យ មាស ឈិន។
នៅឆ្នាំ ២០០០ ព្រះអង្គបានចូលសិក្សានៅ សាកលវិទ្យាល័យ ព្រះសីហនុរាជបន្តទៀត ។ ព្រះអង្គបានកសាង កុដិ ខឿនព្រះវិហារ អគាសិក្សានិងមានសមិតិផលផ្សេងទៀតជាច្រើន។
ព្រះអង្គបានបណ្តុះបណ្តាល គ្រូកម្មដ្ឋាន ចំនួន ២៤១០ ក្នុងនោះមានគ្រូ ថ្នាក់ឧត្តម ១១ រូប ថ្នាក់មធ្យម ៦១ រូប និងថ្នាក់បឋម ២៣៣៨ រូប។
ព្រះអង្គបានបង្កើតមជ្ឈមណ្ឌលវិបស្សនាធុរៈ តាមបណ្តាខេត្តស្ទើរគ្រប់ខេត្តក្រុង ។ ព្រះធម្មវិបស្សនា សំ ប៊ុនធឿន សុគត នៅថ្ងៃទី ៧ ខែកុម្ភៈ ឆ្នាំ២០០៣ នៅមន្ទីរពេទ្យកាល់ម៉ែត ក្នុងជន្មានយុ ៤៧ ព្រះវស្សា៕
រូបភាពវីដេអូពិធីបូជាព្រះសព ព្រះធម្មវិបស្សនា សំ ប៊ុនធឿន កេតុធម្មោ
