លោក ធន់ សារាយ ប្រធានសមាគមការពារសិទ្ធិមនុស្ស អាដហុកដែលភៀសខ្លួន ទៅក្រៅប្រទេស បានទទួលរង្វាន់ជាអ្នកការពារសិទិ្ធមនុស្ស និងការជួយពង្រឹងនីតិរដ្ឋ នៅកម្ពុជាពីរដ្ឋាភិបាលសហព័ន្ធអាល្លឺម៉ង់ និងបារាំង។
តាមហ្វេសប៊ុកមួយឈ្មោះករុណាខ្មែរ លោកធន់សារាយបានទទួលពានរង្វាន់នេះក្នុងចំណោមសកម្មជនការពារសិទិ្ធមនុស្ស នៅលើពិភពលោកចំនួន១៦នាក់ដែលទទួលបានពាននេះ។
ការប្រគល់ពានរង្វាន់នេះ ធ្វើនៅទីក្រុងបែលឡាំង ប្រទេសអាល្លឺម៉ង់ កាលថ្ងៃទី១ ខែធ្នូ ឆ្នាំ២០១៦ ដែលរៀបចំឡើងលោក Mr Frank-Walter Steinmeier រដ្ឋមន្ត្រីការបរទេសអាល្លឺម៉ង់ និងលោក Mr. Jean-Marc Ayrault រដ្ឋមន្ត្រីការបរទេស និងអភិវឌ្ឍន៍អន្តរជាតិប្រទេសបារាំង។
លោក ធន់ សារាយ បានប្រាប់ កាសែតភ្នំពេញប៉ុស្តិ៍កាលពីថ្មីៗនេះថា លោកត្រូវចាកចេញពីប្រទេសមួយរយៈ គឺដោយសារមិនចង់ប្រឈមមុខនឹងស្ថានភាព មួយដែលលោកថា ភ័យខ្លាច ពីការកោះហៅរបស់តុលាការនិងការចាប់ខ្លួន។
លោក ធន់ សារាយ ប្រធានសមាគមការពារសិទ្ធិមនុស្ស អាដហុកដែលភៀសខ្លួន ទៅក្រៅប្រទេស បន្ទាប់ពីតុលាការ រាជធានីភ្នំពេញ កោះហៅមកធ្វើជាសាក្សីក្នុងសំនុំរឿងបុគ្គលិក៤រូបរបស់លោក ត្រូវបានតុលាការ ឃុំខ្លួនដោយចោទថា សូកប៉ាន់ ក្នុងសំនុំរឿងនាង ខុមចាន់ តារាទី ហៅស្រីមុំ។
លោក ធន់ សារាយ អតីតអ្នកទោសនយោបាយ នៃសម័យរដ្ឋកម្ពុជា។ លោកបានដឹកនាំសមាគមសិទ្ធិមនុស្សអាដហុក នៅឆ្នាំ១៩៩១ បន្ទាប់ពីលោក និងអតីតអ្នកទោស នយោបាយ ជាច្រើនត្រូវបានដោះលែង ក្រោយពី ប្រទេសកម្ពុជាមានសន្តិភាព តាមរយៈកិច្ចព្រមព្រៀង ក្រុងប៉ារិស។ លោកក៏ជាប្រធានគណៈកម្មាធិការនាយកនៃអង្គការខុមហ្វ្រែល ដែលដឹកនាំដោយលោក គល់ បញ្ញា៕
