បាតុកររាប់ពាន់នាក់ដែលភាគច្រើនជាក្រុមម៉ូស្លីម ចាប់ផ្ដើមធ្វើបាតុកម្មជាថ្មីម្ដងទៀតនៅថ្ងៃសុក្រនេះ ដើម្បីទម្លាក់អភិបាលក្រុងចាកាតា ពីតំណែង ដោយសារតែពួកបាតុករចោទពីបទប្រមាថព្រះអាឡោះ។
សេចក្ដីរាយការណ៍របស់បណ្ដាញផ្សាយព័ត៌មាន Channel News Asia ឱ្យដឹងថាការធ្វើបាតុកម្មដើម្បីទម្លាក់អភិបាលក្រុងចាកាតា លោក Basuki Tjahaja Purnama ពីតំណែងបានចាប់ផ្ដើមហើយតាំងពីព្រឹកព្រលឹមដោយពួកបាតុករ ភាគច្រើនជាអ្នកកាន់សាសនាម៉ូស្លីម និងពួកគេបានកាន់បដា ជាច្រើន អោយអភិបាលក្រុងរូបនេះចុះចេញពីតំណែង។
អភិបាលក្រុងរូបនេះ ត្រូវបានចោទពីបទប្រមាថគម្ពីរកូរ៉ាន់ ដែលនាំអោយប្រជាជនម៉ូស្លីម ផ្ទុះកំហឹង ហើយបានធ្វើបាតុកម្មជាច្រើនសប្ដាហ៍មកហើយ។ អ្នកចាត់ចែងបាតុករបានអះអាងថា មនុស្ស ១០ម៉ឺននាក់និងចូលរួមបាតុកម្មនៅថ្ងៃនេះ។ តែបើតាមមន្ដ្រីក្រុងចាកាតា គេបានដាក់ពង្រាយប៉ូលីស ប្រមាណ ២២០០០នាក់។
ការពីសប្ដាហ៍មុន បាតុកម្មដូចគ្នានេះ បានប៉ះទង្គិចជាមួយសមត្ថកិច្ចដោយបណ្ដាលឱ្យមនុស្សខ្លះស្លាប់ និងជាង ១០០នាក់រងរបួស៕ប្រភព:CNA
