ប្រធានគណបក្សប្រឆាំង លោក សម រង្ស៊ី បានសរសេរនៅទំព័រហ្វេសបុក របស់លោកថា លទ្ធផលនៃការចុះឈ្មោះបោះឆ្នោតឆ្នាំ ២០១៦ នឹងបើកផ្លូវឲ្យគណបក្សសង្គ្រោះជាតិ ទទួលជ័យជម្នះនៅ ក្នុងការបោះឆ្នោតឆ្នាំ ២០១៧ និង ២០១៨។
លោក សម រង្ស៊ី លើកឡើងពីក្រៅប្រទេសដូចនេះ បន្ទាប់ពីគណៈកម្មាធិការជាតិរៀបចំការបោះឆ្នោត(គ.ជ.ប) បានប្រកាសអំពីអ្នកបានចុះឈ្មោះបោះឆ្នោតជាង ៧លាន ៨ សែននាក់នៅត្រឹមថ្ងៃបិទបញ្ចប់កាលពីថ្ងៃទី៣០វិច្ឆិកា។ លោកបន្តថា ទោះបីជាប្រជាពលរដ្ឋខ្មែរជាង ១ លាននាក់ ភាគច្រើនជាពលករចំណាក់ស្រុកទៅធ្វើការនៅក្រៅប្រទេស មិនបានទៅចុះឈ្មោះបោះឆ្នោតក៏ដោយ តែមេបក្សប្រឆាំងប្រកាសសាទរលទ្ធផលចុះឈ្មោះបោះឆ្នោតក្នុងរយៈពេល ៣ ខែ ដែលលោកថា ក៏ជាមោទនភាពមួយដែរ។
លោក សម រង្ស៊ី៖«ខ្ញុំសូមកោតសរសើរអស់ពីដួងចិត្ត ចំពោះពលរដ្ឋខ្មែរគ្រប់រូប ដែលបានខិតខំទៅចុះឈ្មោះឲ្យទាល់តែបាន ដើម្បីរក្សាសិទ្ធិបោះឆ្នោតរបស់ខ្លួន ហើយបំពេញកាតព្វកិច្ចរបស់ខ្លួន ក្នុងនាមជាពលរដ្ឋពេញលក្ខណៈ។ ជាពិសេស ខ្ញុំសូមសម្តែងការកោតសរសើរដ៏លើសលប់ ចំពោះស្ត្រីខ្មែរ ៤.២១៣.៤២៧ នាក់ តំណាងឲ្យ ៥៣,៥ ភាគរយ នៃចំនួនសរុបប្រជាពលរដ្ឋ ៧.៨៧៣.១៩៤ នាក់ ដែលបានទៅចុះឈ្មោះបោះឆ្នោតប្រកបដោយជោគជ័យ»។
លោក សម រង្ស៊ី បានប្រៀបធៀបថា បញ្ជីឈ្មោះអ្នកបោះឆ្នោតថ្មីសម្រាប់ឆ្នាំ ២០១៦នេះគឺ មានលក្ខណៈល្អប្រសើរជាងបញ្ជីឈ្មោះអ្នកបោះឆ្នោតចាស់កាលពីឆ្នាំ ២០១៣ ទាំងបរិមាណ និងគុណភាព។ កត្តានេះហើយដែលមេបក្សប្រឆាំងរំពឹងថាគណបក្សរបស់លោកនឹងបានជ័យជម្នះ សម្រាប់ការបោះឆ្នោតក្រុមប្រឹក្សាឃុំ សង្កាត់ ឆ្នាំ ២០១៧ និងបោះឆ្នោតជ្រើសរើសតំណាង ឆ្នាំ ២០១៨៕
