ភ្នំពេញ៖ សាលាដំបូងរាជធានីភ្នំពេញកាត់ទោសអតីតអគ្គរាជទូតកម្ពុជា ប្រចាំប្រទេសកូរ៉េខាងត្បូងឲ្យជាប់ពន្ធនាគារ៥ ឆ្នាំ ពិន័យប្រាក់ចំនួន ១០លានរៀល ពីបទរំលោភអំណាច និងកេងយកប្រយោជន៍ដោយខុសច្បាប់នូវទឹកប្រាក់ជាង៧លានដុល្លារ។ អ្នកឃ្លាំមើលតុលាការ បានហៅសាលក្រមនៅស្រុកខ្មែរមានស្តង់ដា២ គឺករណីអ្នកប្រឆាំងរដ្ឋាភិបាលមានទម្ងន់ទោស ធ្ងន់។ តែបែបនេះក្ដីមេធាវីការពារលោក ស៊ុត ឌីណា យល់ថា បើយោងតាមអង្គហេតុ និងអង្គច្បាប់មិនមានបន្ទុកគ្រប់គ្រាន់បញ្ជាក់ថា កូនក្តីរបស់លោកបានប្រព្តឹត្តខុសដូចការចោទឡើយ។ លោក ធូ វិរៈរាយការណ៍៖
លោក អំ សំអាត មន្ត្រីការពារសិទ្ធិមនុស្សនៃអង្គការលីការដូ ដែលបានតាមដានកិច្ចការជំនុំជម្រះក្ដី នៅតុលាការ ដែលសឹងមិនលោះពេលនោះ យល់ឃើញថា ការសម្រេចផ្តន្ទាទោសអតីតអគ្គរាជទូតខ្មែរប្រចាំនៅប្រទេសកូរ៉េខាងត្បូងករណីពុលរលួយប្រាក់ជាច្រើនលានដុលា្លរ មានស្ថានទម្ងន់ទោស ៥ ឆ្នាំនេះគឺ ឆន្ទានុសិទ្ធិរបស់ចៅក្រម តែលោកសាលក្រមមានភាពស្រាលបើធៀបនឹងអ្នកប្រឆាំងរដ្ឋាភិបាល។
សាលក្រមបានផ្ដន្ទាទោស លោក ស៊ុត ឌីណា ៥ឆ្នាំនិងពិន័យជាប្រាក់ ១០លានរៀលចូលថវិការដ្ឋ បន្ទាប់ពីអង្គភាពប្រឆាំងអំពើពុករលួយ រកឃើញលោកកឹបកេងប្រាក់របស់រដ្ឋ ៧លាន ២សែនដុល្លារអាមេរិក មានដី ១០កន្លែង មានត្បូងពេជ្រ ៥០០គ្រាប់ និងមាសជិត ១៣ គីឡូក្រាម។
លោក អំ សំអាត សង្កេតឃើញថាការផ្តន្ទាទោសរវាងបុគ្គលគាំទ្ររដ្ឋាភិបាល និងបុគ្គលមិនគាំទ្ររដ្ឋាភិបាល ឬមាននិន្នាការប្រឆាំងរដ្ឋាភិបាលហាក់ផ្តន្ទាទោសខុសគ្នា។
លោក អំ សំអាត៖«តាមមាត្រាមួយៗ ហើយការកំណត់តាមការផ្តន្ទាទោសមួយៗ ការចោទប្រកាន់ទៅតាមមាត្រាមួយៗ ទោះបីជាយើងឃើញថា វាខុសមាត្រាគ្នាក៏ដោយ ហើយទោះបីជាមាត្រាដូចគ្នាក៏ដោយ ដូចខ្ញុំលើកឡើងថា ប្រសិនបើអ្នកដែលមិនប្រឆាំងរដ្ឋាភិបាល អ្នកដែលធ្លាប់បំរើរដ្ឋាភិបាលវាហាក់ដូចជាទទួលស្ថានសម្រាល(ទោស)ប៉ុន្តែអ្នកដែលប្រឆាំង ឬមិនដែលបំរើរដ្ឋាភិបាលហាក់បីដូចជាទទួលនូវស្ថានទម្លន់អនុវត្តន៍ទោស»។
តែបែបនេះក្ដីចៅក្រមជំនុំជម្រះនៃ សាលាដំបូងបានប្រកាសថា លោក ស៊ុត ឌីណា អាចមានរយៈពេលមួយខែ ដើម្បីប្តឹងទាស់ទៅសាលាឧទ្ធរណ៍។
លោក ឌីណា ត្រូវបានតុលាការចោទប្រកាន់ពីបទកេងយកប្រយោជន៍ដោយខុសច្បាប់ តាមមាត្រា៥៩៧ និង ៥៩៨ នៃក្រមព្រហ្មទណ្ឌ និងបទរំលោភអំណាច តាមមាត្រា ៣៥ ច្បាប់ប្រឆាំងអំពើពុករលួយ។
លោក ស៊ុត ឌីណា និយាយថា សាលក្រមនេះមិនអាចទទួលយកបានទេ។ លោកថា នឹងប្ដឹងទៅសាលាឧទ្ធរណ៍។ ចំណែកភរិយារបស់លោក គឺលោកស្រី សុគន្ធ មាលា សម្ដែងការសោកស្តាយ ដោយចាត់ទុកជារឿងអយុត្តិធម៌ចំពោះប្តីរបស់គាត់។
ចំណែកមេធាវីការពារលោក ស៊ុត ឌីណា គឺ លោក ហុក ផល្លា យល់ថា ការផ្តន្ទាទោសកូនក្តីលោកគឺមិនផ្អែកទៅលើអង្គហេតុ និងអង្គច្បាប់ឡើយ។ លោកមេធាវី ផល្លា ថា លោកនឹងពិភាក្សាជាមួយកូនក្តីរបស់លោកថាតើត្រូវប្តឹងទាស់ទៅសាលាឧទ្ធរណ៍ទៀតឬយ៉ាងណា។
លោក ហុក ផល្លា យល់ថា៖«ចំពោះអង្គហេតុ និងអង្គច្បាប់មិនមានបន្ទុកគ្រប់គ្រាន់ ឬបង្ហាញថាកូនក្តីខ្ញុំបានប្រព្រឹត្តិដូចការចោទប្រកាន់ទេ ដោយសារសិក្សាទៅលើភស្តុតាំង ទៅលើឯកសារ ទៅលើសាក្ស៊ីចង្អុលបង្ហាញតាមបែបបទរដ្ឋាបាលត្រឹមត្រូវ»។
លោក ស៊ុត ឌីណា បានចូលមករួមរស់ជាមួយគណបក្សប្រជាជនកម្ពុជា នៅឆ្នាំ២០០៩ និង ទទួលបានការតែងតាំងជាអនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។ លោកត្រូវបានរាជរដ្ឋាភិបាលតែងតាំង ឲ្យបំពេញការងារជាឯកអគ្គរាជទូតខ្មែរ ប្រចាំប្រទេសកូរ៉េខាងត្បូងនៅឆ្នាំ២០១៤។ មុនលោកចូលទៅនៅជាមួយគណបក្សកាន់អំណាច លោក គឺជាមេដឹកនាំគណបក្សមួយរិះគន់រដ្ឋាភិបាល ឥតសំចៃ៕
