ភ្នំពេញ៖លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត បានប្រាប់វិទ្យុស្ត្រី នៅរសៀលថ្ងៃទី០១ ខែធ្នូ នេះថា គ.ជ.ប នៅមិនទាន់ទទួលបានតួលេខចុងនៅក្រោយនៃចំនួនអ្នកចុះឈ្មោះបោះឆ្នោតនៅឡើយទេ។ លោកបន្តថា នៅថ្ងៃនេះគ.ជ.ប កំពុងបូកសរុប តួលេខ អ្នកចុះឈ្មោះបោះឆ្នោត។
លោក ហង្ស ពុទ្ធា ៖«ព្រោះតែកាល ម្សិលមិញការចុះឈ្មោះបោះឆ្នោត យើងថែមលើសពីម៉ោង៥និង៣០នាទីល្ថាចដល់យប់ជ្រៅ អញ្ចឹងហើយបានតួលេខនេះមិនមានច្បាស់លាស់»។
អ្នកនាំពាក្យរូបនេះ បានឱ្យដឹងបន្តថា កាលពីម្សិលមិញនេះ មិនមានពាក្យបណ្តឹងបន្ថែមនោះទេ។
សូមជម្រាបថា ចាប់ពីថ្ងៃទី០១ កញ្ញា ដល់ថ្ងៃទី២៩ ខែវិចិ្ឆកា ឆ្នាំ២០១៦ គ.ជ.ប បានទទួលបានបណ្តឹងចំនួន៩៧បណ្តឹង ក្នុងនោះបណ្តឹងដែលដោះស្រាយមិនទាន់ចប់មានចំនួន៧ពាក្យបណ្តឹង។
ក្នុងកិច្ចប្រជុំជាមួយតំណាងរដ្ឋាភិបាល គណបក្សនយោបាយ អង្គការសង្គមស៊ីវិល និងអ្នកសារព័ត៌មានជាតិ និងអន្តរជាតិនៅទីស្តីការគណៈកម្មាធិការជាតិរៀបចំការបោះឆ្នោត កាលពីថ្ងៃទី៣០ វិច្ឆិកាម្សិលមិញ លោក ឯម សុផាត សមាជិក គ.ជ.ប មានប្រសាសន៍ថា ក្នុងដំណើរការចុះឈ្មោះបោះឆ្នោតថ្មី ឆ្នាំ២០១៦នេះ បានប្រព្រឹត្តិទៅយ៉ាងល្អប្រសើរ។លោក បញ្ជាក់ថា ការចុះឈ្មោះនេះបានប្រកបដោយសុវត្ថិភាព និងទទួលលទ្ធផលល្អ ដោយសារមានក្របខណ្ឌច្បាប់ ផែនការ ប្រតិទិនការងារ គម្រោងថវិកា ការត្រៀមសម្ភារៈបរិក្ខារ ការចូលរួមពីភាគីពាក់ព័ន្ធ ការផ្តល់កិច្ចការពារសន្តិសុខពីគណៈកម្មាធិការអចិន្ត្រៃសន្តិសុខ និងការផ្សព្វផ្សាយព័ត៌មាន។
លោកបន្តថា មូលហេតុដែលធ្វើឱ្យការចុះឈ្មោះបោះឆ្នោត បានចំនួនមិនគ្រប់តាមការប៉ាន់ស្មានស្ថិតិប្រជាពលរដ្ឋគឺបណ្តាលមកពី ពលករចំណាកស្រុកទៅបម្រើការងារនៅក្រៅប្រទេសទាំងស្របច្បាប់ និងមិនស្របច្បាប់មានចំនួន១លាននាក់។ តាម សមាជិក គ.ជ.ប រូបនេះ ប្រជាពលរដ្ឋមួយចំនួនទៀតដែលមិនអាចទៅចុះឈ្មោះបាន ដោយស្ថិតក្នុងនៅក្នុងស្ថានភាពជាប់ពន្ធនាគារ កំពុងសម្រាកព្យាបាលជម្ងឺនៅតាមមន្ទីរពេទ្យ ជនចាស់ជរា និងជនពិការដែលពិបាកក្នុងការធ្វើដំណើរ និងករណីទទួលមរណភាព។
លោកបន្តថា បញ្ហាមួយទៀតគឺ ប្រជាពលរដ្ឋមានសិទ្ធិបោះឆ្នោតមួយចំនួន ពុំសូវយកចិត្តទុកដាក់ក្នុងការចុះឈ្មោះបោះឆ្នោត បើទោះបីជាមានការជំរុញ និងបង្កលក្ខណៈងាយស្រួលយ៉ាងណាក៏ដោយ។
សូមជម្រាប លទ្ធផលបណ្តោះអាសន្នចំនួនអ្នកចុះឈ្មោះឆ្នោតពីថ្ងៃទី០១ កញ្ញា ដល់ថ្ងៃទី២៩ វិច្ឆិកា ឆ្នាំ២០១៦ មាន ៧ ៨៣២ ៧២១ ស្មើនឹង៨១.០៥%៕
