សិង្ហបុរី ៖ លោកស្រី អង់សាន ស៊ូជី នឹងធ្វើដំណើរទស្សនកិច្ចជាផ្លូវការទៅកាន់ប្រទេសសិង្ហបុរី ចាប់ពីថ្ងៃទី ៣០ ខែវិច្ឆិកា ដល់ថ្ងៃទី ០២ ខែធ្នូ។ នេះបើតាមសេចក្តីប្រកាសក្រសួងការបរទេសសិង្ហបុរី ដែលបានបញ្ជាក់នៅថ្ងៃអង្គារ ទី២៩ ខែវិច្ឆិកា នេះ។
លោកស្រី អង់សាន ស៊ូជី ដែលនឹងត្រូវទៅបំពេញទស្សនកិច្ចនៅប្រទេសសិង្ហបុរីនេះ គឺតបតាមការអញ្ជើញរបស់នាយករដ្ឋមន្ត្រី លោក សៀនឡុង(Lee Hsien Loong) ហើយការមកដល់នេះនឹងមានរៀបចំពិធីស្វាគមន៍ជាផ្លូវការ ព្រមទាំងមានអាហារពេលល្ងាចសម្រាប់លោកស្រីនៅ Istana នៅថ្ងៃពុធ។
មេដឹកនាំទាំងពីរនឹងក្លាយជាភ្ញៀវកិត្តិយសនៅពីថ្ងៃព្រហស្បតិ៍ក្នុងពិធីបើកការតាំងពិព័រណ៍វត្ថុបុរាណមីយ៉ាន់ម៉ារយៈពេលបីខែផងដែរ ដែលទីតាំងនោះគេឱ្យឈ្មោះថា «ទីក្រុងពង្សាវតារក្សត្រ» ស្ថិតនៅឯសារមន្ទីរប្រជាជាតិអាស៊ី។
កាលពីឆ្នាំ ២០១៥ មីយ៉ាន់ម៉ាគឺជាដៃគូពាណិជ្ជកម្មធំបំផុតទី ២៨ របស់ប្រទេសសិង្ហបុរី ដោយមានទំហំដោះដូរពាណិជ្ជកម្មសរុប ៣៥៧ រយលានដុល្លារ ។
សម្រាប់ប្រទេសមីយ៉ាន់វិញ ប្រទេសសិង្ហបុរី គឺជាដៃគូពាណិជ្ជកម្មធំបំផុតទីបីរបស់ខ្លួន បន្ទាប់ពីប្រទេសចិន និង ប្រទេសថៃ។ នៅចុងខែតុលា ឆ្នាំនេះ ប្រទេសសិង្ហបុរី គឺជាវិនិយោគិនធំជាងគេទីពីររបស់មីយ៉ាន់ម៉ា ដែលមានការវិនិយោគកើនឡើង ១៥,៦ រយលានដុល្លារ បន្ទាប់ពីចិន គឺមានការវិនិយោគ ១៨,៥រយលានដុល្លារ៕
