ក្រុងប៉ារីស ៖ ព្រះរាជអាជ្ញាបារាំងនៅពីថ្ងៃសុក្រ ទី២៥ ខែវិច្ឆិកានេះ បានឱ្យដឹងថា យ៉ាងតិចណាស់ជនសង្ស័យប្រាំនាក់ត្រូវបានចាប់ខ្លួនក្នុងប្រទេសបារាំង ពីបទសង្ស័យថា បានរៀបចំផែនការវាយប្រហារទៅលើគោលដៅសន្ដិសុខ និងនៅជុំវិញរដ្ឋធានីបារាំង។ ជនសង្ស័យទាំង ៥ នាក់នេះ ត្រូវបានដឹងថាមានជាប់ទាក់ទិនដោយផ្ទាល់ទៅនឹងពួករដ្ឋអ៊ីស្លាមនៅក្នុងប្រទេសអ៊ីរ៉ាក់ និង ប្រទេសស៊ីរី។
អាជ្ញាធរធ្លាប់បានរាយការណ៍កាលពីដើមសប្តាហ៍នេះថា មានការវាយប្រហារត្រូវបានគ្រោងធ្វើឡើងនៅថ្ងៃទី១ ធ្នូ ដើម្បីប្រឆាំងនឹងការស៊ើប ការណ៍របស់ប៉ូលីស ហើយគោលដៅសម្រាប់ការវាយប្រហារនោះគឺនៅទីស្នាក់ការកណ្តាលទីក្រុងប៉ារីស ដូចជាសួនកម្សាន្ត Disneyland នៅទីក្រុងប៉ារីសជាដើម។
ប្រទេសបារាំងកំពុងស្ថិតនៅក្រោមភាពអាសន្ន ដោយបានដាក់ពង្រាយទាហានដើរល្បាតតាមដងផ្លូវនៃរដ្ឋធានីប៉ារីស បន្ទាប់ពីការបំផ្ទុះគ្រាប់បែក និង ការបាញ់ប្រហារដោយពួកសកម្មប្រយុទ្ធអ៊ីស្លាមកាលពីខែវិច្ឆិកា ឆ្នាំ ២០១៥ ដោយបានសម្លាប់មនុស្ស ១៣០ នាក់។
ព្រះរាជអាជ្ញាក្រុងប៉ារីសលោក Francois Molins បានប្រាប់ក្នុងសន្និសីទកាសែតមួយថា៖«ការវាយប្រហារដោយជាក់ច្បាស់ត្រូវបានរាំងស្ទះ»។
លោកបន្តថា «ក្រុមកងកុម្ម៉ង់ដូ Strasbourg និងបុរសម្នាក់ត្រូវបានចាប់ខ្លួននៅទីក្រុង ម៉ាក់សី(Marseille) ព្រោះបានផ្ដល់ការណែនាំក្នុងការទទួលអាវុធ។ ការណែនាំនេះត្រូវបានផ្តល់ដោយមេបញ្ជាការម្នាក់ មកពីតំបន់ អ៊ីរ៉ាក់ និង ស៊ីរី» ។
លោកព្រះរាជអាជ្ញាបន្តថា ជនសង្ស័យពីររូបក្នុងចំណោមប្រាំរូប បានធ្វើដំណើរទៅព្រំដែនប្រទេសតួកគី និង ស៊ីរី តាមរយៈប្រទេសអេស៊ីប កាលពីខែមិនាឆ្នាំ ២០១៥។ ចំណែកជនសង្ស័យបួននាក់ក្នុងចំណោមបុរសទាំង ៥ នាក់នោះគឺជាបារាំង ហើយម្នាក់ទៀតជាជនជាតិ ម៉ារ៉ុក៕ប្រភព៖CNA
