ភ្នំពេញ៖ ក្រសួងការបរទេសកម្ពុជា បានដាក់ឱសានវាទឲ្យការិយាល័យឧត្តមស្នងការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា ត្រឹមថ្ងៃទី ៣០ ខែ ធ្នូ ឆ្នាំ ២០១៦ ដោយឲ្យកែប្រែឥរិយាបថឡើងវិញក្នុងការគោរពអធិបតេយ្យភាព និងមិនជ្រៀតជ្រែកកិច្ចការផ្ទៃក្នុងកម្ពុជា។
ក្រសួងការបរទេសកម្ពុជាដាក់ឱសានវាទនេះ ធ្វើឡើងតាមរយៈលិខិតមួយច្បាប់ផ្ញើរទៅការិយាល័យឧត្តមស្នងការសហប្រជាជាតិ ទទួលបន្ទុកសិទ្ធិមនុស្សប្រចាំនៅកម្ពុជា កាលពីថ្ងៃទី ២២ ខែ វិច្ឆិការនេះ។ នៅក្នុងលិខិតរបស់ក្រសួងការបរទេសកម្ពុជា បានបញ្ជាក់ថា អនុស្សរណៈយោគយល់គ្នា(MOU)រវាងរដ្ឋាភិបាលកម្ពុជា ជាមួយឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សមានប្រតិបត្តិការស្របច្បាប់នៅកម្ពុជា ត្រូវបានផុតសុពលភាព តាំងពីថ្ងៃទី ៣១ ខែធ្នូ ឆ្នាំ ២០១៥មកម្ល៉េះ។ លិខិតនេះ បានបញ្ជាក់ទៀតថា កម្ពុជាមិនអាចឲ្យស្ថានភាពបែបនេះ បន្តទៅមុខទៀតដោយគ្មានការកំណត់ពេលនោះ ឡើយ។
នៅក្នុងន័យនេះ រដ្ឋាភិបាលកម្ពុជា បានដាក់ឱសានវាទ រហូតដល់ថ្ងៃទី ៣០ ខែ ធ្នូ ឆ្នាំ ២០១៦ ឲ្យការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា ត្រូវបញ្ជាក់ពីការទទួលយកអនុស្សរណៈយោគយល់គ្នាថ្មីមួយ រវាងរដ្ឋាភិបាលកម្ពុជា និងឧត្តមស្នងការសហប្រជាជាតិ ដោយផ្អែកលើមូលដ្ឋាននៃគោលការណ៍គោរពអធិបតេយ្យភាព និងមិនជ្រៀតជ្រែកកិច្ចការផ្ទៃក្នុង កម្ពុជា។
លិខិតរបស់ក្រសួងការបរទេសកម្ពុជា៖«អនុស្សារណៈយោគយល់គ្នា(MOU)ចុងក្រោយបំផុតដែលអនុញ្ញាតឲ្យការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស មានប្រតិបត្តិការស្របច្បាប់នៅកម្ពុជា បានផុតសុពលភាព តាំងពីថ្ងៃទី ៣១ ខែធ្នូ ឆ្នាំ ២០១៥មកម្ល៉េះ»។
នៅក្នុងលិខិតដដែលក៏បានព្រមានថា បើការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា មិនបញ្ជាក់អំពីសុពលភាពនៃអនុស្សរណៈជាថ្មីតាមពេលកំណត់ទេ រដ្ឋាភិបាលកម្ពុជានឹងប្រើប្រាស់សិទ្ធិអធិបតេយ្យភាពកម្ពុជា ដើម្បីសម្រេចអំពីអនាគតវត្តមានរបស់ការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា៕
