ភ្នំពេញ៖ ខណៈយុទ្ធនាការចុះឈ្មោះបោះឆ្នោត នៅសល់តែ៥ថ្ងៃទៀត ហើយប្រជាពលរដ្ឋដែលមិនបានមកចុះឈ្មោះនៅសល់ប្រមាណជាង២លាននាក់ គណៈកម្មាធិការជាតិរៀបចំការបោះឆ្នោត បានអនុញ្ញាតឱ្យគណបក្សសង្គ្រោះជាតិ ជួបពិភាក្សា ដើម្បីរកដំណោះស្រាយជុំវិញបញ្ហានេះ។ កញ្ញា ឆេង ណាតា រាយការណ៍៖
ការអនុញ្ញាតនេះ បន្ទាប់ពីគណបក្សសង្គ្រោះបានស្នើទៅគណៈកម្មាធិការជាតិរៀបចំការបោះឆ្នោត ដើម្បីពិភាក្សាស្តីពីការចុះឈ្មោះបោះឆ្នោត ក្រោយពីគណបក្សប្រឆាំងមួយនេះព្រួយបារម្ភថា ចំនួនប្រជាពលរដ្ឋដែលបាត់បង់សិទ្ធិបោះឆ្នោតមានចំនួនច្រើនគួរកត់សម្គាល់។
កិច្ចពិភាក្សារវាង គ.ជ.ប និងគណបក្សសង្គ្រោះជាតិ នឹងធ្វើឡើង នៅថ្ងៃទី២៥ ខែវិច្ឆិកា ឆ្នាំ២០១៦ វេលាម៉ោង៩ព្រឹក នៅសាលប្រជុំគ.ជ.ប។
លោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិ បានប្រាប់វិទ្យុស្រី្តនៅថ្ងៃទី២៤ វិច្ឆិកា នេះថា ការដែលគណបក្សសង្គ្រោះជាតិ ចង់ជួបពិភាក្សាជាមួយ គ.ជ.ប ដោយយោងទៅលើចំនួនប្រជាពលរដ្ឋដែលបានទៅចុះឈ្មោះចុងក្រោយ ទើបតែបានជាង៧លាននាក់ នៅប្រជាពលរដ្ឋជាង២លាននាក់ទៀត នៅមិនទាន់បានទៅចុះឈ្មោះបោះឆ្នោត។
លោកបន្តថាគណបក្សសង្គ្រោះជាតិចង់ជួបជាមួយ គ.ជ.ប ដើម្បីរកដំណោះស្រាល ជួយប្រជាពលរដ្ឋកុំឱ្យគាត់បាត់សិទ្ធិ ក្នុងការបោះឆ្នោត ក៏ដូចជាការចុះឈ្មោះបោះឆ្នោត។
អ្នកនាំពាក្យរូបនេះ បានប្រាប់បន្ថែមថា «យើងនឹងពិភាក្សាគ្នាស្អែក ពេលដែលជួបនោះ ទី១.យើងព្យាយាមពិនិត្យទៅលើអាត្រាភាគរយតាមខេត្ត តាមឃុំនីមួយៗ តើឃុំដែលមានអាត្រាទាបនោះបណ្តាលមកពីអ្វី? នៅពេលដែលដឹងពីមូលហេតុហើយ តើយើងអាចមានដំណោះស្រាយអ្វីមួយ ដើម្បីដល់ប្រជាពលរដ្ឋយើង កុំឱ្យបាត់បង់សិទ្ធិក្នុងការចុះឈ្មោះ»។
សម្រាប់លោក យ៉ែម បុញ្ញឬទ្ធី មូលហេតុដែលធ្វើឱ្យពលរដ្ឋមិនបានមកចុះឈ្មោះបោះឆ្នោតនៅមានចំនួនច្រើន គឺដោយសារ គ្មានអត្តសញ្ញាណប័ណ្ណ និងពលរដ្ឋដែលទៅចំណាកស្រុក។ លោកថា គណបក្សសង្គ្រោះជាតិក៏នឹងលើកបញ្ហានេះ និយាយជាមួយគ.ជ.ប ស្អែកនេះផងដែរ។
ចំពោះរឿងនេះ លោក ហង្ស ពុទ្ធា អ្នកនាំពាក្យគ.ជ.ប មានប្រសាសន៍ថា ការព្រួយបារម្ភចេះតែមាន តែ គ.ជ.ប បានបន្តខិតខំឱ្យពលរដ្ឋ ទៅចុះឈ្មោះបោះឆ្នោត បានកាន់តែច្រើន ដែរ។
លោក ហង្សពុទ្ធា៖«សូមអោយបងប្អូនទាំងអស់ដែលមិនទាន់បានចុះឈ្មោះ មេត្តា អញ្ជើញទៅចុះ អោយបាន គ្រប់ៗគ្នា ហើយសូមនិមន្តព្រះសង្ឃគ្រប់ព្រះអង្គ លោកមានតួនាទីដូចពលរដ្ឋទូទៅដែរ គឺត្រូវចុះឈ្មោះដើម្បីបានបោះឆ្នោតជ្រើសរើសក្រុមប្រឹក្សាឃុំសង្កាត់នៅពេលខាងមុខនេះ»។
លទ្ធផលចុះឈ្មោះបណ្តោះអាសន្នដែលគ.ជ.ប បានធ្វើការផ្សព្វផ្សាយនៅថ្ងៃទី២៤ វិច្ឆិកានេះ បានឱ្យដឹងថា ចាប់ពីថ្ងៃទី០១ ខែកញ្ញា ដល់ថ្ងៃទី២៣ ខែវិច្ឆិកា ឆ្នាំ២០១៦ គិតត្រឹមម៉ោង៦ល្ងាច ចំនួនពលរដ្ឋដែលបានមកចុះឈ្មោះបោះឆ្នោតមានចំនួន ៧ ៤៩៦ ៥៥១នាក់ ស្មើនឹង ៧៧,៥៧%៕
