ភ្នំពេញ៖ ស្ថានទូតអាមេរិកប្រចាំប្រទេសកម្ពុជា ស្វាគមន៍សាលដីកា របស់តុលាការកំពូល នៃអង្គជំនុំជំរះវិសាមញ្ញក្នុង តុលាការកម្ពុជា (អវតក)ករណី ០០២-/០១ លើឈ្មោះ នួន ជា និង ខៀវ សំផន អតីតមេដឹកនាំខ្មែរក្រហម។ នេះបើយោងតាមសេចក្តីថ្លែងការណ៍របស់ស្ថានទូតសហរដ្ឋអាមេរិកដែលចេញផ្សាយនៅថ្ងៃទី២៣ វិច្ឆិកានេះ។
សេចក្តីថ្លែងការណ៍ប្រទេសមហាអំណាចមួយនេះ បញ្ជាក់ថា សម័យខ្មែរក្រហមកាន់អំណាចគឺជាយុគសម័យដ៏ខ្មៅងងឹតបំផុត នៅក្នុងប្រវត្តិសាស្ត្រនៃ ប្រទេសកម្ពុជា ហើយសាលដីកាដែលចេញនៅថ្ងៃនេះធានាថា មេដឹកនាំកំពូលពីររូបក្នុងចំណោម មេដឹកនាំកំពូលៗនៃរបបនេះត្រូវបានចាប់អោយទទួលខុសត្រូវ។
សេចក្តីថ្លែងការណ៍ដដែលបានបន្តថា ការផ្តន្ទាទោសឈ្មោះ នួន ជា និង ខៀវ សំផន ពីបទឧក្រិដ្ឋប្រឆាំងនឹងមនុស្សជាតិ ការធ្វើទុក្ខទោសដោយសារ ហេតុផលនយោបាយ និងអំពើអមនុស្សធម៌ដទៃទៀត ទាក់ទងនឹងការជន្លៀសប្រជាជនចេញ ពីទីក្រុង ភ្នំពេញដោយបង្ខំ នៅខែមេសា ឆ្នាំ ១៩៧៥ គឺជា“បទឧក្រិដ្ឋក្នុងទ្រង់ទ្រាយធំ”។
ក្នុងន័យនេះសហរដ្ឋអាមេរិកនឹងបន្តគាំទ្របេសកកម្មរបស់ ECCC ក្នុងការនាំមកនូវយុត្តិធម៌មួយកំរិត សំរាប់ប្រជាជនកម្ពុជា និងលាតត្រដាងពីបទឧក្រិដ្ឋ ដ៏គួរអោយភ័យខ្លាចរបស់ពួកខ្មែរក្រហម។
សូមជម្រាបថា តុលាការកំពូលនៃ អង្គជំនុំជំរះវិសាមញ្ញក្នុង តុលាការកម្ពុជា ឬហៅសាលាក្តីខ្មែរក្រហមនៅព្រឹកថ្ងៃទី២៣នេះក៏បាន បញ្ជាក់បន្ថែមថា សាលក្រមនៃសំណុំរឿង ០០២វគ្គ២ ប្រឆាំងនឹងលោក ខៀវ សំផន និងលោក នួន ជា នឹងត្រូវប្រកាស ដំបូងនៅចុងឆ្នាំ ២០១៦នេះ។
សំណុំរឿង ០០២ នេះ មានវិសាលភាពធំធេង ដែរមានឯកសារពាក់ព័ន្ធ រហូតដល់ ៥០ម៉ឺន ទំព័រ និងដើមបណ្ដឹងរដ្ឋប្បវេណី ៨០០នាក់ ហើយបទឧក្រិដ្ឋទាក់ទងករណីប្រល័យពូជសាសន៍ លើជាតិសាសន៍ដទៃមានជនជាតភាគតិច ចាម និងវៀតណាម៕
