ភ្នំពេញ៖ ទន្ទឹមនឹងកាលបរិច្ឆេទ ការចុះឈ្មោះបោះឆ្នោតជិតបិទបញ្ចប់ ពោលគឺនៅត្រឹមតែ ៦ថ្ងៃទៀតតែប៉ុណ្ណោះ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានរៀបចំដាក់ឲ្យប្រើប្រាស់ប្រព័ន្ធផ្ដល់ព័ត៌មានជាសំឡេងដោយស្វ័យប្រវត្ដិស្ដីពីការចុះឈ្មោះបោះឆ្នោតដើម្បីឲ្យពលរដ្ឋបានទទួលព័ត៌មានកាន់តែងាយស្រួល។
តាមរយៈសេចក្ដីជូនដំណឹងដែលផ្សព្វផ្សាយនៅថ្ងៃទី ២២ ខែ វិច្ឆិកា ឆ្នាំ ២០១៦ បញ្ជាក់ថា គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានសហការជាមួយអង្គការ IFES កាលពីថ្ងៃទី ២២ វិច្ឆិកា ២០១៦ បានបើកឲ្យប្រើប្រាស់ប្រព័ន្ធផ្ដល់ព័ត៌មានជាសំឡេងតាមទូរស័ព្ទដោយស្វ័យប្រវត្ដិក្នុងគោលបំណង ដើម្បីឲ្យប្រជាពលរដ្ឋរួសរាន់ទៅចុះឈ្មោះបោះឆ្នោតឲ្យបានគ្រប់គ្នា។
សេចក្ដីជូនដំណឹងបន្ដថា ប្រជាពលរដ្ឋដែលប្រើប្រាស់ប្រព័ន្ធទូរស័ព្ទ Cellcard, Smart និង Metfone សូមហៅទៅកាន់លេខ ១២៨៥ ដើម្បីទទូលបានព័ត៌មានជុំវិញដំណើរការចុះឈ្មោះបោះឆ្នោតតាមប្រព័ន្ធកុំព្យូទ័រ។
ការហៅទូរស័ព្ទទៅកាន់លេខ ១២៨៥នេះ លោកអ្នកនឹងមិនចំណាយទឹកប្រាក់នោះទេ។
បន្ថែមពីសេចក្ដីជូនដំណឹងនេះ អ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា មានប្រសាសន៍ថា ការដែល គ.ជ.ប រៀបចំឲ្យមានប្រព័ន្ធផ្ដល់ព័ត៌មានជាសំឡេងនេះគឺសង្ឃឹមថា ប្រជាពលរដ្ឋនឹងទទួលបានព័ត៌មានស្ដីពីការចុះឈ្មោះបោះឆ្នោតកាន់តែងាយស្រួល។ លោកបន្ដថា ការសម្រេចបង្កើតឲ្យមានប្រព័ន្ធនេះពីព្រោះតែ គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប មើលឃើញថា បច្ចុប្បន្នប្រជាពលរដ្ឋ ភាគច្រើន មានទូរស័ព្ទប្រើ ។
លោក ហង្ស ពុទ្ធា បញ្ជាក់ដែរថា គណៈកម្មាធិការជាតិរៀបចំការបោះឆ្នោតបានធ្វើគ្រប់យ៉ាងដើម្បីផ្ដល់ព័ត៌មានទៅពលរដ្ឋស្ដីពីការចុះឈ្មោះបោះឆ្នោតនេះ ទៅតាមតួនាទីរបស់ខ្លួន ហើយក៏សង្ឃឹមថា ពលរដ្ឋនឹងចូលរួមជួយសហការជាមួយ គ.ជ.ប វិញដូចគ្នា។
សូមជម្រាបថា គិតពីថ្ងៃទី ០១ កញ្ញា ដល់ថ្ងៃទី ២១ វិច្ឆិកា ឆ្នាំ ២០១៦ ចំនួនប្រជាពលរដ្ឋដែលមានអាយុគ្រប់ ១៨ឆ្នាំឡើងទៅ គឺបានទៅចុះឈ្មោះបោះឆ្នោតមានចំនួនប្រមាណជាង ៧លាន ៤សែននាក់។ ដំណើការចុះឈ្មោះបោះឆ្នោតនឹងបិតបញ្ចប់នៅថ្ងៃទី ២៩ វិច្ឆិកា ឆ្នាំ ២០១៦ វេលាម៉ោង ៥ និង ៣០នាទីរសៀល៕
