សៀងហៃ ៖ ប្រទេសចិនបានឱ្យដឹងថា កងទ័ពចិនកំពុងប្រុងប្រយ័ត្នខ្ពស់ បន្ទាប់ពីក្រុមប្រដាប់អាវុធនៅក្នុងប្រទេសមីយ៉ាន់ម៉ា បានវាយប្រហារមកលើពួកយោធា។ ប៉ូលីសបានប្រកាសបិទការបែងចែកប៉ុស្តិ៍ព្រំដែនរបស់ពួកគេនៅចុងសប្តាហ៍នេះ។ ជាមួយគ្នានេះដែរ កងទ័ពចិនបានប្រកាសនឹងធ្វើសកម្មភាពដើម្បីការពារពលរដ្ឋ និងទ្រព្យសម្បត្តិរបស់ខ្លួននៅក្នុងតំបន់ដែនអធិបតេយ្យរបស់ខ្លួន។
ទីភ្នាក់ងារព័ត៌មានចិន ស៊ីនហួ បានរាយការណ៍ជាផ្លូវការកាលពីថ្ងៃអាទិត្យ ទី២០ វិច្ឆិកាថា ក្រុមប្រដាប់អាវុធបីក្រុម បានវាយប្រហារដំណាលគ្នាលើប៉ុស្តិ៍សន្តិសុខនៅព្រំដែនក្នុងទីក្រុង Muse និងទីក្រុង Kutkai នៃភាគឦសាន រដ្ឋសាន របស់ប្រទេសមីយ៉ាន់ម៉ាកាលពីពេលថ្មីៗនេះ។
ទីភ្នាក់ងារ ស៊ីនហួ បានស្រង់សម្តីប្រភពសុំមិនបញ្ចេញអត្តសញ្ញាណបានលើកឡើងថា មានយោធានិងជនស៊ីវិលបានស្លាប់និងរងរបួស ប៉ុន្តែពួកគេមិនបានផ្តល់ព័ត៌មានលម្អិតផ្សេងៗទៀតនោះទេ។
ក្រសួងការពារជាតិចិន បានឱ្យដឹងក្នុងសេចក្តីថ្លែងការណ៍មួយលើគេហទំព័ររបស់ខ្លួន ដោយសង្ឃឹមថា នឹងមានស្ថានភាពស្ងប់ស្ងាត់ និងរក្សាភាពអត់ធ្មត់ ដើម្បីទប់ស្កាត់ភាពតានតឹង កុំឱ្យមានការកើនឡើង បន្ថែមទៀត។
សេចក្តីថ្លែងការណ៍ក្រសួងចិននិយាយថា៖«កងទ័ពចិនមានការប្រុងប្រយ័ត្នខ្ពស់ នឹងចាត់វិធានការចាំបាច់ដើម្បីការពារអធិបតេយ្យភាព និង សុវត្ថិភាពរបស់ប្រទេស ព្រមទាំងបន្ថែមការការពារជីវិតមនុស្ស និងទ្រព្យសម្បត្តិរបស់ពលរដ្ឋចិន ដែលរស់នៅតាមបណ្តោយព្រំដែនជាមួយភូមា»។
សូមរម្លឹកថា ការវាយប្រយុទ្ធគ្នារវាងពួកយោធា និងក្រុមប្រដាប់អាវុធជនជាតិភាគតិចនៅរដ្ឋ Shan បានបង្កឱ្យមនុស្សរាប់ពាន់នាក់ត្រូវបានផ្លាស់ទីលំនៅ ផ្ទះសម្បែងមួយចំនួនត្រូវបានបិទទ្វារ ចំណែកសកម្មភាពដោះដូរទំនិញនៅតាមព្រំដែនចិន និង ថៃ ជាមួយភូមាវិញក៏ត្រូវផ្អាក់ផងដែរ៕ប្រភព៖CNA
