ភ្នំពេញ ៖ ខណៈយុទ្ធនាការចុះឈ្មោះបោះឆ្នោត រៀបចំបញ្ជីបោះឆ្នោតថ្មី នៅសល់តែរយៈ ១០ថ្ងៃ សម្តេចនាយករដ្ឋមន្ត្រី ហ៊ុន សែន នៅព្រឹកថ្ងៃទី១៩ វិច្ឆិកានេះ បានអំពាវនាវឱ្យប្រជាពលរដ្ឋប្រញាប់ទៅចុះឈ្មោះបោះឆ្នោតឱ្យបានគ្រប់ៗគ្នា។
សម្តេចនាយករដ្ឋមន្ត្រីបានសរសេរនៅលើទំព័រហ្វេសថា៖ «សំខាន់ខ្លាំងណាស់ គឺនៅសល់តែ ១០ ថ្ងៃទៀតទេ! សូមបងប្អូនប្រជាពលរដ្ឋប្រញាប់ទៅចុះឈ្មោះបោះឆ្នោតអោយបានគ្រប់គ្នា។ កន្លែងចុះឈ្មោះបោះឆ្នោតគឺបើកធ្វើការទាំងថ្ងៃសៅរ៍ និងអាទិត្យ។»
ការអំពាវនាវរបស់សម្តេចនាយករដ្ឋមន្ត្រីហ៊ុន សែន ស្របពេលដែលមេដឹកនាំគណបក្សប្រឆាំងទាំងពីររូបគឺលោក សម រង្ស៊ី ដែលកំពុងរស់នៅនិរទេសខ្លួននៅបរទេស និងលោក កឹម សុខា កំពុងជាប់ឃុំនៅទីស្នាក់ការបក្សរបស់ខ្លួន ក៏បានអំពាវនាវឱ្យប្រជាពលរដ្ឋ ជាពិសេសពលករចំ ណាកស្រុក មកចុះឈ្មោះឱ្យបានទាន់ពេលកំណត់ នៃដំណើការចុះឈ្មោះបោះឆ្នោត ដែលនឹងបិទបញ្ចប់នៅថ្ងៃទី ២៩ វិច្ឆិកា ឆ្នាំ២០១៦។
សេចក្តីប្រកាសព័ត៌មានបណ្តោះអាសន្នរបស់ គ .ប.ជ.នៅថ្ងៃទី១៩វិច្ឆិកានេះ បានឱ្យដឹងថា ចាប់ពីថ្ងៃទី០១ ខែកញ្ញា ដល់ថ្ងៃទី១៨ វិច្ឆិកា គិតត្រឹមម៉ោង ៦ ល្ងាច ពលរដ្ឋដែលបានចុះឈ្មោះបោះឆ្នោតមានចំនួន ៧ ៣០៤ ៦៦៣នាក់ ស្មើនឹង៧៥.២៨%។
សូមជម្រាបផងដែរថា កាលពីថ្ងៃ ១៨ ម្សិលមិញ តំណាងរាស្ត្ររបស់គណបក្សប្រឆាំងបីរូប ដែលកំពុងជាប់ឃុំនៅពន្ធនាគារព្រៃស គឺលោក ហុង សុខហួរ អតីតសមាជិកព្រឹទ្ធសភាមកពីគណបក្សសម រង្ស៊ី លោក អ៊ុំ សំអាន សមាជិកសភាគណបក្សសង្គ្រោះជាតិ និងលោក មាជ សុវណ្ណារ៉ា មន្ត្រីជាន់ខ្ពស់គណបក្សសង្គ្រោះជាតិ តាមរយៈលិខិតមួយដែលមានផ្តិតមេដាយរបស់អ្នកទាំងបីរូប បានអំពាវនាវឱ្យប្រជាពលរដ្ឋ ព្រមទាំងព្រះសង្ឃដែលមិនទាន់ទៅចុះឈ្មោះបោះឆ្នោត ប្រញាប់ទៅចុះឈ្មោះបោះឆ្នោត។ ដោយអ្នកទាំងបីនោះលើកឡើងថា មានតែសន្លឹកឆ្នោតបងប្អូនទេ ទើបអាចផ្លាស់ប្តូរសង្គមមួយដែលពោរពេញដោយការឈឺចាប់ និងភាពអយុត្តិធម៌បាន៕
