ភ្នំពេញ៖ លោក ហុង សុខហួរ អតីតសមាជិកព្រឹទ្ធសភា លោក អ៊ុំ សំអាន សមាជិករដ្ឋសភា និងលោក មាជ សុវណ្ណារ៉ា មន្ត្រីជាន់ខ្ពស់បក្សប្រឆាំង បច្ចុប្បន្នពួកគាត់កំពុងជាប់ឃុំនៅពន្ធនាគារព្រៃស បានជំរុញឱ្យប្រជាពលរដ្ឋ ព្រមទាំងព្រះសង្ឃដែលមិនទាន់ទៅចុះឈ្មោះបោះឆ្នោត ប្រញ៉ាប់ទៅចុះឈ្មោះបោះឆ្នោត ខណៈដែលយុទ្ធនាការនៃការចុះឈ្មោះបោះឆ្នោត នៅសល់តែ១១ថ្ងៃទៀតប៉ុណ្ណោះ។
សេចក្តីអំពាវនាវ ដោយមានស្នាមផ្តិតមេដៃ របស់អ្នកជាប់ពិរុទ្ធទាំ បីរូបនេះ ធ្វើឡើងនៅថ្ងៃទី១៨ វិច្ឆិកានេះ ដោយបានសរសេរថាមានឈ្មោះក្នុងបញ្ជីបោះឆ្នោត គឺជាលក្ខខណ្ឌចាំបាច់ ដើម្បីទទួលបានសិទ្ធិបោះឆ្នោតនៅថ្ងៃទី ៤ខែមិថុនា ឆ្នាំ២០១៧។
សេចក្តីអំពាវនាវមានខ្លឹមសារដូចនេះថា ៖ «មានតែសន្លឹកឆ្នោតបងប្អូនទេ ទើបអាចផ្លាស់ប្តូរសង្គមមួយដែលពោរពេញដោយការឈឺចាប់ និងភាពអយុត្តិធម៌បាន។ យើងខ្ញុំទាំងអស់គ្នា សង្ឃឹម យ៉ាងមុតមាំថា ព្រះសង្ឃ ព្រមទាំងប្រជាពលរដ្ឋខ្មែរទាំងអស់ ដែលមានសិទ្ធិបោះឆ្នោត ហើយមិនទាន់បាននិមន្ត និងអញ្ជើញទៅចុះឈ្មោះបោះឆ្នោត នឹងនិមន្ត អញ្ជើញទៅចុះឈ្មោះបោះឆ្នោតបានគ្រប់អង្គ និងគ្រប់គ្នា»។
ការអំពាវនាវរបស់ អ្នកជាប់ពិរុទ្ធភាពទាំងបីរូប ធ្វើឡើងបន្ទាប់ពី លោក សម រង្ស៊ី ប្រធានគណបក្សប្រឆាំង បានផ្ញើសារជាច្រើនជំរុញឱ្យពលរដ្ឋទៅចុះឈ្មោះបោះឆ្នោត ឱ្យបានគ្រប់ៗគ្នាព្រោះថ្ងៃបិទការចុះឈ្មោះបោះឆ្នោត នឹងចូលមកដល់នៅថ្ងៃទី២៩ ខាងមុខនេះ។លោក សម រង្ស៊ី ថាការបោះឆ្នោត នឹងនាំមកនូវការផ្លាស់ប្ដូរ ដោយវិជ្ជមាននៅកម្ពុជា។
តាមសេចក្តីប្រកាសព័ត៌មានបណ្តោះអាសន្នរបស់ គ.ជ.ប នៅថ្ងៃទី១៨នេះ ចាប់ពីថ្ងៃទី០១ ខែកញ្ញា ដល់ថ្ងៃទី១៧ ខែវិច្ឆិកា ឆ្នាំ២០១៦គិតត្រឹមម៉ោង ១៨ល្ងាច មានពលរដ្ឋចុះឈ្មោះបោះឆ្នោត ៧២៧៣៧៤៨នាក់ ស្មើនឹង៧៥,២៦ភាគរយ៕
