ភ្នំពេញ៖ លោក អាត់ ធន់ ប្រធានសហភាពការងារកម្ពុជា បានផ្ដល់បទសម្ភាសន៍វិទ្យុស្ដ្រីដឹងថា ក្រុមអ្នកបើកបរឡានកាពីតូលដែលត្រូវបានបណ្ដេញចេញពីការងារ និងវាយអោយរងរបួសដោយសាអំពើហិង្សា បានយកញត្តិដាក់ទៅខុទ្ទកាល័យ សម្ដេចនាយករដ្ឋមន្ដ្រី ហ៊ុន សែន នៅព្រឹកនេះ។
តាមលោក អាត់ ធន់ មន្ដ្រីខុទ្ទកាល័យសម្ដេចនាយករដ្ឋមន្ដ្រី ហ៊ុន សែន បានទទួលយកញត្តិពីក្រុមអ្នកបើកបរឡានកាពីតូល រួចហើយ។
លោកបានបញ្ជាក់ទៀតថា បន្ទាប់ពីក្រុមអ្នកបើកបរឡានកាពីតូល យកញត្តិដាក់ទៅខុទ្ទកាល័យនាយករដ្ឋមន្ដ្រី ពួកគាត់នឹងបន្ដដាក់ញត្តិទៅតុលាការក្រុងភ្នំពេញ។
តាមសេចក្ដីជូនដំណឹង ក្រុមអ្នកបើកឡានកាពីតូល ដែលបានហែរក្បូនទៅកាន់ផ្ទះសម្ដេច នាយករដ្ឋ មន្ដ្រី ហ៊ុន សែន នៅថ្ងៃទី១៨ ខែវិច្ឆិកា ឆ្នាំ២០១៦នេះ គឺ ដើម្បីស្វែងរកដំណោះស្រាយ ដែលថៅកែក្រុមហ៊ុន រំលោភច្បាប់ការងារ បញ្ឈប់ពួកគាត់ ៤៥នាក់ ពីការងាររយៈពេលជាង ១ឆ្នាំ៕
