អ្នកនាំពាក្យក្រសួងយុត្តិធម៌ លោក គឹម សន្តិភាព បានអំពាវនាវឱ្យប្រជាពលរដ្ឋ និងសាធារណៈមតិផ្តល់ទំនុកចិត្តដល់ស្ថាប័នអនុវត្តច្បាប់ ។ នេះបើតាមការឱ្យដឹងពីលោក គឹម សន្តិភាពដែលបានប្រាប់ក្រុមអ្នកសារព័ត៌មាន តាមរយៈសារអេទ្បិចត្រូចនិចតេលេក្រាម កាលពីថ្ងៃ ទី១៦ វិច្ឆិកា ឆ្នាំ២០១៦។
ការអំពាវនាវនេះបន្ទាប់ពីបណ្តាញសារព័ត៌មាន និងបណ្តាញសង្គមមួយចំនួន បានចុះផ្សាយ និងផ្សព្វផ្សាយករណីហឹង្សា ដែលនាំឱ្យមានការចាប់អារម្មណ៍ពីសំណាក់សាធារណៈមតិ។លោក ជួន សារ៉េត រាយការណ៍៖
លោក គឹម សន្តិភាព បានសរសេរនៅក្នុងបណ្តាញសង្គមតេលេក្រាម ប្រាប់ក្រុមអ្នកសារ ព័ត៌មាន ថា ក្នុងរយៈពេលប៉ុន្មានថ្ងៃកន្លងមកនេះនៅលើបណ្តាញសារព័ត៌មាន ក៏ដូចជា នៅ លើបណ្តាញទំនាក់ទំនងសង្គម មានការផ្សព្វផ្សាយករណីហឹង្សាមួយចំនួន ដែលនាំឱ្យមានការចាប់អារម្មណ៍ពីសំណាក់សាធារណៈមតិទៅលើករណីទាំងនេះ។ លោកបន្តថា ករណីនេះបាននាំឱ្យមានការវាយតម្លៃដោយភ័ន្តច្រឡំ ទៅលើការអនុវត្តច្បាប់របស់សមត្ថកិច្ច និងស្ថាប័នតុលាការ។
ការលើកទ្បើងដូចនេះបន្ទាប់ពីមានករណីផ្ទុះអំពើហឹង្សាមួយ ទៅលើកញ្ញា ពេជ្រ អាវីហ្សា ដែលជាតារាសម្តែងត្រូវបានគេដឹងថាអ្នកដែលបានបង្ក អំពើហឹង្សាទៅលើតារាសម្តែងរូបនេះ គឺ ឈ្មោះ គៀង ហេង ជាអតីតសង្សាររបស់នាង កាលពីយប់ថ្ងៃទី១៣ខែវិច្ឆិកា នៅក្លឹប LV ក្នុងខេត្តព្រះសីហនុ ខណៈដែលនាងបានធ្វើដំណើរទៅកម្សាន្ត ក្នុងឱកាសបុណ្យអំទូកថ្ងៃទី០១។
ជុំវិញនឹងការប្រើប្រាស់អំពើហឹង្សានេះ លោក គឹម សន្តិភាព បានលើកទ្បើងថាករណីបង្ក ហឹង្សាទាំងនេះជាករណីព្រហ្មទណ្ឌដែលស្ថាប័នអយ្យការ និងស្ថាប័នមានសមត្ថកិច្ចពាក់ព័ន្ធកំពុងតែចាត់វិធានការស៊ើបអង្កេត យ៉ាងយកចិត្តទុកដាក់ដើម្បីឈានទៅដល់ ការផ្តន្ទាទោសជនល្មើសតាមច្បាប់។ លោក គឹម សន្តិភាព សង្កត់ធ្ងន់ថាការសម្របសម្រួលសំណងជាផ្នែកមួយនៃដំណោះស្រាយផ្ទាល់រវាងភាគី តែពុំអាចផ្អាក ឬបញ្ចប់នីតិវិធី ក្នុងរឿងព្រហ្មទណ្ឌបាននោះទេ។ ក្នុងន័យនេះ អ្នកនាំពាក្យក្រសួងយុត្តិធម៌បាន អំពាវនាវដល់ជនរងគ្រោះ ប្រជាពលរដ្ឋ និងសាធារណៈមតិផ្តល់ទំនុកចិត្តដល់ស្ថាប័នអនុវត្តច្បាប់ និងសូមចូលរួមផ្តល់នូវសក្ខីកាមនានា ជូនដល់ស្ថាប័នអយ្យការទាក់ទងនឹងករណីទាំងអស់នេះ។
ទាក់ទងនឹងការលើកទ្បើងនេះដែរ នាយកប្រតិបត្តិ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សុងត្រាល់) (central) លោក មឿន តុលា បានផ្តល់បទសម្ភាសន៍ឱ្យវិទ្យុស្ត្រីថា ការអំពាវនាវវាជារឿងមួយ ប៉ុន្តែអ្វីដែលសំខាន់គឺប្រជាពលរដ្ឋពិតជាយល់ដឹងយ៉ាងច្បាស់ថាប្រព័ន្ធតុលាការ នៅកម្ពុជាអព្យាក្រឹត្យឬមិនអព្យាក្រឹត្យ។
លោក លោក មឿន តុលា ៖ «ទី០១ ខ្ញុំយល់ថាច្បាប់គ្រប់គ្រងចៅក្រម ព្រះរាជអាជ្ញា ហើយនឹងច្បាប់គ្រប់គ្រងដំណើរការនៃការប្រព្រឹត្តិ ទៅនៃប្រព័ន្ធតុលាការនេះគួរតែធ្វើវិសោធនកម្មដើម្បីឱ្យរដ្ឋបាលតុលាការនេះទៅជាឯករាជ្យមិនស្ថិតនៅក្រោមចំណុះ របស់ក្រសួងយុត្តិធម៌ទេ ឬក៏ស្ថិតនៅក្រោមចំណុះរដ្ឋាភិបាលទេមានន័យថា តុលាការគាត់មានកញ្ចប់ថវិកាមួយឯករាជ្យរបស់គាត់តែម្តងដែលកំណត់ដោយរដ្ឋសភា ទី០២ កាលណាបើច្បាប់អស់ហ្នឹងកែតំរូវហើយយើងចង់ឃើញចៅក្រមដែលគាត់បំពេញតួនាទី ជាក្រុមហ្នឹងគឺឱ្យចេញពីតួនាទីរបស់គណបក្សនយោបាយ កុំឱ្យគាត់មានតួនាទីជាន់ខ្ពស់ក្នុងគណបក្សនយោបាយ»។
ចំណែកអ្នកឃ្លាំមើលស្ថានការណ៍សង្គម និងនយោបាយ លោក គឹម សុខ បានផ្តល់បទសម្ភាសន៍ឱ្យវិទ្យុស្ត្រីថា ស្ថាប័នដែលមានតួនាទីអនុវត្តច្បាប់គួរតែកែ តម្រូវស្ថាប័នរបស់ខ្លួន ឱ្យបានល្អប្រសើរស្របតាមឆន្ទៈច្បាប់ពិតប្រាកដ ជាជាងធ្វើការអំពាវនាវឱ្យប្រជាពលរដ្ឋមានជំនឿចិត្តទៅលើស្ថាប័នដែលជាអ្នកអនុវត្តច្បាប់។
លោក គឹម សុខ បន្តថា អ្នកអនុវត្តច្បាប់ធំជាងគេ គឹអំណាចនីតិប្រតិបត្តិ និងអំណាចតុលាការ ប៉ុន្តែប្រសិនបើមន្ត្រីដែលមានតួនាទីគ្រប់គ្រងអំណាច ទាំងនេះមិនអាចធានាបាននូវការរក្សាអារម្មណ៍ផ្លូវចិត្តរបស់ប្រជាពលរដ្ឋបានទេនោះ ថាតើឱ្យប្រជាពលរដ្ឋទុកចិត្តទៅលើ ស្ថាប័នតុលាការបានយ៉ាងណា។
លោក គឹម សុខ ៖«ដើម្បីឆ្លុះបញ្ចាំងរឿងហ្នឹងត្រូវចាត់វិធានការជាក់ស្តែងមួយគឺវិធានារនៃការមិនរើសអើងនៅចំពោះមុខជនទាំងទ្បាយណា ទោះបីជាមានអំណាច ឬគ្មានអំណាចក្តីដើម្បីពលរដ្ឋឱ្យបានច្បាស់ថាខ្លួន ឬរដ្ឋាភិបាល ឬមន្ត្រីអនុវត្តច្បាប់ឬមន្ត្រីតុលាការបានចាត់ទុកយុត្តិធម៌ នៅលើច្បាប់ទៅទៀតបានន័យថា គ្រប់បញ្ហាដែលមានត្រូវតែកំណត់ឱ្យបានច្បាស់នៅទិសដៅស្វែងរកយុត្តិធម៌ឱ្យបានជ្រះស្រទ្បះ ដល់ពលរដ្ឋក្នុងសង្គមដែលមានតែបញ្ហាពាក់ព័ន្ធ»។
បើនិយាយពីការស្វែងរកយុត្តិធម៌ សម្រាប់ជនរងគ្រោះគឺមានករណីច្រើនកើតទ្បើងនៅកម្ពុជា ដូចជាករណីតារាមួយចំនួនត្រូវបានវាយប្រហារដោយទឹកអាស៊ីដ និងតារាខ្លះវាយប្រហាររហូតដល់គ្រាប់កាំភ្លើងទៀតផង តែគេពុំទាន់ឃើញជនដៃដល់ត្រូវបាននាំខ្លួនមកប្រឈមមុខនឹងយុត្តិធម៌នោះទេ។ ករណីហឹង្សានយោបាយ ឬការគុំគួនមួយចំនួនទៀតក៏ជនរងគ្រោះនៅតែទទូចសុំយុត្តិធម៌ពីប្រព័ន្ធច្បាប់ជានិច្ច៕
