នៅចុងសប្ដាហ៍នេះ ប្រជាជននៅទីក្រុងកូឡាឡាំពួរ ប្រមាណជា២០ម៉ឺននាក់នឹងចាប់ផ្ដើមបន្ដធ្វើបាតុកម្មជាថ្មីម្ដងទៀត ដើម្បីទាមទារអោយនាយករដ្ឋមន្ដ្រី ណាជិប រ៉ាហ្សាក់ លាលែងពីតំណែង ករណីអំពើពុករលួយ នូវទឹកប្រាក់ ៧០០លានដុល្លារសហអាមេរិក។
តាមបណ្ដាញផ្សាយព័ត៌មាន Channel News Asia បាតុកម្មនេះ ដឹកនាំដោយអង្គការសង្គមស៊ីវិលដ៏ល្បីឈ្មោះជាងគេ គឺ អង្គការកំណែទម្រង់ការបោះឆ្នោតហៅកាត់ថា Bersih, ដែលបាតុកម្មនេះ ត្រូវធ្វើឡើងនៅថ្ងៃសៅរ៍សបា្ដហ៍នេះ។
តាមបណ្ដាញផ្សាយព័ត៌មានដដែលនេះ អង្គការកំណែទម្រង់ការបោះឆ្នោតត្រូវធ្វើយុទ្ធនាការ រយៈពេលចំនួន៦សប្ដាហ៍ ដោយធ្វើយ៉ាងណាអោយមានការឆ្លើយតប ពីនាយករដ្ឋមន្ដ្រី ណាជិប រ៉ាហ្សាក់។ បន្ថែមលើនេះ អតីតនាយករដ្ឋមន្ដ្រីជើងចាស់ម្នាក់ លោកបណ្ឌិត មហាធា មហាមាដ ក៏បានប្រកាសថា លោកនឹងចូលរួមមហាបាតុកម្មនេះដែរ។ លោក មហាធា បានបញ្ជាក់ថា លោកចង់ឱ្យ នាយករដ្ឋមន្ត្រីណាជិប លាលែងពីតំណែង។
សូមរម្លឹកថាលោក ណាជិប រ៉ាហ្សាក់ មានរឿងអាស្រូវពុករលួយមានទឹកប្រាក់ប្រមាណជា ៧០០លានដុល្លារសហអាមេរិកដែលលោកត្រូវបានគេចោទថា បានលួចបង្វិលប្រាក់ទាំងនេះពី ធនាគាររបស់រដ្ឋ ដាក់ចូលទៅក្នុងគណនីរបស់ខ្លួន។ តែបែបនេះក្ដី លោក ណាជិប រ៉ាហ្សាក់ បដិសេធចំពោះការចោទប្រកាន់នេះ៕ប្រភព:CNA
