ភ្នំពេញ: សភាស៊ើបសួរសាលាឧទ្ធរណ៍បានច្រានចោលករណីសុំប្ដឹងនៅក្រៅឃុំរបស់អ្នកស្រី ទេព វន្នី តំណាងសហគមន៍បឹងកក់ ដោយសម្រេចតម្កល់ទុកសេចក្ដីសម្រេចរបស់សាលារាជធានីភ្នំពេញ។
តាមសេចចក្ដីរាយការណ៍ លោក ងួន រតនា ប្រធានក្រុមប្រឹក្សាជំនុំជម្រះសភាស៊ើបសួរសាលាឧទ្ធរណ៍ សម្រេចបដិសេធសំណើ គឺ ធ្វើឡើងបន្ទាប់ពីបាននាំខ្លួនអ្នកស្រី ទេព វន្នី ចូលសវនាការនៅព្រឹកថ្ងៃទី១៧ ខែវិច្ឆិកានេះ។
កាលពីថ្ងៃទី២២ សីហា ឆ្នាំ២០១៦ សាលាដំបូងរាជធានីភ្នំពេញ បានបើកសវនាការជំនុំជម្រះសំណុំរឿងលើសកម្មជនដីធ្លីស្ត្រីបឹងកក់ពីរនាក់ ដែលសកម្មក្នុងយុទ្ធនាការ «ថ្ងៃចន្ទព័ណ៌ខ្មៅ» ដើម្បីទាមទារឲ្យដោះលែងមន្ត្រីសមាគមអាដហុក និងមន្ត្រីគ.ជ.ប រួមទាំងទាមទារឲ្យអាជ្ញាធរមានសមត្ថកិច្ច ស្វែងរកយុត្តិធម៌ក្នុងអំពើ ឃាតកម្មបាញ់សម្លាប់លោកបណ្ឌិត កែម ឡី។
ភ្លាមៗបន្ទាប់ពីការនាំខ្លួនចូលតុលាការ អ្នកស្រី ទេព វន្នី ត្រូវបានចោទ ពី បទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា ៤៩៥ នៃក្រមព្រហ្មទណ្ឌ មកជាបទប្រមាថ។ តែបន្ទាប់ពីសវនាការរួចមក ចៅក្រមសាលាដំបូងរាជធានីភ្នំពេញ បានបង្គាប់ឲ្យអ្នកស្រី ទេព វន្នី និង អ្នកស្រី ប៉ូវ សោភា បង់ប្រាក់ពិន័យប្រាក់ម្នាក់ៗចំនួន ៨ ម៉ឺនរៀល និងដាក់ពន្ធនាគាររយៈពេល ៦ថ្ងៃ។
បើតាមបទចោទថ្មីនេះ គឺ អ្នកស្រី ទេព វន្នី អាចនឹងត្រូវតុលាការដោះលែង ប៉ុន្តែ អ្នកស្រី ទេព វន្នី នៅជាប់ បណ្តឹងមួយទៀត គឺ ពីបទហិង្សានៅក្បែរភូមិគ្រឹះនាយករដ្ឋមន្ត្រី កាលពីឆ្នាំ ២០១៣។
អ្នកស្រី ទេព វន្នី ត្រូវគេដឹងថា ជាតំណាងស្ត្រីបឹងកក់ និងជាសកម្មជនខ្លាំងជាងគេក្នុងការតវ៉ាក្នុងជម្លោះបញ្ហាដីធ្លី។ ក្រៅពីនេះ អ្នកស្រីក៏បានចូលរួមក្នុងការទាមទាររកយុត្តិធម៌ជាច្រើនជុំវិញបញ្ហារំលោភសិទ្ធិមនុស្ស នៅកម្ពុជា៕
