ប្រធានាធិបតីសហរដ្ឋអាមេរិកដែលទើបជាប់ឆ្នោត លោក ដូណាល់ត្រាំ បញ្ជាក់ថា ជំនួបរបស់លោកនៅថ្ងៃព្រហស្បត្តិ៍នេះ ជាមួយនាយករដ្ឋមន្ដ្រីជប៉ុន ស៊ិន សូអាបេ គឺជាការធានាឡើងវិញនូវការផ្សារទំនាក់ទំនងអាមេរិក-ជប៉ុន បន្ទាប់ពីលោកបានប្រើវោហាសាស្ដ្រ ប៉ះទង្គិចជាមួយសម្ព័ន្ធមិត្តអាមេរិកអាស៊ី ខាងកើតមួយនេះ ក្នុងយុទ្ធនាការរកសម្លេងឆ្នោតកន្លងមក។
លោក អាបេ នឹងជួបលោកដូណាល់ត្រាំ នៅទីក្រុងញ៉ូវយ៉ក ថ្ងៃព្រហស្បត្តិ៍នេះ ដែលក្នុងជំនួបនោះ ទីភ្នាក់ងារសារព័ត៌មានរ៉យទ័រ បានរាយការណ៍មកថា លោកអាបេ នឹងលើកឡើងអំពីកិច្ចសហប្រតិបត្តិការទ្វេភាគីលើវិស័យពាណិជ្ជកម្ម និងការការពារជាតិនៅចំពោះមុខលោក ដូណាល់ត្រាំ។
លោក ដូណាល់ត្រាំ បានបញ្ជាក់ទៀតថា ជំនួបរបស់លោកជាលើកដំបូង និងដោយផ្ទាល់ជាមួយមេដឹកនាំបរទេសនេះ គឺ លោកនឹងព្យាយាមអោយមេដឹកនាំទាំងនោះ យល់អំពីការកែទម្រង់មួយចំនួនរបស់លោក ខណៈលោកជាប្រធានាធិបតីអាមេរិក។
តែយ៉ាងណាក៏ដោយ ទីប្រឹក្សារបស់លោកត្រាំ ម្នាក់បានអះអាងថា ប្រធានាធិបតីអាមេរិកដែលទើបជាប់ឆ្នោតរូបនេះ នៅតែចាត់ទុកជប៉ុនជាសម្ព័ន្ធមិត្តរបស់អាមេរិកដ៏សំខាន់មួយដដែល។
នៅក្នុងយុទ្ធនាការរកសម្លេងឆ្នោតលោកដូណាល់ត្រាំ ធ្លាប់បានបោះពាក្យសម្ដីឱ្យប្រទេសជប៉ុន កសាងអាវុធនុយក្លេអ៊ែរដោយខ្លួនឯង និងបង់ការចំណាយលើវត្តមានរបស់កងទ័ពអាមេរិក ដែលមាននៅលើទឹកដី ប្រទេសជប៉ុនសព្វថ្ងៃ។
ចំណែកកិច្ចព្រមព្រៀងពាណិជ្ជកម្មដៃគូ អន្ដរអាស៊ីប៉ាស៊ីហ្វិក ហៅកាត់ថា TPP លោកដូណាល់ត្រាំគំរាមថា នឹងរំលាយផងដែរ។
លោក អាបេ ដែលបានទៅជួបលោក ដូណាល់ត្រាំ នៅថ្ងៃនេះ លោកនឹងលើកឡើងអំពីកិច្ចព្រមព្រៀងពាណិជ្ជកម្មដែលមានសមាជិក ១២ប្រទេស ជាមួយលោកត្រាំឡើងវិញ៕ប្រភព:CNA
