វ៉ាស៊ីនតោន៖លទ្ធផលបោះឆ្នោតជ្រើសរើសប្រធានាធិបតីអាមេរិកជាផ្លូវការបង្ហាញថា លោក ដូណាល់ត្រាំ បេក្ខជនមកពីគណបក្សសាធារណរដ្ឋបានឈ្នះសមាជិកគណៈអ្នកបោះឆ្នោត (Members of the electoral college ) ចំនួន ៣០៦ ខណៈលោកស្រី គ្លីនតុន ទទួលបានតែ ២៣២ សមាជិកគណៈអ្នក បោះឆ្នោត។ នេះបើយយោងតាមការចុះផ្សាយរបស់គេហទំព័រ Wikipedia របស់សហរដ្ឋអាមេរិកដែលបានចុះផ្សាយនៅថ្ងៃសៅរិ៍ទី ១២ វិច្ឆិកា ឆ្នាំ២០១៦នេះ។
តាមលទ្ធផលនេះលោក ដូណាល់ត្រាំ បានក្លាយជាប្រធានាធិបតីលើកទី ៤៥នៃសហរដ្ឋអាមេរិកមកពីគណបក្សសាធារណរដ្ឋដែលគេហៅថា ក្រុមស្ដាំនិយម ។
ប្រជាជនចេញទៅបោះឆ្នោត
ប្រជាជនអាមេរិកដែលមានសិទ្ធិ ឬអាយុចេញទៅបោះឆ្នោតមានចំនួន ២៣១លាននាក់ តែក្នុងចំនួននេះ អ្នកបានចេញទៅបោះឆ្នោតមានចំនួន ១៣១ លាន៧សែននាក់ប៉ុណ្ណោះដែលស្មើ ៥៦,៩ភាគរយ ។
លោកស្រីគ្លីនតុន ឈ្នះការបោះឆ្នោតប្រជាប្រិយភាព(Popular vote)
តាមលទ្ធផល បោះឆ្នោត លោកស្រី ហ៊ីលឡារី គ្លីនតុន អតីតរដ្ឋមន្ត្រីការបរទេស និងជាបេក្ខជនមកពីគណបក្សប្រជាធិបតេយ្យបានឈ្នះក្នុងការបោះឆ្នោត ប្រជាប្រិយដែលគេបូកសរុបចេញពីអ្នកបោះឆ្នោតគឺលោកស្រីបានសន្លឹកឆ្នោត ៦០លាន ៨សែន ៣ម៉ឺន៩៩២២ ហើយលោក ដូណាល់ត្រាំ បាន ៦០លាន ២សែន ៦ម៉ឺន ៥៨៥៨ គិតជាភាគរយ គឺ ៤៧,៨ភាគរយ និង៤៧,៣ភាគរយ។ តាមតួលេខនេះលោកស្រី គី្លនតុន ឈ្នះលោកដូណាល់ត្រាំ ជាង៥សែន ៧ម៉ឺន សន្លឹក។
គណៈអ្នកបោះឆ្នោត (Members of the electoral college ) ចំនួន ៥៣៨
គណៈអ្នកបោះឆ្នោត ៥៣៨ គឺស្មើនឹងចំនួនសរុបនៃ ការបូកចូលគ្នារវាងសមាជិកសភា (Congressmen )និង ព្រឹទ្ធសភា (Senators)។ សមាជិកសភាមានចំនួន៤៣៥បូកនឹងសមាជិក៣រូបទៀតគេហៅថាឯករាជ្យ (Independent) ហើយសមាជិកព្រឹទ្ធសភា ១០០រូបក្នុងនោះ២រូបជាសមាជិករាជ្យ។ តាមលទ្ធផលនេះគណបក្សសាធារណរដ្ឋឈ្នះបានទាំងសមាជិកសភានិងព្រឹទ្ធសភាហើយទាំងប្រធានរដ្ឋសភានិងព្រឹទ្ធសភាត្រូវគណបក្សស្ដាំនិយមនេះគ្រប់គ្រង។
យ៉ាងណាក៏ដោយលោក ដូណាលត្រាំ នឹងត្រូវបង្ហា ញខ្លួននៅចំពោះមុខសមាជិកគណៈអ្នកបោះឆ្នោតទាំង៥៣៨រូបនៅថ្ងៃទី១៩ ធ្នូ ២០១៦ មុនលោកចូលកាន់តំណែងជាប្រធានាធិបតី នៅថ្ងៃទី២០មករា ឆ្នាំ២០១៧។ លោក ដូណាល់ត្រាំ ឡើងកាន់តំណែងនេះជំនួសប្រធានាធិបតីចាំផ្ទះលោក អូបាម៉ាដែល ត្រូវចាកចេញពីតំណែងបន្ទាប់ពីប្រធានាធិបតីស្បែកខ្មៅរូបនេះបានកាន់តំណែង ៨ឆ្នាំមកហើយ៕
