ភ្នំពេញ ៖ តាមរយៈសេចក្ដីជួនដំណឹងដែលផ្សព្វផ្សាយជាសាធារណៈនៅថ្ងៃទី ១២ វិច្ឆិកានេះបានឲ្យដឹងថា គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានស្នើដល់ក្រសួងព័ត៌ មាន និងសាលារាជធានីភ្នំពេញ ក្នុងឱកាសព្រះរាជពិធីបុណ្យអុំទូកនេះ សូមជួយផុ្សព្វផ្សាយដើ ម្បីឲ្យពលរដ្ឋរួសរាន់ទៅចុះឈ្មោះបោះឆ្នោតឲ្យបានមុនកាលបរិច្ឆេទបិទបញ្ចប់។
គ.ជ.ប ស្នើទៅក្រសួងព័ត៌មាន និងសាលារាជធានីភ្នំពេញ មានដូចខាងក្រោម៖
• ក្រសួងព័ត៌មាន ៖ ស្នើសុំជួយផ្សព្វផ្សាយសារ ដែលមានខ្លឹមសារសំខាន់ចំនួន ៤ ក្នុងពេលធ្វើអត្ថាធិប្បាយប្រណាំងទូកនាអំឡុងពេលប្រារព្ធព្រះរាជពិធីបុណ្យអុំទូក ដែលប្រព្រឹត្ដទៅចាប់ពីថ្ងៃទី ១៣ ដល់ថ្ងៃទី ១៥ ខែវិច្ឆិកា ឆ្នាំ ២០១៦ ដែលសារទាំង ៤ នោះរួមមាន៖
-ទី ១ សូមអញ្ជើញប្រជាពលរដ្ឋដែលមិនទាន់បានចុះឈ្មោះបោះឆ្នោត ទៅចុះឈ្មោះបោះឆ្នោតឲ្យបានគ្រប់គ្នា យ៉ាងយូរត្រឹមថ្ងៃទី ២៩ ខែវិច្ឆិកា ឆ្នាំ ២០១៦ ដែលជាថ្ងៃចុងក្រោយ។
-ទី ២ សំណូមពរឲ្យបងប្អូនប្រជាពលរដ្ឋដែលបានទទួលព័ត៌មាន ស្ដីពីការចុះឈ្មោះបោះឆ្នោតរួចហើយ សូមជួយផ្សព្វផ្សាយដល់បងប្អូនដែលមិនទាន់បានចុះឈ្មោះបោះឆ្នោតឲ្យទៅចុះឈ្មោះបោះឆ្នោតឲ្យបានគ្រប់គ្នា។
-ទី ៣ សូមប្រើប្រាស់អត្ដសញ្ញាណប័ណ្ណសញ្ញាតិខ្មែរទាំង ៣ ប្រភេទ ឬឯកសារបញ្ជាក់អត្ដសញ្ញាណបម្រើឲ្យការចុះឈ្មោះបោះឆ្នោតដើម្បីចុះឈ្មោះបោះឆ្នោតបាន។
-និងទី ៤ ប្រសិនបើអាសយដ្ឋានក្នុងអត្ដសញ្ញាណប័ណ្ណខុសពីឃុំ សង្កាត់ ដែលខ្លួនត្រូវចុះឈ្មោះសាមីខ្លួនត្រូវយកឯកសារបញ្ជាក់ទីលំនៅ ឬទីសំណាក់ក្នុងឃុំសង្កាត់នោះអមជាមួយអត្ដសញ្ញាណប័ណ្ណសញ្ញាតិខ្មែរដើម្បីចុះឈ្មោះបោះឆ្នោតបាន។
• សាលារាជធានីភ្នំពេញ៖ ស្នើសុំកិច្ចសហការដើម្បីធ្វើការផ្សព្វផ្សាយអប់រំដល់សាធារណជនអំពីការចុះឈ្មោះបោះឆ្នោត ដើម្បីរៀបចំបញ្ជីបោះឆ្នោតថ្មី ឆ្នាំ២០១៦ ក្នុងឱកាសប្រារព្ធព្រះរាជពីធីបុណ្យអុំទូកនេះ។
ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេលបីថ្ងៃគឺចាប់ពីថ្ងៃទី ១៣ ដល់ថ្ងៃទី ១៥ វិច្ឆិកា នេះ គណៈ កម្មាធិការជាតិរៀបចំការបោះឆ្នោតបានសហការជាមួយអង្គការមិនមែនរដ្ឋាភិបាលមួយចំនួន ដែលធ្វើការងារទាក់ទងនិងការបោះឆ្នោត ដើម្បីធ្វើ ការផ្សព្វផ្សាយចល័តតាមមេក្រូតូចៗ និងចែកផ្សាយខិតប័ណ្ណមួយចំនួន ពាក់ព័ន្ធនឹងការអញ្ជើញប្រជាពលរដ្ឋទៅចុះឈ្មោះបោះឆ្នោត។
ការស្នើរបស់ណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប ទៅក្រសួងព័ត៌មាន និងសាលារាជធានីភ្នំពេញដូចនេះ គឺស្របពេលដែលដំណើរការនៃការចុះឈ្មោះបោះឆ្នោតជិតដល់កាលបរិច្ឆេទបិទបញ្ចប់។ ប៉ុន្ដែបើគិតចាប់ ពីថ្ងៃទី ១ កញ្ញា រហូតដល់ថ្ងៃ ១២ វិច្ឆិកា ២០១៦ នេះពល រដ្ឋដែលទៅចុះឈ្មោះបោះឆ្នោតគឺមានប្រមាណជិត ៧៣ ភាគរយប៉ុណ្ណោះ។ ខណៈដែលប្រជាពលរដ្ឋដែលមានអាយុ ១៨ឆ្នាំឡើងទៅដែលមានសិទ្ធិបោះឆ្នោតមានចំនួនប្រមាណជាង ៩លាន ៦សែននាក់។ សូមបញ្ជាក់ថា ដំណើរការចុះឈ្មោះបោះឆ្នោតដើម្បីរៀបចំបញ្ជីបោះឆ្នោតថ្មីឆ្នាំ ២០១៦ គឺចាប់ផ្ដើមពីថ្ងៃទី ០១ កញ្ញា ២០១៦ រហូតដល់ថ្ងៃទី ២៩ ខែវិច្ឆិកា ឆ្នាំ២០១៦៕
