ភ្នំពេញ៖ ក្រសួងធនធានទឹក និងឧតុនិយម បានចេញសេចក្តីប្រកាសព្យាករណ៍ពីអាកាសធាតុនៅកម្ពុជា ចាប់ពីថ្ងៃទី១០ដល់១៦ ខែវិច្ឆិកា ឆ្នាំ២០១៦ ដោយបញ្ជាក់ថា នៅរយៈពេលនេះ នៅកម្ពុជាអាចនឹងមានភ្លៀងធ្លាក់ពីតិចទៅមធ្យម ខណៈរដូវរំហើយនឹងចូលមកដល់នៅសប្តាហ៍ទី៣ ខែវិច្ឆិកានេះ។
តាមសេចក្ដីជូនដំណឹងរបស់ក្រសួងធនធានទឹក ចុះនៅថ្ងៃទី១១ ខែតុលា ឆ្នាំ២០១៦ដដែលនេះ ក៏បញ្ជាក់បន្ថែមថា បន្ទាប់ពីបានតាមដានលើស្ថានភាពអាកាសធាតុរួចមក ឃើញថា សម្ពាធខ្ពស់ពីប្រទេសចិន បាន និងកំពុងបន្ដរំកិលចុះមកទិសខាងត្បូង និងឈានទៅគ្របដណ្ដប់លើព្រះរាជាណាចក្រកម្ពុជា។
ខ្យល់មូសុងឦសាន នឹងចាប់ផ្ដើមមានឥទ្ធិពលើព្រះរាជាណាចក្រកម្ពុជា ចាប់ពីចុងសប្ដាហ៍ទី២ នៃខែវិច្ឆិកានេះតទៅ ។
យោងលើស្ថានភាពនេះ ការព្យាករអាកាសធាតុ បានបង្ហាញដូចខាងក្រោម ៖
១.តំបន់ខ្ពង់រាបខាងជើង និងឦសាន មាននៅសល់ភ្លៀងតិចតួច។
២.តំបន់វាលទំនាបកណ្ដាល៖
-ខេត្តកំពង់ឆ្នាំង ពោធិ៍សាត់ បាត់ដំបង ប៉ៃលិន បន្ទាយមានជ័យ សៀមរាប និងខេត្តកំពង់ធំ នៅមានភ្លៀងតិច។
-រាជធានីភ្នំពេញ ខេត្តស្វាយរៀង ព្រៃវែង កណ្ដាល កំពង់ស្ពឺ តាកែវ និងបណ្ដាខេត្តនៅជាប់មាត់សមុទ្រ កំរិតទឹកភ្លៀងនៅបន្ដមានពីតិចទៅមធ្យម៕
