ភ្នំពេញ៖ប្រធានគណបក្សសង្គ្រោះជាតិលោក សម រង្ស៊ី បានសម្ដែងការអបអរសាទរលោក ដួណាល់ត្រាំ ដែលបានជាប់ឆ្នោតជាប្រធានាធិបតីអាមេរិកលើកទី៤៥ តាមរយៈការបោះឆ្នោតដ៏ស្វិតស្វាញបំផុត ។
លិខិតរបស់លោក សម រង្ស៊ី ដែលវិទ្យុស្ត្រីទទួលបាន នៅយប់ថ្ងៃពុធទី ៩វិច្ឆិកានេះ បាន រៀបរាប់ថា៖«ក្នុងនាមខ្ញុំជាអ្នកតំណាងរាស្ត្រជាប់ឆ្នោតនៃប្រជាជនកម្ពុជាខ្ញុំចូលរួមអបអសាទរលោក ដូណាល់ត្រាំ បានជាប់ធ្វើជាប្រធានាធិបតីអាមេរិក ដែលជាប្រទេសគំរូនៃប្រជាធិបតេយ្យពិភពលោក»។
លោក សម រង្ស៊ី បានសរសេរក្នុងលិខិតលោកទៀតថា បើគិតដល់លទ្ធផលបោះឆ្នោតជាផ្លូវការនិងចុងក្រោយនេះគឺសហរដ្ឋអាមេរិកពិតជានៅតែជួយលើកស្ទួយតម្លៃសិទ្ធិមនុស្ស ប្រជាធិបតេយ្យ យុត្តិធម៌ និងនីតិរដ្ឋ។
លោក បន្តថា៖«ខ្ញុំជឿជាក់ថា នឹងពុំមានការផ្លាស់ប្ដូរជំហរនិងនយោបាយអាមេរិកសម្រាប់កម្ពុជាដែលជារដ្ឋមួយនៅបន្ត ធ្វើឱ្យឈឺចាប់ចំពោះសិទ្ធិមនុស្ស ប្រជាធិបតេយ្យ យុតិ្តធម៌ និង នីតិរដ្ឋ។ ប្រទេសមួយនេះ នៅតែស្ថិតនៅក្រោម ការគ្រប់គ្រងច្បាប់ របស់បក្សតែមួយ បុរសតែម្នាក់ គឺខុសពីអាមេរិកជារដ្ឋមានលទ្ធិប្រជាធិបតេយ្យយ៉ាងសកម្ម និងមាន តុល្យភាពអំណាចការពារមិនឱ្យមានការបំពានអំណាចឡើយ» ។
លិខិតរបស់ប្រធានគណបក្សប្រឆាំងល្បីមួយរូបនេះ ធ្វើឡើងស្របពេល ប្រមុខរដ្ឋាភិបាលកម្ពុជាសម្ដេច ហ៊ុន សែន បានចូលរួមអបអរសាទរលោក ដូណាល់ត្រាំ ដែលបានជាប់ឆ្នោតជាប្រធានាធិបតីអាមេរិក។ លោក ដូណាល់ត្រាំ បេក្ខជនប្រធានាធិបតីមកពីគណបក្សសាធារណរដ្ឋ បានឈ្នះការបោះឆ្នោតដោយទទួលបានសំឡេងគណៈប្រតិភូចំនួន ២៧៨ឈ្នះលោកស្រី គ្លីនតុន បេក្ខជន មកពីគណបក្សប្រជា ធិបតេយ្យ។ ចំណែកលោកស្រី គ្លីនតុន ទទួលបាន ២១៨គណៈប្រតិភូ។លោក ដូណាល់ត្រាំ នឹងចូលកាន់តំណែងនៅថ្ងៃ ២០ មករា ឆ្នាំ២០១៧៕
