ភ្នំពេញ៖ សម្តេច ហ៊ុន សែន ថ្លែងថា ប្រជាពលរដ្ឋខ្មែរគួរស្វែងរកការងារធ្វើនៅក្នុងប្រទេសជាជាងធ្វើការងារនៅក្រៅប្រទេស ព្រោះលក្ខខណមួយចំនួននៅក្រៅប្រទេសមិនល្អសម្រាប់ការរស់នៅនោះទេ។
មន្ត្រីអង្គការសង្គមស៊ីវិលមើលឃើញថា ប្រមុខរដ្ឋាភិបាលគួរមានយន្តការច្បាស់លាស់ក្នុងការដំឡើងប្រាក់ឈ្នួលឲ្យកម្មករក្នុងវិស័យកាត់ដេរសំលៀកបំពាក់ និងស្បែងជើងឲ្យបានសមរម្យ និងគិតគូរពីតម្លៃ និងរកទីផ្សារកសិផលកសិកម្ម។ ស្របពេលនេះ បក្សប្រឆាំងថា ការងារនៅក្នុងស្រុកនៅមានតិចនៅឡើយ ដែលជាហេតុមានការធ្វើចំណាកស្រុក។
សម្ដេចនាយករដ្ឋមន្ដ្រី ហ៊ុន សែន នៅថ្ងៃ ចន្ទ ទី០៧ វិច្ឆិកា នេះ បានលើកឡើងពីលក្ខខណការងារមួយចំនួននៅក្នុងប្រទេសដែលលោកថា ពលរដ្ឋខ្មែរគួរតែស្វះស្វែងរកការងារក្នុងប្រទេសរបស់ខ្លួនជាជាង ទៅក្រៅប្រទេស។ សម្ដេច នាយករដ្ឋមន្ដ្រីដែលទំនងជាលើកដំបូង បាននិយាយយោងដល់ការងារ របស់ពលរដ្ឋខ្មែរ នៅក្នុងប្រទេសប្រៀបធៀបទៅនឹងប្រទេសដទៃ ជាពិសេសគឺប្រទេសភូមា។
សម្ដេចនាយករដ្ឋមន្ដ្រីមានប្រសាសន៍ថា ប្រាក់បៀវត្សសម្រាប់តម្លៃពលកម្មក្នុងប្រទេសបច្ចុប្បន្នក៏មិនតិចជាងប្រទេសជិតខាងដែរ បើប្រៀបធៀបទៅនឹងប្រទេស ភូមា ឬមីយ៉ាន់ម៉ា។ ប្រមុខរដ្ឋាភិបាល ក៏បាន ទទូចឱ្យក្រុមអ្នករិះគន់ ត្រូវពិចារណា ឡើងវិញ ដែលសម្ដេចថា ប្រជាជនប្រទេសភូមាជាច្រើនសែននាក់ ក៏មិនបាន ត្រឡប់ទៅប្រទេសភូមាវិញដែរ។
សម្ដេចនាយករដ្ឋមន្ដ្រី ហ៊ុន សែន មានប្រសាសន៍ដូចនេះក្នុងពិធីចែកសញ្ញាប័ត្រដល់និស្សិតនៅវិទ្យាស្ថានជាតិបណ្ដុះបណ្ដាលបច្ចេកទេស នៅមជ្ឈមណ្ឌលកោះពេជ្រ នៅថ្ងៃចន្ទនេះ។
សម្តេច ហ៊ុន សែន៖«បញ្ហាទីផ្សារការងារវាមានទីផ្សារក្នុងស្រុកផង វាមានទីផ្សារក្រៅស្រុកផង។ឥឡូវនេះ ទីផ្សារការងារក្នុងស្រុងកំពុងតែមានតម្រូវការកាន់តែខ្ពស់ៗទៅ ហើយជប៉ុនយកមកប្រទេសកម្ពុជាធ្វើការវិនិយោគក្រុមរបស់គាត់បង្ហាញ់នៅកង្វស់បញ្ហាកម្លាំងពលកម្ម និងតម្លៃពលកម្ម។
សម្ដេច បានបញ្ជាក់ទៀតថា លក្ខខណមួយចំនួននៅក្រៅប្រទេសមិនល្អសម្រាប់ការរស់នៅនោះទេ ដែលគួរណាស់ស្វះស្វែងរកការងារក្នុងប្រទេសប្រសើរជាង។ ប្រមុខរដ្ឋាភិបាល ក៏បាន ទទូចឱ្យក្រុមអ្នករិះគន់ ត្រូវពិចារណា ឡើងវិញ ដែលសម្ដេចថា ប្រជាជនប្រទេសភូមាជាច្រើនសែននាក់ ក៏មិនបាន ត្រឡប់ទៅប្រទេសភូមាវិញដែរ។
តាមតួលេខក្រៅផ្លូវការ ដែលធ្វើឡើងដោយអង្គការមិនមែនរដ្ឋាភិបាល ពលរដ្ឋខ្មែរទៅ ធ្វើការនៅប្រទេសថៃមានជាង ៧០ម៉ឺននាក់ នៅម៉ាឡេស៊ី និងប្រទេស កូរ៉េខាងត្បូង ជិត១០ម៉ឺននាក់។
អ្នកតំណាងរាស្ត្រគណបក្សសង្គ្រោះជាតិ លោក សុន ឆ័យ យល់ថា ទីផ្សារការងារនៅក្នុងស្រុកនៅមានកម្រិត ព្រោះប្រជាពលរដ្ឋខ្មែរនៅតែបន្តធ្វើចំណាក់ស្រុករកការងារធ្វើនៅប្រទេសថៃ។ លោកថា រដ្ឋាភិបាលត្រូវតែបង្កើនការងារក្នុងស្រុក ដូចជាវិស័យទេសចរណ៍និងវិស័យអាទិភាពមួយចំនួនទៀត។
ចំណែកលោក មឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធការងារ និងសិទ្ធិមនុស្ស (Central) យល់ឃើញថា រដ្ឋាភិបាលអាចស្រូបទាញប្រជាពលរដ្ឋខ្មែរឲ្យធ្វើការងារនៅក្នុងប្រទេសបាន ប្រសិនបើរដ្ឋាភិបាលមានគោលនយោបាយចែកដីឲ្យប្រជាពលរដ្ឋធ្វើកសិកម្ម ដោយធានាអំពីតម្លៃ និងទីផ្សារកសិផលឲ្យមានលំនិង ជូនប្រជាកសិករ។
លោក តុលា ថា យន្តការដំឡើងប្រាក់ខែជូនកម្មករនៅក្នុងវិស័យកាត់ដេរសម្លៀកបំពាក់ និងស្បែកជើង ឲ្យបានសមរម្យក្នុងការធានាជីវភាពថ្លៃថ្នូរ។
លោក មឿន តុលា៖«ខ្ញុំគិតអ្នកនយោបាយគួរតែកាត់បន្ថយសារនយោបាយ បែបប្រជាពិថុទ តែងាក់មករកការអនុវត្តន៍ជាក់ស្តែងវិញ ដើម្បីជួយពលរដ្ឋយើងឲ្យមានការងារធ្វើនៅក្នុងស្រុក ខ្ញុំគិតថា គួរសំឡឹងទៅមើលវិស័យកសិកម្ម ប្រសិនបើយើងឲ្យដីគាត់ កសិករយើងមានដីគ្រប់គ្រាន់ ហើយមានជំនាញ ហើយនិង ធនធានក្នុងការផលិតកសិកម្ម ហើយយើងរកទីផ្សារ។
សម្រាប់ឆ្នាំ២០១៧ ប្រាក់ឈ្នួលកម្មករនិយោជិត ក្នុងវិស័យកាត់ដេរសម្លៀកបំពាក់ និងផលិតស្បែកជើង នឹងទទួលបាន ១៥៣ ដុល្លារអាមេរិកក្នុងមួយខែ ដោយ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក អ៊ិត សំហេង បានកំណត់ប្រាក់ខែគោលអប្បបរមានៅឆ្នាំក្រោយនេះចំនួន ១៤៨ ដុល្លារអាមេរិក ដែលរដ្ឋាភិបាលបានបន្ថែម ៥ ដុល្លារអាមេរិក។
ទោះបីយ៉ាងនេះក្តីថៅកែរោងចក្របារម្ភអំពីបិទរោងចក្រដោយសារប្រាក់ឈ្នួលខ្ពស់ពេកហើយ រោង ចក្រមួយចំនួនត្រូវបានរាយការណ៍ថា បានរើទៅប្រទេសភូមា៕
