ភ្នំពេញ៖ លោកកែម ឡី និងលោក យ៉ង សាំងកុមារ ជាស្ថាបនិកបណ្តាញសង្គមខ្មែរដើម្បីខ្មែរបានប្រកាសថា លោកទាំងពីរនឹងមិនឈរឈ្មោះជាស្ថាបនិក គណបក្សថ្មីមួយដែលមានឈ្មោះថា «ប្រជាធិបតេយ្យមូលដ្ឋាន» នោះទេ។ ការលើកឡើងនេះ ធ្វើឡើងបន្ទាប់ពី បណ្តាញសង្គមខ្មែរដើម្បីខ្មែរ ត្រៀមចុះឈ្មោះគណបក្សប្រជាធិបតេយ្យមូលដ្ឋានទៅក្រសួងមហាផ្ទៃ នៅថ្ងៃទី០៣ ខែសីហា ឆ្នាំ២០១៥ ខាងមុខនេះ។
លោកកែម ឡី និងលោកយ៉ង សាំងកុមារ ជាស្ថាបនិកដ៏ល្បីរបស់បណ្តាញសង្គមខ្មែរដើម្បីខ្មែរបានមានប្រសាន៍ថា លោកទាំងពីរ នឹងមិនឈរឈ្មោះ និងគ្មានតំណែងក្នុងគណៈកម្មាកាបណ្តោះអាសន្នរបស់គណបក្សប្រជាធិបតេយ្យមូលដ្ឋាននោះទេ។ ការប្រកាសនេះ ធ្វើឡើងបន្ទាប់ពីមានការរិះគន់យ៉ាងខ្លាំងពីមតិមហាជនថា គណបក្សថ្មីនេះបង្កើតក្នុងគោលបំណងបំបែកសំឡេងគណបក្សសង្រ្គោះជាតិ ដែលជាគណបក្សប្រឆាំងធំជាងគេនៅកម្ពុជា។
លោកបណ្ឌិតយ៉ង សាំងកុមារ បានមានប្រសាសន៍ថា បើទោះបីជាលោកមិនឈរឈ្មោះឬគ្មានតួនាទីនៅក្នុងគណបក្សថ្មីនេះក៏ដោយ ក៏លោកនៅតែជ្រោមជ្រែងគណបក្សថ្មីនេះ ឲ្យមានដំណើរការក្នុងការបោះឆ្នោតឃុំសង្កាត់នៅឆ្នាំ២០១៧ និងការបោះឆ្នោតជាតិនៅឆ្នាំ២០១៨ខាងមុខនេះ ។ លោកបានបន្ថែមផងដែរថា ហេតុផលដែលលោកមិនចង់មានតួនាទីក្នុងជួរគណបក្សព្រោះលោកមានការងារច្រើនក្នុងការចុះជួយប្រជាពលរដ្ឋ ជាពិសេសកសិករកម្ពុជា។ លើសពីនេះ លោកគ្រាន់តែចង់បង្រៀនប្រជាជននៅតាមមូលដ្ឋាន ឲ្យចេះធ្វើសកម្មភាពនយោបាយតាមរបបប្រជាធិបតេយ្យពិតប្រាកដតែប៉ុណ្ណោះ។
រីឯអ្នកស្រាវជ្រាវសង្គម និងតាមដានស្ថានការណ៍នយោបាយ លោក កែម ឡី បានអះអាងថា រូបលោកនឹងមិនមានតួនាទី និងមុខតំណែងអ្វីទាំងអស់ក្នុងបក្សប្រជាធិបតេយ្យមូលដ្ឋាន។ លោក កែម ឡី បានបដិសេធចំពោះការយល់ច្រឡំរបស់ប្រជាពលរដ្ឋ និងប្រព័ន្ធផ្សព្វផ្សាយមួយចំនួន ដែលថារូបលោកនឹងធ្វើជាអ្នកនយោបាយ និងមានតួនាទីជាប្រធាន ឬអនុប្រធាន ក្នុងបក្សថ្មីដែលរូបលោក និងសមាជិកស្ថាបនិកមួយចំនួនទៀតគ្រោងនឹងបង្កើត។ លោកបញ្ជាក់ថា លោកនឹងមិនមានតួនាទីអ្វីទាំងអស់ក្នុងបក្សថ្មីនេះ សូម្បីតែសមាជិកធម្មតា ក៏លោកមិនធ្វើដែរ។ ប៉ុន្តែលោកថា ការចួលរួមក្នុងសកម្មភាពនយោបាយនោះ លោកនឹងមិនបោះបង់នោះទេ។
គួររម្លឹកថា គណបក្សប្រជាធិបតេយ្យមូលដ្ឋាន ដែលគ្រោងនឹងបង្កើតថ្មីនេះ នឹងធ្វើការប្រកួតប្រជែងក្នុងបោះឆ្នោតឃុំសង្កាត់ខាងមុខដែលមានចំនួន១០ឃុំសង្កាត់ ស្ថិតនៅខេត្តកំពង់ស្ពឺ កំពត តាកែវ ព្រមទាំងរាជធានីភ្នំពេញផងដែរ។
