ភ្នំពេញ៖ សម្ដេចនាយករដ្ឋមន្ដ្រី ហ៊ុន សែន នៅថ្ងៃ ចន្ទ ទី ០៧ វិច្ឆិកា នេះ បានថ្លែងរិះគន់ បុរសម្នាក់ដែលទំនងគឺលោក សម រង្ស៊ី ថា ស្ដាប់ការវិភាគរបស់លោកមិនបាន បែរជានិយាយតែផ្ដេសតែផ្ដាស់ថា លោកគាំទ្រមេដឹកនាំផ្ដាច់ការនៅលើពិភពលោកទៅវិញ។
សម្ដេចនាយករដ្ឋមន្ដ្រី ហ៊ុន សែន មានប្រសាសន៍ដូចនេះក្នុងពិធីជួប គរុនិស្សិត និងនិស្សិត នៃវិទ្យាស្ថានជាតិបណ្តុះបណ្តាលបច្ចេកទេស នៅមជ្ឈមណ្ឌលកោះពេជ្រ។
សម្ដេចបន្ដទៀតថា លោកគ្រាន់តែធ្វើការវិភាគមួយជ្រុងតូចប៉ុណ្ណោះ និយាយពីទំនាក់ទំនងកាទូត និងភាពធូរស្រាលពីស្ថាកការណ៍នយោបាយពិភពលោកប្រសិនបើ លោក ដូណាល់ត្រាំ ឈ្នះឆ្នោតដឹកនាំប្រទេស អាមេរិក។
សម្ដេចថា អ្នកដែលធ្វើវិភាគថា លោកគាំទ្រមនុស្សកុម្មុយនីស្ត ឬមេដឹកនាំផ្ដាច់ការ គឺដូចមេដឹកនាំផ្ដាច់ការមួយចំនួនលើពិភពលោកនោះគឺ សម្ដេចថា អ្នកដែលនិយាយនេះ គឺនិយាយមូលបង្កាច់លោកគឺខុសហើយ។ សម្ដេចសុំឲ្យវិភាគ សម្ដីរបស់សម្ដេចឡើងវិញ។
កាលពីសប្ដាហ៍មុនលោក សម រង្ស៊ី ប្រធានគណបក្សប្រឆាំងបានសរសេរលិខិតមួយ ហើយស្រង់មកចុះផ្សាយកាសែត The Cambodian Daily ដែលលោកបានសរសេរដោយប្រៀបធៀប សម្ដេច ហ៊ុន សែន ទៅនឹងលោក ដូណាល់ត្រាំ ថា ជាមនុស្សដែលឆេវឆាវ នឹងងាយគ្រោះថ្នាក់។
លោក សម រង្ស៊ី ប្រៀបធៀបលោក ដួណាល់ត្រាំ ជាមនុស្សផ្ដាច់ការនិយមដោយសារតែខ្វល់ខ្វាយតែរឿងលុយកាក់ រីឯសម្ដេច ហ៊ុន សែន ជាមេដឹកនាំនិយមអំណាចផ្ដាច់ការប្រើប្រាស់កាំភ្លើងដើម្បីដោះស្រាយបញ្ហា។
ទំនងដោយសាររឿងនេះហើយបានជាប្រមុខរដ្ឋាភិបាលប្រតិកម្មតបវិញ បើទោះមិនបញ្ចេញឈ្មោះលោក សម រង្ស៊ី ក៏ដោយ។ លោក ដូណាល់ត្រាំ ជាបេក្ខជនប្រធានាធិបតីមកពីគណបក្សសាធារណរដ្ឋ។
លោកត្រូវ ប្រកួតប្រជែងដណ្ដើមតំណែងប្រធានាធិបតីសហរដ្ឋអាមេរិកនៅថ្ងៃទី ០៨ វិច្ឆិកា សប្ដាហ៍នេះ។ ប៉ុន្ដែអ្វីដែលធ្វើឲ្យមានការព្រួយបារម្ភនោះគឺ ចរិកលក្ខណរបស់លោក ដូណាល់ត្រាំ មានភាពឆេវឆាវ ហើយលោកតែងតែគំរាមដល់ជនអន្ដោប្រវេសន៍ដែលរស់នៅសហរដ្ឋអាមេរិក៕
