ខណៈដែលការបោះឆ្នោតជ្រើសរើសប្រធានាធិបតីអាមេរិក ជិតចូលមកដល់អ្នកសង្កេតការណ៍អន្ដរជាតិ និងមេដឹកនាំពិភពលោកមួយចំនួន រួមទាំងពលរដ្ឋអាមេរិក និងប្រទេសដ៏ទៃ កំពុងតែសម្លឹងបាញ់ឆ្ពោះទៅសេតវិមានអាមេរិក ដែលគេគិតថា ឥស្សរជនអាមេរិកពីររូប អាចនឹងមានម្នាក់មានវាសនាចូលទៅកាន់ ការិយាល័យពងក្រពើ។
នៅក្នុងការឃោសនាបោះឆ្នោតកន្លងមកនេះ បេក្ខជនដូណាល់ ត្រាំ មកពីគណបក្សសាធារណរដ្ឋ និងសមភាគី លោកស្រី គ្លីន តុន មកពីគណបក្សប្រជាធិបតេយ្យ ពួកគេត្រូវប្រើប្រាស់យុទ្ធនាការយ៉ាងប៉ិនប្រសប់ ដើម្បីទាក់ទាញសន្លឹកឆ្នោតពីប្រជាជនអាមេរិក។ប៉ុន្ដែនៅក្នុងយុទ្ធនាការនេះ បេក្ខជនទាំងពីរ ដែលក្រៅពីផ្ដោតសំខាន់លើគោលនយោបាយការបរទេស គឺ ពួកគាត់ផ្ដោតសំខាន់ទៅលើគោលនយោបាយពាណិជ្ជកម្មផងដែរ។
មហាសេដ្ឋីអចលនទ្រព្យ ដូណាល់ត្រាំ សន្យាថា ធ្វើអោយសេដ្ឋកិច្ចអាមេរិកកាន់តែរឹងមាំថែមទៀត ជាមួយនិងការផ្ដល់ការងារឱ្យពលរដ្ឋអាមេរិកកាន់តែច្រើនឡើង។ ប៉ុន្ដែបេក្ខជនរូបនេះបានសន្យារុះរើកិច្ចព្រមព្រៀងពាណិជ្ជកម្មមួយចំនួន ជាមួយបណ្ដាប្រទេសលើពិភពលោក ដោយលោកគំរាមថា និងនាំអាមេរិកចេញពីកិច្ចព្រមព្រៀងពាណិជ្ជកម្មអាមេរិកខាងជើង និងអង្គការពាណិជ្ជកម្មពិភពលោក WTO ។
ការគំរាមរបស់លោក ដូណាល់ត្រាំ ស្របពេលដែលលោកព្រមានថា នឹងរុះរើកិច្ចព្រមព្រៀងពាណិជ្ជកម្មមួយចំនួនជាមួយនិងចិន ដោយលោកចោទចិនថា មិនសាកសមជាដៃគូរពាណិជ្ជកម្មរបស់អាមេរិកឡើយ ដោយសារតែផលិតផលចិនមួយចំនួនប៉ះពាល់ដល់កិត្យានុភាពនៃទំនិញដែលមានគុណភាពរបស់អាមេរិក។
អ្នកវិភាគសេដ្ឋកិច្ចមួយរូប ដែលស្រង់មកចុះផ្សាយដោយការសែត The Australia Time បានព្រមានថា បើដូណាល់ត្រាំឈ្នះឆ្នោត សង្គ្រាមពាណិជ្ជកម្មចិនអាមេរិកនឹងចាប់ផ្ដើម ហើយពេលនោះប្រជាជនប្រទេសទាំងពីរប្រឈមមុខនិងផលលំបាករៀងៗខ្លួន។
គេសង្កេតឃើញថា មេដឹកនាំប្រទេសមួយចំនួនដែលរំលោភសិទ្ធិមនុស្ស ហាក់ប្រាថ្នាក់ចង់ឃើញលោកដូណាល់ត្រាំជាប់ឆ្នោតជាប្រធានាធិបតី ក្នុងនោះមាន មេដឹកនាំផ្ដាច់ការកូរ៉េខាងជើង គឹម ជុងអ៊ុន មេដឹកនាំផ្ដាច់ការ ហ្ស៉ិមបាវ៉េ រ៉ូប៊ឺតម៉ូហ្គាបេ ប្រធានាធិបតីរុស្ស៊ី ប្លាឌីមៀពូទីន។ ចំណែកកម្ពុជា សម្ដេច ហ៊ុន សែន ក៏ចង់ឱ្យលោកដូណាល់ត្រាំ ជាប់ឆ្នោតដែរ។ ប៉ុន្ដែមេដឹកនាំប្រទេចិនមិនទាន់ឃើញចាប់អារម្មណ៍ ឬថ្លែងសារនយោបាយគាំទ្រ ប្រធានាធិបតីអាមេរិកនៅឡើយទេ៕
