នាយករដ្ឋមន្ដ្រីទើបតែងតាំងថ្មីនៅកូរ៉េខាងត្បូងបាននិយាយនៅថ្ងៃព្រហស្បត្តិ៍នេះថា ប្រធានាធិបតី ប៉ាក គុនហេ ត្រូវតែស្ថិតនៅក្រោមការស៊ើបអង្កេតក្នុងសំនុំរឿង ដែលមិត្តភក្ដិរបស់លោកស្រី ប្រើប្រាស់ឥទ្ធិពលដើម្បីទាក់ទាញមូលនិធិ។
នាយករដ្ឋមន្ដ្រីទើបតែងតាំង គឺ លោក គឹម យ៉ុងយន់( Kim Byong-joon ) បានថ្លែងនៅក្នុងសន្និសីទសារព័ត៌មានដូចនេះ មួយថ្ងៃបន្ទាប់ពីលោកបានតែងតាំង ជាបក្ខេជននាយករដ្ឋមន្ដ្រីថ្មី ជំនួសអោយលោក វាំង យូអញ (Hwang Kyo-ahn) ។
លោក គឹម យ៉ុងយន់ បញ្ជាក់ថា ៖«សូម្បីតែការតែងតាំងរបស់ខ្ញុំ ក៏រដ្ឋអាជ្ញាមានសិទ្ធិស៊ើបអង្កេតផងដែរ ចំណែកឯលោកស្រី ប៉ាក គុនហេ ជាប្រធានាធិបតីក៏ត្រូវតែស៊ើបអង្កេតដែរ» ។
នៅថ្ងៃនេះដែរ សមាជិកសភាជាច្រើន បានទាមទារឱ្យរដ្ឋអាជ្ញាបើកការស៊ើបអង្កេត ទាំងលោកស្រី ប៉ាក គុនហេ និងមិត្តភក្ដិរបស់លោកស្រីទាំងអស់។
កាលពីថ្ងៃម្សិលមិញ ស្ដ្រីម្នាក់គឺលោកស្រី ចយ ស៊ុនស៊ីល (Choi Soon-sil ) ជាមិត្តជិតស្និតរបស់លោកស្រី ប៉ាក គុនហេ ត្រូវបានរដ្ឋអាជ្ញាក្រុងសេអ៊ូលឃុំខ្លួន ពីបទប្រើប្រាស់អំណាចរបស់ប្រធានាធិបតី ដើម្បីរៃអង្គាសលុយ មូលនិធិមនុស្សធម៌មួយ ដោយអំពើខុសច្បាប់។
សំនុំរឿងនេះនាំអោយប្រជាជនកូរ៉េខាងត្បូងជាច្រើនម៉ឺននាក់ កាលពីថ្ងៃអាទិត្យសប្ដាហ៍មុន បានធ្វើបាតុកម្មដោយទាមទារឱ្យលោកស្រី ប៉ាក គុនហេ លាលែងពីតំណែង៕
