ភ្នំពេញ ៖ បន្ទាប់ពីទទួលបានជោគជ័យនៅដំណាក់កាលទី ១ នៃគម្រោងធនធានជលផលតាមវាលស្រែនៃកម្មវិធីសន្តិសុខស្បៀងសម្រាប់អនា គតនៅកម្ពុជា នៅថ្ងៃទី០២ វិច្ចិកានេះ មជ្ឈមណ្ឌលសិក្សាស្រាវជ្រាវ World fish រួមនឹងអង្គការក្នុងស្រុកមួយចំនួន បានបន្តអនុវត្តគម្រោងនៅដំណាក់ កាលទី ២ បន្តទៀត ដែលមានរយៈពេល៥ឆ្នាំ។
គម្រោងធនធានជលផលតាមវាលស្រែ បង្កើតឡើងដើម្បីជួយកម្ពុជាក្នុងការកាត់បន្ថយភាពក្រីក្រ សំដៅចូលរួមចំណែកក្នុងការលុបបំបាត់ការខ្វះអាហាររូបត្ថម្ភ និងការការពារកម្ពុជាដើម្បីទទួលបានធនធានជលផលកាន់តែប្រសើរឡើង។
លោកស្រី Yu Miko Kura នាយកប្រចាំប្រទេស នៃជម្ឈមណ្ឌលសិក្សាស្រាវជ្រាវ World fish បានឱ្យដឹងថា គម្រោងធនធានជលផលតាមវាល ស្រែនៃកម្មវិធីសន្តិសុខស្បៀងសម្រាប់អនាគតនៅកម្ពុជា នឹងបន្តអនុវត្តនៅ ខេត្តចំនួន ៤ គឺ ពោធិសាត់ បាត់ដំបង កំពង់ធំ និងសៀមរាប ដែលគម្រោងនេះមានរយៈពេល៥ ឆ្នាំ ដោយចំណាយអស់ប្រមាណ ៦ លានដុល្លារ។ អ្នកស្រីបន្តថា ការអនុវត្តគម្រោងនេះនឹងសហការជាមួយរដ្ឋបាលជលផល និងអង្គការមូលដ្ឋានចំនួន ៤ ដែលមានទីតាំងនៅតាមខេត្តទាំងនេះ។
លោកស្រីបន្ថែមថា ធនធានត្រីបានដើរតួនាទីយ៉ាងសំខាន់ក្នុងការធ្វើឱ្យប្រសើរឡើង នូវបញ្ហាខ្លះអាហាររូបត្ថម្ភ ជាពិសេសក្នុងចំណោមប្រជាជនកម្ពុជាក្រីក្រនៅជនបទ។
បើតាមលោកស្រី ក្នុងដំណាក់ទី ១ ទទួលបានជោគជ័យច្រើន ព្រោះ ៤០ ទីតាំងដែលបានអនុវត្តការចិញ្ចឹមត្រីតាមវាលស្រែ ក្នុងនោះ ៣២ ទីតាំងបានទទួលជោគជ័យ ដែលធ្វើឱ្យកំណើននៃទិន្នផលត្រី និងត្រីដែលចាប់បាន មានការកើនឡើង ពី២៥% ទៅ ៧០% និងធ្វើឱ្យជីវភាពប្រជាជនល្អជាងមុនផងដែរ។
លោកស្រីបន្តថា បន្ទាប់ពីបញ្ចប់គម្រោងនេះ World fish នឹងបន្តពង្រីកទៅខេត្តដទៃដែលអាចមានលទ្ធភាពក្នុងការចិញ្ចឹមត្រីនៅវាលស្រែ។
លោក អេង ជាសាន្ត ប្រតិភូរដ្ឋាភិបាលកម្ពុជា ទទួលបន្ទុកជលផលបានថ្លែងថា គម្រោងចិញ្ចឹមត្រីតាមវាលស្រែ បានផ្តល់ផលយ៉ាងច្រើន ដែលអាចជួយបង្កើនផលត្រីនៅតាមវាលស្រែ និងផ្តល់វីតាមីនជួយដល់កុមារ និងស្រី្ត។ លោកបន្តថា រដ្ឋាភិបាល នឹងគាំទ្រគម្រោងនេះ តាមរយៈការចូលរួមជាបច្ចេកទេស និងថវិកា។
ចំណែកអ្នកស្រី កែវ គឹមសួន តំណាងសហគមន៍ល្បើកកិត្តិយស ខេត្តសៀបរាមបានប្រាប់ថា បន្ទាប់ពី World fish បានអនុវត្តគម្រោងនេះនៅសហគមន៍របស់អ្នកស្រី ឃើញថា ប្រជាពលរដ្ឋទទួលបានផលប្រយោជន៍ជាច្រើន ជាពិសេសធ្វើឱ្យជីវភាពប្រជាពលរដ្ឋនៅទីនោះកាន់តែល្អជាមុន។
បើតាមតំណាង World fish ក្រោយពីគម្រោងនេះទទួលបានជោគជ័យ គឺអង្គការនេះនឹងយកបទពិសោធន៍របស់ខ្លួន ទៅអនុវត្តនៅប្រទេសមួយចំនួនទៀតដូចជា នៅទ្វីបអាហ្រិ្វក បង់ក្លាដេស និងប្រទេសភូមា៕
