ប្រមុខរដ្ឋាភិបាលកម្ពុជា នៅថ្ងៃនេះ មិនយល់ស្របចំពោះ មជ្ឈដ្ឋានមួយចំនួននិងអ្នកនយោបាយខ្លះ ដែលចោទគណបក្សប្រជាជនកម្ពុជាថា នាំជនជាតិវៀតណាមមករស់នៅ កម្ពុជា ដោយសម្ដេចអះអាងថា អាណានិគមបារាំងគឺជាអ្នកនាំជនជាតិមួយនេះមករស់នៅកម្ពុជា។ 
ការថ្លែងរបស់សម្ដេច បានធ្វើឡើងក្នុងពិធីបើកការដ្ឋាន ស្ថាបនាផ្លូវជនបទក្រាលកៅស៊ូ និងចាក់បេតុង ជំហានទី២ នៅភូមិ-ឃុំកំពង់ទ្រា ស្រុកក្រូចឆ្មារ ខេត្តត្បូងឃ្មុំ នៅព្រឹកមិញ។តែបក្សប្រឆាំង និងអ្នកវិភាគ មិនយល់ស្របចំពោះការអះអាងរបស់រដ្ឋាភិបាលនេះទេ ដោយពួកគាត់អះអាងថា ប៉ុល ពត បានធ្វើអោយវៀតណាមចេញពីកម្ពុជាអស់ទៅហើយ។ ជូនព័ត៌មាននេះដោយ លោក លៀ ស៊ីណា ៖
មុននឹងសម្ដេច បានថ្លែងដូចនេះ គឺ លោក បានលើកឡើងពីឈ្មោះភូមិមួយដែលលោកគិតថា ជាភូមិប្រវត្តិសាស្ដ្រមានឈ្មោះថា ភូមិកញ្ចូក ជាភាសាវៀតណាម។ ក្នុងន័យនេះហើយ ដែលសម្ដេច អះអាងថា លោកនិងបក្សប្រជាជនកម្ពុជា មិនបាននាំពលរដ្ឋមកនៅកម្ពុជាទេ គឺ វៀតណាមមកតាមអាណានិគមបារាំង។ សម្ដេចថា កុំដាក់កំហុសនេះ លើលោក គឺជារឿងប្រវត្តិសាស្ត្រ។
សម្ដេច ហ៊ុន សែន៖«វៀតណាមិនមែននៅខ្មែរជំនាន់ឥឡូវឯណា វៀតណាមបារាំងអ្នកនាំមកតើ ហើយចេះតែមកជេរខ្ញុំ តែដល់ឥឡូវអត់ទាំងមានវៀតណាមផង បឹងក្រជូនហ្នឹងមានវៀតណាមដែរឥឡូវ ហើយអត់មានវៀតណាមផង ហើយកាលហ្នឹងវៀតណាមនៅពេញទាំងស្រុកខ្មែរ មកជេរតែខ្ញុំអាក្មេងក្រោយ»។
ការថ្លែងរបស់ ប្រមុខរដ្ឋាភិបាល ដូចនេះស្របពេល បណ្ដាញសង្គម ដែលបានបង្ហោះឃ្លិប អតីតនាយករដ្ឋមន្ត្រី ប៉ែន សុវណ្ណ និយាយពី ពលរដ្ឋវៀតណាមមករស់នៅលើទឹកដីកម្ពុជាដោយសារ របបក្រុងហាណូយប្រើប្រាស់ឥទ្ធិពលរបស់ខ្លួនលើកម្ពុជា តាមរយៈកងទ័ពប្រទេសនេះចូលមករំដោះ ពីរបបប៉ុលពត។
លោក យឹម សុវណ្ណ អ្នកនាំពាក្យ គណបក្សប្រឆាំងធំជាងគេនៅកម្ពុជា មានប្រសាសន៍ថា ការអះអាងបែបនេះ មិនអាចយកជាការបានឡើយ។ លោកថា ពលរដ្ឋវៀតណាមចូលមករស់ក្នុងប្រទេសកម្ពុជា បានតាមរយៈថ្ងៃ៧មករា។
លោក យឹម សុវណ្ណ៖«ខ្ញុំចង់បញ្ជាក់ថា កាលពីជំនាន់ប៉ុលពត ហ្នឹងតាមខ្ញុំដឹងគឺវៀតណាម អស់ពីទឹកដីខ្មែរហើយ អត់មានទៀតទេ ហើយវៀតណាមដែលមកក្រោយៗទៀតហ្នឹងគឺក្រោយឆ្នាំ ១៩៧៩ ទេ»។
យល់ស្របចំពោះលោក យឹម សុវណ្ណ លោក ឡុង គឹមឃន អ្នកស្រាវជ្រាវនយោបាយការបរទេស និងច្បាប់អន្ដរជាតិ បាននិយាយថា ការពិតវៀតណាម មករស់នៅប្រទេសកម្ពុជាគ្រប់សម័យកាលទាំងអស់ ប៉ុន្ដែសម័យនោះគេគ្រប់គ្រងជនជាតិរៀតណាម មានប្រសិទ្ធិភាពជាងបច្ចុប្បន្ននេះ ហើយបើនិយាយពីជនជាតិវៀតណាមគឺតិចតួចបំផុត។ លោកបានពន្យល់ទៀតថា ពលរដ្ឋវៀតណាមស្ទើអស់ពីកម្ពុជាទៅក្រោយរបបប៉ុលពត។
លោក ឡុង គឹមឃន៖«ឆ្នាំ ១៩៧៩ ក្រោយរបបប៉ុលពតដួលរលំទៅក្រោមការជួយរបស់វៀតណាម និងអ្នកតស៊ូខ្មែរមួយក្រុម យើងឃើញថា វត្ដមានពលរដ្ឋវៀតណាម ចាប់ផ្ដើមហូរចូលមកវិញ រហូតតាំងពីពេលហ្នឹងមកដល់ឥឡូវ ៣០ ឆ្នាំ យើងដឹងទាំងអស់គ្នាថា រដ្ឋយើងហាក់មិនទាន់អនុវត្ដន៍ច្បាប់អន្ដោប្រវេសន៍ ឲ្យបានពិតប្រាកដ ទើបតែប៉ុន្មានឆ្នាំចុងក្រោយនេះទេដែលឃើញមាន ការ ធ្វើគេហៅជំរឿន ជនអន្ដោប្រវេសន៍ដែលរកប្រមាណម៉ឺនហ្នឹង ប៉ុន្ដែទើបប៉ុន្មានឆ្នាំចុងក្រោយហ្នឹងទេ»។
អ្នកស្រាវជ្រាវនយោបាយការបរទេសរូបនេះបញ្ជាក់ថា ដើម្បីគ្រប់គ្រងជនអន្ដោប្រវេសន៍ឲ្យមានប្រសិទ្ធិភាព គឺគេត្រូវបែងចែកឲ្យច្បាស់លាស់ប្រភេទជនបរទេស គឺត្រូវចេញប័ណ្ណសំគាល់ខ្លួនឲ្យពួកគេរស់នៅ គឺងាយស្រួលក្នុងការត្រួតពិនិត្យ។
តែយ៉ាងនេះក្ដីអ្នកនាំពាក្យបក្សកាន់អំណាចលោក សុខ ឥសាន្ដ មានប្រសាសន៍គាំទ្រទាំងស្រុងអ្វីដែលសម្ដេចនាយករដ្ឋមន្ដ្រីបានអះអាង។ លោកថា សូម្បីតែរបបមុនៗក៏មានជនជាតិវៀតណាម កាន់មុខតំណែងដល់ចៅហ្វាយខេត្តដែរ។ លោកបញ្ជាក់ទៀតថា ពលរដ្ឋវៀតណាម មករស់នៅកម្ពុជាជាច្រើនជំនាន់មកហើយ។ សូម្បីតែជំនាន់ប៉ុលពតពួកគេរត់ទៅនៅវៀតណាមវិញ ហើយក៏បានជញ្ជូនកូន ជញ្ជូនចៅត្រឡប់មកវិញ ក្រោយរបបប៉ុលពលដួលរលំ។
លោក សុខ ឥសាន្ដ៖«ជំនាន់ឆ្នាំ ៥០ ៥១ ៥២ ៥៣ ដែលខ្ញុំដឹងហ្នឹងគឺថា ពេលដែលបារាំងគ្រប់គ្រងហ្នឹចៅហ្វាយខេត្តទាំងអស់ទូទាំងប្រទេសកម្ពុជា គឺសុទ្ធតែជាជនជាតិវៀតណាម ទាំងអស់ ដែលខ្មែរយើងបានត្រឹមតែអនុប្រធានខេត្ដទេ»។
តាមស្ថិតិរបស់ក្រសួងមហាផ្ទៃដែលចេញផ្សាយកាលពីពេលថ្មីៗ គឺពលរដ្ឋវៀតណាមរស់នៅប្រទេសកម្ពុជាប្រមាណជាង ១៦ ម៉ឺននាក់។ ប៉ុន្ដែតួលេខនេះត្រូវបានអ្នកស្រាវជ្រាវនិងបក្សប្រឆាំងមិនយល់ស្របឡើយ។ ពួកគាត់អះអាងថា ពលរដ្ឋវៀតណាមមករស់នៅកម្ពុជាអាចមានចំនួនពី ១លាន នាក់ឡើងទៅ។
ពលរដ្ឋវៀតណាមដែលមករស់នៅកម្ពុជាកាលពីសម័យសង្គមរាស្ដ្រនិយម ដឹកនាំដោយសម្ដេចឪ នរោត្ដមសីហនុ ត្រូវបានបែងចែកជាពីរ ទៅបី ប្រភេទ ដោយឲ្យកាន់ប័ណ្ណសំគាល់ខ្លួនពណ៌ខ្មៅនឹងពណ៌បៃតង។ ប៉ុន្ដែពលរដ្ឋវៀតណាមដែលរស់នៅប្រទេសកម្ពុជាបច្ចុប្បន្ននេះ គឺប្រើប្រាស់អត្ដសញ្ញាណប័ណ្ណដូចពលរដ្ឋខ្មែរហើយក៏មានសិទ្ធិបោះឆ្នោតដូចពលរដ្ឋខ្មែរដែរ៕
