ភ្នំពេញ៖ លោក ប៉ែន សុវណ្ណ អតីតជានាយករដ្ឋមន្ដ្រីដំបូងគេ នៃ របបសាធារណរដ្ឋប្រជាមានិតកម្ពុជា ក្នុង ឆ្នាំ១៩៧៩ រហូតដល់ ឆ្នាំ១៩៨១ និងបច្ចុប្បន្នជាតំណាងរាស្ដ្រគណបក្សសង្គ្រោះជាតិមណ្ឌលកំពង់ស្ពឺ ត្រូវបានក្រុមគ្រួសារលោក សម្រេចដង្ហែ មកតម្កល់នៅ វត្ដថាន់ហើយ នៅព្រឹកថ្ងៃទី២ វិច្ឆិកានេះ។
ប្រជាពលរដ្ឋ សកម្មជន និងថ្នាក់ដឹកនាំគណបក្សសង្គ្រោះជាតិ ដែលបានចូលរួមដង្ហែសព លោក ប៉ែន សុវណ្ណ ជាមួយនិងក្រុមគ្រួសាររបស់លោក នៅខេត្តតាកែវ ឆ្ពោះមកតម្កល់នៅវត្ត នួន មុនីរាម ហៅ វត្តថាន់ ដែលស្ថិតក្នុងសង្កាត់ទន្លេបាសាក់ ខណ្ឌចំកាមន រាជធានីភ្នំពេញនោះ ក៏បានបង្ហាញពីការសោកស្ដាយ ចំពោះវីរភាពរបស់លោកដែលលោកបានបន្សល់ផងដែរ។
លោក ប៉ែន សុវណ្ណ បានទទួលមរណភាពនៅវេលាម៉ោង ៧ និង ១៥ នាទី កាលពីថ្ងៃទី ២៩ ខែតុលា ឆ្នាំ ២០១៦ ក្នុងជន្មាយុ ៨០ឆ្នាំ ដោយជម្ងឺដាច់សរសៃឈាម ក្នុងខួរក្បាល។ មុន លាចាកលោកទៅ លោក បានបន្សល់ទុកនូវពាក្យដែលគួរឱ្យចងចាំជាច្រើន គឺទទួចឱ្យខ្មែរត្រូវប្ដេជ្ញាការពារបូរណភាព និងអធិបតេយ្យភាពប្រទេសកម្ពុជា កុំអោយបរទេស ដាក់នឹមត្រួតត្រា។
គណបក្សសង្គ្រោះជាតិដែលជាគណៈកម្មការបុណ្យសពលោក ប៉ែន សុវណ្ណ ឱ្យដឹងថា សពអ្នកតំណាងរាស្ត្ររូបនេះ អាចនឹងយកទៅបូជា នៅខាងមុខវត្តបុទុម បុតី បើមានការអនុញ្ញាតពីសាលារាជធានីភ្នំពេញ៕
