ភ្នំពេញ៖ សម្តេច ហ៊ុន សែន នាយករដ្ឋមន្ត្រីកម្ពុជា បានក្រើនរំលឹកជាថ្មីទៀតទៅដល់មន្ត្រីរាជការសមត្ថកិច្ចទាំងអស់ត្រូវយកចិត្តទុកដាក់រក្សាការពារសន្តិសុខ សុវត្ថិភាពជូនប្រជាពលរដ្ឋ ជាពិសេសប្រឆាំងអំពើឃាតកម្ម។ ការថ្លែងដូចនេះធ្វើទ្បើងនៅក្នុងការជួបសំណេះសំណាល ជាមួយក្រុមប្រឹក្សាឃុំ សង្កាត់ ក្រុង និងមន្ត្រីរាជការ កងកម្លាំងប្រដាប់អាវុធក្នុងខេត្តកណ្ដាល កាលព្រឹកថ្ងៃទី ០១ ខែវិច្ឆិកា ឆ្នាំ២០១៦នេះ។
យោងតាម ហ្វេសប៊ុក សម្តេច ហ៊ុន សែន ដែលបានបង្ហោះជាសាធារណៈនៅថ្ងៃទី០១ ខែវិច្ឆិកានេះ សម្តេច ហ៊ុន សែន បានក្រើនរំលឹកដល់មន្ត្រីរាជការទាំងអស់ត្រូវយកចិត្តទុកដាក់រក្សាសន្តិសុខសណ្ដាប់ធ្នាប់សង្គម ជាពិសេសត្រូវគ្រប់គ្រងនិងទប់ស្កាត់អោយបាននូវអំពើ ឃាតកម្ម ឆក់ប្លន់ ចោរកម្មនិងថ្នាំញៀន។
តាមរយៈនេះ សម្តេច ហ៊ុន សែន បានណែនាំទៅអាជ្ញាធរត្រូវសហការគ្នាអោយបានក្នុងការអនុវត្តគោលនយោបាយភូមិឃុំមានសុវត្ថិភាព និងខិតខំផ្តល់នូវសេវាសាធារណៈ ដែលមានសេវាសំណូមពរ និង សេវាតម្រូវការចាំបាច់មួយចំនួនដែលត្រូវដោះស្រាយជូនប្រជាពលរដ្ឋអោយបានល្អ ឆាប់ និងមានប្រសិទ្ឋិភាព មិនយក កម្រៃសេវាលើសពីតម្លៃដែលច្បាប់បានកំណត់។
ប្រមុខរដ្ឋាភិបាលក៏បានលើកឡើងផងដែរថា ខេត្តកណ្ដាលគឺជាខេត្តដែលសំបូរទៅដោយរោងចក្រមានជាង ១៥០ ដែលអាជ្ញាធរត្រូវយកចិត្តទុកដាក់ដល់ការរស់នៅរបស់ កម្មករអោយបានល្អប្រសើរដោយការសម្រួលតម្លៃទឹក ភ្លើង អោយមកនៅទាបដើម្បីសម្រួលដល់ជីវភាពរស់នៅរបស់ពួកគាត់។ ម្យ៉ាងវិញទៀតដោយខេត្តនេះមានព្រំប្រទល់ជាប់ប្រទេស វៀតណាម គឺអាជ្ញាធរខេត្តត្រូវមានទំនាក់ទំនងល្អជាមួយអាជ្ញាធរវៀតណាម ពិសេសយកចិត្តទុកដាក់នូវដំណើរការបោះបង្គោលព្រំដែនអោយបានលឿន និងបញ្ឈប់អោយបាននូវការជួលដីពីសំណាក់ប្រជាពលរដ្ឋរបស់យើងអោយទៅប្រជាពលរដ្ឋវៀតណាម។
សូមជំរាបថាការក្រើនរំលឹករបស់សម្តេច ហ៊ុន សែន ក៏ស្របពេល រដ្ឋាភិបាល នឹងរៀបចំពិធី បុណ្យ អុំទូក បណ្ដែតប្រទីប អកអំបុក និងសំពះព្រះខែ រយៈពេល ៣ ថ្ងៃដោយចាប់ផ្ដើមពីថ្ងៃទី១៣ ដល់ ថ្ងៃទី១៥ វិច្ឆិកា សប្ដាហ៍ខាងមុខនេះ៕
